ເມືອງກະລຶມ ຫວນຄືນມູນເຊື້ອ 2 ວັນ ປະຫວັດສາດ

ຂ່າວ: ທ ອັດສະວິນ ແສງສີຈັນ

(ເມືອງກະລຶມ) ໃນວັນທີ 30 ພະຈິກ 2018 ເມືອງກະລຶມ ໄດ້ວາງດອກໄມ້ ແລະ ໃຕ້ທູບທຽນຕໍ່ໜ້າຮູບປັ້ນ ປະທານໄກສອນ ພົມວິຫານ ພ້ອມນັ້ນກໍຈັດພິທີ ປາຖະກະຖາເລົ່າຄືນມູນເຊື້ອວັນສະຖາປານາ ສປປລາວ ຄົບຮອບ 43 ປີ ວັນທີ 02 ທັນວາ 1975 – 02 ທັນວາ 2018 ແລະ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 98 ປີ 13 ທັນວາ 1920 – 13 ທັນວາ 2018 ຂື້ນຢູ່ທີ່ສະໂມສອນຂອງເມືອງ ໂດຍໃຫ້ກຽດເຂົ້າຮ່ວມຂອງ ທ່ານ ອໍບົວລາ ອ່ອນມະໄລວົງ ຮອງເລຂາພັກເມືອງ,ຮອງເຈົ້າເມືອງກະລຶມ ແລະ ມີຄະນະປະຈຳພັກ,ກຳມະການພັກ,ຫົວໜ້າ-ຮອງຫົວໜ້າຫ້ອງການ, ພະນັກງານອາວຸໂສປະຕິວັດ, ພະນັກງານ-ລັດຖະກອນ, ສອງກຳລັງປະກອບອາວຸດເຂົ້າຮ່ວມຮັບຟັງ.

ໃນພິທີ ທ່ານ ອໍບົວລາ ອ່ອນມະໄລວົງ ຍົກໃຫ້ເຫັນເຖິງການສືບທອດມູນເຊື້ອອັນອົງອາດ, ກ້າແກ່ນບໍ່ຍອມຈຳນົນ, ມີນ້ຳໃຈຄຽດແຄ້ນອັນສູງສົ່ງຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງບັນພະບູລຸດລາວໄດ້ລຸກຂຶ້ນຕໍ່ສູ້ຕ້ານກັບພວກສັກດີນາຕ່າງດ້າວ ແລະ ຈັກກະພັດລ່າເມືອງຂຶ້ນຢູ່ຫຼາຍທ້ອງຖິ່ນ ແຕ່ກໍ່ບໍ່ໄດ້ຮັບໄຊຊະນະ ຍ້ອນວ່າບໍ່ທັນມີພັກນຳພາ ແລະ ບໍ່ມີແນວທາງການຕໍ່ສູ້ທີ່ຖືກຕ້ອງ, ນັບແຕ່ພັກປະຊາຊົນປະຕິວັດລາວໄດ້ຮັບການສ້າງຕັ້ງຂື້ນ ໃນວັນທີ 22 ມີນາ 1955, ພັກໄດ້ນຳພາປະຊາຊົນບັນດາເຜົ່າ ສາມັກຄີເປັນຈິດໜຶ່ງໃຈດຽວຕໍ່ສູ້ຢ່າງພິລະອາດຫານຕ້ານການຮຸກຮານ, ແລະ ການຄອບຄອງຂອງພວກຈັກກະພັດລ່າເມືອງຂຶ້ນທັງແບບເກົ່າ ແລະ ແບບໃໝ່ ເຊິ່ງໄດ້ຮັບໄຊຊະນະເປັນກ້າວໆມາ ໃນທີ່ສຸດກໍໄດ້ຮັບໄຊຊະນະຢ່າງສົມບູນ ແລະ ສາຖາປານາ ສາທາລະນະລັດ ປະຊາທິປະໄຕ ປະຊາຊົນລາວຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ສະນັ້ນວັນທີ 2 ທັນວາ ນີ້ ແມ່ນວັນໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ເປັນພັນໆປີຂອງຊາດລາວເຮົາ,ເປັນວັນແຫ່ງການກ້າວຂຶ້ນສູ້ຍຸກສະໄໝໃໝ່ ແລະ ເປັນວັນແຫ່ງການສ້າງປະເທດລາວ ໃຫ້ມີສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ.

ຈາກນັ້ນ ທ່ານ ອຸດົມສຸກ ບຸດສວນທຽນ ຄະນະປະຈຳພັກເມືອງ,ຫົວໜ້າຄະນະໂສນາອົບຮົມເມືອງກໍໄດ້ຂື້ນເລົ່າປະຫວັດການເຄື່ອນໄຫວອັນເດັດດຽ່ວອົງອາດກ້າຫານຂອງ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງລາວເຮົາ ເຊິ່ງເນື້ອໃນໃຫ້ຮູ້ວ່າ ທ່ານ ໄກສອນ ພົມວິຫານ ເກີດເມື່ອວັນທີ 13/12/1920 ທີ່ບ້ານ ນາເຊັງ, ເມືອງ ຄັນທະບູລີ, ແຂວງ ສະຫວັນນະເຂດ, ກຳເນີດໃນຄອບຄົວທີ່ພໍ່ເປັນຂ້າລາຊະການ ແລະແມ່ເປັນຊາວນາ ທີ່ຍຶດໝັ້ນໃນຫຼັກທຳຄຳສອນຂອງພຸດທະສາສະໜາ ແລະຮີດຄອງປະເພນີລາວ, ເມື່ອອາຍຸໄດ້ 7 ປີເພິ່ນໄດ້ເຂົ້າຮຽນຊັ້ນປະຖົມພາສາລາວ ຕໍ່ມາຮຽນພາສາຝຣັ່ງ, ເພິ່ນໄດ້ຕັ້ງໃຈຮຽນ, ດຸໝັ່ນອ່ານໜັງສື, ເຄົາລົບຄູ, ຮັກແພງໝູ່ຄູ່ ແລະຮຽນໄດ້ຄະແນນດີ, ພາຍຫຼັງຈົບຊັ້ນປະຖົມພາສາຝຣັ່ງທີ່ສະຫວັນນະເຂດ ເພິ່ນໄດ້ຮຽນຕໍ່ທີ່ວິທະຍາໄລໂປຣເຕັກໂຕຣາ ( ອາລັກຂາ ) ທີ່ຮ່າໂນ້ຍປະເທດຫວຽດນາມ, ໃນຊຸມປີ 1936-1939 ເພິ່ນໄດ້ເຂົ້າຮ່ວມຂະບວນການຕໍ່ສູ້ເລັ່ງທວງເອົາສິດເສລີພາບ ແລະ ປະຊາທິປະໄຕຢູ່ນະຄອນຫຼວງຮ່າໂນ້ຍ, ເພິ່ນມັກຊອກຮຽນຮູ້ສິ່ງໃໝ່ໆ ໂດຍສະເພາະມັກອ່ານໜັງສືພິມ “ ເລິຕຣາວາຍ ” ແຮງງານ, ເຊິ່ງເປັນກະບອກສຽງຂອງພັກກອມມູນິດອິນດູຈີນ, ພ້ອມນັ້ນເພິ່ນຍັງໄດ້ຮຽນມວຍຫວຽດນາມ, ຈີນ, ຢູໂດເພື່ອປ້ອງກັນໂຕ, ປີ 1944 ເພິ່ນໄດ້ເຂົ້າຮ່ວມເປັນສະມາຊິກສະມາຄົມຊາວໜຸ່ມກູ້ຊາດຫວຽດນາມ ເຊິ່ງເປັນບາດກ້າວທຳອິດຂອງການເຂົ້າສູ່ເສັ້ນທາງປະຕິວັດ, ຕໍ່ມາໄດ້ເຂົ້າຮ່ວມຂະບວນການຢຶດອຳນາດການປົກຄອງ ຈາກກຳມືຂອງພວກຍີ່ປຸ່ນ ຢູ່ສະຫວັນນະເຂດ ໃນວັນທີ 23 ສິງຫາ 1945.

ຍ້ອນເພິ່ນໄດ້ຮັບການຝຶກຝົນຢ່າງລະອິດລະອ້ຽວ ໃນຂະບວນການປະຕິວັດ, ໃນວັນທີ 6 ມັງກອນ 1949 ໄດ້ສະໝັກເຂົ້າເປັນສະມາຊິກພັກຄອມມູນິດອິນດູຈີນ ແລະເປັນສະມາຊິກພັກ ສົມບູນໃນວັນທີ 28 ກໍລະກົດ 1949 ຕັ້ງແຕ່ນັ້ນມາ ປະທານ ໄກສອນ ໄດ້ກ້າວເດີນບົນເສັ້ນທາງອັນສະຫວ່າງສະໄຫວຂອງການປະຕິວັດຕາມລັດທິມາກ-ເລນິນ ດ້ວຍຄວາມເຊື່ອໝັ້ນອັນໜັກແໜ້ນ, ບໍ່ຫວັ່ນໄຫວຄອນແຄນຕໍ່ສິ່ງທ້າທາຍທົດສອບໃດໆ ແລະ ບໍ່ທໍ້ຖອຍ, ບໍ່ຍອມຈຳນົນຕໍ່ຄວາມຫຍຸ້ງຍາກ ແລະ ໄພຂົ່ມຂູ່ໃດໆທັງຊິ້ນ, ນັບແຕ່ກອງປະຊຸມໃຫຍ່ຄັ້ງທີ I – V ຂອງພັກ ປະທານ ໄກສອນ ໄດ້ຮັບເລືອກຕັ້ງເປັນເລຂາທິການໃຫຍ່ຄະນະບໍລິຫານງານສູນກາງພັກ ຈົນຕະຫຼອດຊີວິດຂອງເພິ່ນ ແລະໃນເດືອນ ສິງຫາ ປີ 1991 ເລືອກຕັ້ງເປັນ ປະທານປະເທດແຫ່ງ ສ.ປ.ປ ລາວ.
ແລະໃນວັນດຽວກັນນີ້ເມືອງກະລຶມໄດ້ສ້າງຂະບວນການແຂ່ງຂັນກິລາບ້ານເຕະຢ່າງເປັນຂະບວນຟົດຟື້ນ.