ທ່ານ ພົນໂທ ວິໄລ ຫລ້າຄຳຟອງ ຖືກແຕ່ງຕັ້ງເປັນລັດຖະມົນຕີກະຊວງປ້ອງກັນຄວາມສະຫງົບ ຄົນໃໝ່

ສະພາແຫ່ງຊາດ: ວັນທີ່ 5 ທັນວາ 2018, ກອງປະຊຸມສະພາແຫ່ງຊາດໄດ້ມີການພິຈາລະນາຮັບຮອງແຕ່ງຕັ້ງລັດຖະມົນຕີປ້ອງກັນຄວາມສະຫງົບຜູ້ໃໝ່ຕາມໜັງສືສະເໜີຂອງທ່ານນາຍົກລັດຖະມົນຕີແຫ່ງ ສປປລາວ.”

ກອງປະຊຸມສະພາແຫ່ງຊາດໄດ້ຕົກລົງຮັບຮອງເອົາທ່ານ ພົນໂທ ວິໄລ ຫຼ້າຄຳຟອງ ເປັນລັດຖະມົນຕີກະຊວງປ້ອງກັນຄວາມສະຫງົບດ້ວຍຄະແນນສຽງ 90% ຂອງຈຳນວນສະມາຊິກສະພາແຫ່ງຊາດທີ່ເຂົ້າຮ່ວມປະຊຸມຈຳນວນ 126 ທ່ານ ໃນນັ້ນບໍ່ເຫັນດີ 09 ທ່ານເທົ່າກັບ 7% ແລະ ບໍ່ອອກສຽງ 2%;

ໃນນັ້ນໄດ້ມີການປະກອບຄຳເຫັນຕໍ່ທ່ານ ພົນໂທ ວິໄລ ຫຼ້າຄຳຟອງ ສຽງສ່ວນຫຼາຍແມ່ນສະແດງຄວາມເຫັນດີເປັນເອກະພາບຕໍ່ການສະເໜີແຕ່ງຕັ້ງ, ສະໜັບສະໜູນ ແລະ ໄວ້ວາງໃຈ ເຊື່ອໝັ້ນວ່າຈະມີອັນໃໝ່ກ້າວໜ້າໃນກຳລັງປ້ອງກັນຄວາມສະຫງົບ ພາຍຫຼັງທ່ານລັດຖະມົນຕີຄົນໃໝ່ເຂົ້າປະຕິບັດໜ້າທີ່ຕາມພາລະບົດບາດ;

ທ່ານ ພົນໂທ ວິໄລ ຫລ້າຄຳຟອງ ເລຂາທິການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ໄປເປັນລັດຖະມົນຕີກະຊວງປ້ອງກັນຄວາມສະຫງົບ ປ່ຽນແທນທ່ານ ພົນຕີ ສົມແກ້ວ ສີລາວົງ ທີ່ໄດ້ຮັບການຍົກຍ້າຍໄປຮັບໜ້າທີ່ໃໝ່ຢູ່ກະຊວງປ້ອງກັນປະເທດ.

ພາຍໃນເຊົ້າວັນນີ້, ສະມາຊິກສະພາແຫ່ງຊາດກໍມີມະຕິຮັບຮອງການແຕ່ງຕັ້ງ ທ່ານ ສອນໄຊ ສິດພະໄຊ ກຳມະການສຳຮອງສູນກາງພັກ ເປັນຜູ້ວ່າການທະນາຄານແຫ່ງ ສປປລາວ ຄົນໃໝ່ ຕາມການສະເນີຂອງນາຍົກລັດຖະມົນຕີ.