ມສ ສັນຕິພາບ ນະຄອນຫລວງພະບາງ ຈັດແຂ່ງຂັນກິລາ ແລະ ສິລະປະ ປະຈຳປີ 2018

ໂຮງຮຽນມັດຖະຍົມສົມບູນ ສັນຕິພາບ ນະຄອນຫຼວງພະບາງ ແຂວງຫຼວງພະບາງໄດ້ຈັດງານແຂ່ງຂັນກິລາ ແລະ ສິລະປະ ນັກຮຽນ ຄັ້ງທີ່ 8 ຂຶ້ນຢ່າງເປັນທາງການເມື່ອວັນທີ່ 30 ພະຈິກ 2018 ຜ່ານມາ ທີ່ເດີ່ນໂຮງຮຽນ ມສ ດັ່ງກ່າວ ໂດຍການເປັນປະທານຂອງ ທ່ານ ສູນທອນ ແກ້ວສະຫວັນ ອຳນວຍການໂຮງຮຽນມັດຖະຍົມສົມບູນ ສັນຕິພາບ ປະທານຈັດງານແຂ່ງຂັນ ໃຫ້ກຽດເຂົ້າຮ່ວມມີ ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການ ແລະກິລາແຂວງ, ທ່ານ ຢາງສືຮາຍ ຜູ້ອຳນວຍການໂຮງຮຽນອະຊີວະນະຄອນຊຽງຮຸ່ງ ສປ ຈີນ ພ້ອມດ້ວຍຄູ-ອາຈານ, ນ້ອງນັກຮຽນ ແລະ ນັກກິລາເຂົ້າຮ່ວມ.

ໃນພິທີໄດ້ຮັບຊົມການເດີນຂະບວນຂອງກ້ອນກຳລັງຈາກນ້ອງນັກຮຽນ, ນັກກກິລາທີ່ມາຈາກໂຮງຮຽນອ້ອມຂ້າງທີ່ສົ່ງນັກກິລາເຂົ້າຮ່ວມແຂ່ງຂັນ ຈາກນັ້ນ ທ່ານ ຫຸມພັນ ຮອງປະທານຈັດງານແຂ່ງຂັນໄດ້ຂຶ້ນລາຍງານການກະກຽມການແຂ່ງຂັນກິລາ ແລະ ສິລະປະ ຄັ້ງທີ່ 8 ສົກຮຽນ 2018-2019 ວ່າ: ການຈັດງານໃນຄັ້ງນີ້ ເພື່ອສືບຕໍ່ແຂ່ງຂັນທີ່ເຄີຍປະຕິບັດກັນມາ ເປົ້າໝາຍຫຼັກກໍ່ເພື່ອສ້າງຂະບວນການເຄື່ອນໄຫວກິດຈະກຳໃຫ້ແກ່ນ້ອງນັກຮຽນ ແລະ ເປັນການກະກຽມຊຸກຢູ້ຂະບວນການ ການຮຽນ-ການສອນ ໃຫ້ຕິດພັນກັບ 5 ຫຼັກມູນຂອງການສຶກສາ ພ້ອມທັງເປັນການສ້າງແຮງຈຸງໃຈ ແລະ ດຶງດູດເອົານັກຮຽນ ໃຫ້ມີສ່ວມ ໃນການເຄື່ອນໄຫວກິດຈະກຳ ຂອງໂຮງຮຽນ ແລະ ນຳໃຊ້ເວລາໃຫ້ເປັນປະໂຫຍດ ເພື່ອຫຼີກລ່ຽງຮ່າງໄກຈາກຢາເສບຕິດ, ການເຄື່ອນໄຫວບໍດີຢູ່ໃນສັງຄົມ ແລະ ເຮັດໃຫ້ສຸຂະພາບແຂງແຮງ, ເພື່ອປັບປຸງເສີມສ້າງທັກສະ, ພອນສະຫວັນ ແລະ ຄວາມສາມາດດ້ານກິລາ-ສິລະປະ ໃຫ້ມີຄວາມກ້າວໜ້າ ສາມາດເຂົ້າຮ່ວມງານແຂ່ງຂັນ ແລະ ສະແດງໃນງານລະດັບຕ່າງໆໄດ້.

ສຳລັບການແຂ່ງຂັນກິລາ ແລະ ສິລະປະ ຄັ້ງນີ້ ປະກອບມີ 10 ປະເພດກິລາຄື: ບານເຕະ ຍິງ-ຊາຍ, ບານສົ່ງ ຍິງຊາຍ, ບານບ້ວງ ຍິງ-ຊາຍ, ກະຕໍ້ຫວາຍ ຍິງ-ຊາຍ, ປິ່ງປ່ອງດ່ຽວ ຍິງ-ຊາຍ, ແບັດມິນຕັນ ຍິງ-ຊາຍ, ເປຕັ່ງ ຍິງ-ຊາຍ, ແລ່ນ 100 ແມັດ ຍິງ-ຊາຍ, ດຶງເຊືອກ ຍິງ-ຊາຍ, ເຕັ້ນສູງ ຍິງ-ຊາຍ.

ເພື່ອເຮັດການດຳເນີນການແຂ່ງຂັນ ມີຄວາມໝາຍສຳຄັນນັ້ນ ທ່ານ ສູນທອນ ແກ້ວສະຫວັນ ອຳນວຍການໂຮງຮຽນມັດຖະຍົມສົມບູນ ສັນຕິພາບ ປະທານຈັດງານແຂ່ງຂັນ ໄດ້ຂຶ້ນກ່າວເປີດການແຂ່ງຂັນຢ່າງເປັນທາງການ ພ້ອມທັງຮຽກຮ້ອງໃຫ້ຄະນະປະທານ, ອະນຸກຳມະການ ຕະຫຼອດເຖິງທີມນັກກິລາແຕ່ລະພາກສ່ວນ ຈົ່ງພ້ອມກັນເອົາໃຈໃສ່ດຳເນີນວຽກງານ ດ້ວຍຄວາມຮັບຜິດຊອບສູງ ພ້ອມທັງປະຕິບັດລະບຽບຂອງການແຂ່ງຂັນຢ່າງເຂັ້ມງວດ ຕິດພັນກັບການເຮັດໜ້າທີ່ທີຖືກມອບໝາຍສໍາເລັດ ແລະ ເຕັມໄປດ້ວຍບັນຍາກາດ ໄມຕີຈິດ ມິດຕະພາບ ຮູ້ແພ້ ຮູ້ຊະນະ ຮູ້ໃຫ້ອາໄພກັນຕະຫຼອດໄລຍະດຳເນີນການແຂ່ງຂັນ.
ໂດຍ: ແຫຼ້ ສຸລິນພອນ
ແຈັກກີ້ ສກຂຫຼວງພະບາງ.