ງານເທດສະການບຸນເຂົ້າໄກ່ນ້ອຍຄັ້ງທີ່ 5, ພ້ອມມອບໃບຢັ້ງຢືນຖິ່ນກໍາເນີດທີ່ແຂວງຊຽງຂວາງ

ງານເທດສະການບຸນເຂົ້າໄກ່ນ້ອຍຄັ້ງທີ່ 5 ແລະ ສະເຫຼີມສະຫຼອງປີທ່ອງທ່ຽວລາວຢູ່ແຂວງຊຽງຂວາງ ໃນພິທີ່ເລີ່ມຕົ້ນຈາກການແຫ່ກ້ອນກຳລັງ ຈາກແຕ່ລະເມືອງ ກ້ອນກຳລັງຊາວໜຸ່ມ ແລະ ກ້ອນກຳລັງຊາວນາທັງໝົດ 9ກ້ອນກຳລັງ, ແຕ່ລະກ້ອນກຳລັງໄດ້ສະແດງເຖິງຄວາມເປັນເອກະລັກດ້ານວັດທະນະທຳ ແລະ ຜົນຜະລິດກະສິກຳຕາມຈຸດພິເສດຂອງແຕ່ລະເມືອງຈາກນັ້ນ ທ່ານ ບົວສອນ ສີນວນທອງ ຮອງເຈົ້າແຂວງ ແຂວງຊຽງຂວາງໄດ້ຂື້ນລາຍງານກ່ຽວກັບການກະກຽມງານເທດສະການບຸນເຂົ້າໄກ່ນ້ອຍຄັ້ງທີ 5 ແລະ ການສະເຫຼີມສະຫຼອງປີທ່ອງທ່ຽວລາວ 2018 ຢູ່ ແຂວງ ຊຽງຂວາງ

ເຊິ່ງທ່ານໄດ້ຍົກໃຫ້ເຫັນວ່າ ງານເທດສະການເຂົ້າໄກ່ນ້ອຍຈັດຂຶ້ນທຸໆປີນັບແຕ່ປີ 2014ເປັນຕົ້ນມາ ຕິດພັນກັບການຈັດຕັ້ງປະຕິບັດຈັດກິດຈະກຳການທ່ອງທ່ຽວລາວ 2018 ເຊິ່ງຈັດຂຶ້ນທ່າມກາງບັນຍາກາດທົ່ວພັກ ແລະ ປະຊາຊົນລາວບັນດາເຜົ່າເວົ້າລວມເວົ້າສະເພາະແມ່ນຊາວແຂວງຊຽງຂວາງກຳລັງສືບຕໍ່ ຕັ້ງໜ້າປະຕິບັດມະຕິກອງປະຊຸມໃຫຍ່ຄັ້ງທີ 10 ຂອງພັກເຂົ້າສູ່ຊີວິດຕົວຈິງ, ມະຕິກອງປະຊຸມໃຫຍ່ຄັ້ງທີ 7 ຂອງອົງຄະນະພັກແຂວງ ແລະແຜນພັດທະນາເສດຖະກິດສັງຄົມແຫ່ງລັດ 5 ປີ ຄັ້ງທີ 8, ແລະແຂວງ ຊຽງຂວາງພວມຮ່າງຫາກະກຽມເປັນເຈົ້າພາບຈັດງານມະຫະກຳກິລາແຫ່ງຊາດຄັ້ງທີ 11 ແລະກຽມຄວາມພ້ອມເອົາທົ່ງໄຫຫີນເປັນມໍລະດົກໂລກແຫ່ງທີ 3 ຂອງລາວ ແລະວັນສຳຄັນອື່ນໆຂອງຊາດ

ພ້ອມນີ້ທ່ານຍັງໄດ້ຍົກໃຫ້ເຫັນເຖິງຄວາມສຳຄັນຂອງເທດສະການງານບຸນເຂົ້າໄກ່ນ້ອຍ ແລະວຽກງານທ່ອງທ່ຽວຂອງແຂວງໂດຍຕິດພັນກັບບຸນຕ່າງໆ ທີ່ເປັນມູນເຊື້ອວັດທະນະທຳຮີດຄອງປະເພນີ ເອົາໃຈໃສ່ພັດທະນາແຫຼ່ງທ່ອງທ່ຽວຢ່າງເປັບຮູບປະທຳພ້ອມທັງມອບຄວາມຮັບຜິດຊອບໃຫ້ຂະແໜງການກ່ຽວຂ້ອງອອກເປັນໃຈກາງ ພ້ອມຂະຫຍາຍແລະເຄື່ອນໄຫວກິດຈະກຳໂດຍໄດ້ເຜີຍແຜ່ນະໂຍບາຍການທ່ອງທ່ຽວ, ກຳນົດແຫຼ່ງທ່ອງທ່ຽວ ທີເປັນບູລິມະສິດ ແລະເປັນທີ່ນິຍົມ ປັບປຸງແຫຼ່ງທ່ອງທ່ຽວບາງແຫ່ງ ແລະ ວຽກງານອື່ນໆ.

ທ່ານ ບຸນຕົນ ຈັນທະພອນ ເລຂາພັກແຂວງ ເຈົ້າແຂວງ ແຂວງຊຽງຂວາງໄດ້ຂື້ນກ່າວໄຂງານເທດສະການບຸນເຂົ້າໄກ່ນ້ອຍຄັ້ງທີ່ 5 ແລະສະເຫຼີມສະຫຼອງປີທ່ອງທ່ຽວລາວ 2018 ຢູ່ແຂວງຊຽງຂວາງວ່າ ການຈັດງານຄັ້ງນີ້ແມ່ນມີຄວາມໝາຍສຳຄັນເປັນພິເສດສຳລັບຊາວແຂວງຊຽງຂວາງ ເພາະວ່າໃນງານຄັ້ງນີໄດ້ມີພິທີມອບໃບຢັ້ັງຢືນຖີ່ນກຳເນີດເຂົ້າໄກ່ນ້ອຍຢູ່ແຂວງຊຽງຂວາງພ້ອມທັງເປັນການສົ່ງເສີມການທ່ອງທ່ຽວຂອງແຂວງຕື່ມອີກໂດຍແມ່ນກະຊວງວິທະຍາສາດ ແລະເຕັກໂນໂລຊີ ໄດ້ຮັບຮອງແລະອອກໃບຢັ້ງຢືນໃຫ້ເປັນທາງການແລ້ວອັນນີ້ເປັນການຢັ້ງຢືນເຊີ່ງການປົກປ້ອງຊື່ສຽງຮຽງນາມອັນລືຊື່ ຂອງເຂົ້າໄກ່ນ້ອຍທັງເປັນການປົກປ້ອງພູມປັນຍາ ຊັບສິນທາງປັນຍາຊຸມຊົນຜູ້ປູກເຂົ້າໄກ່ນ້ອຍ ທັງໝົດຢູ່ແຂວງຊຽງຂວາງ.

ສຳລັບງານສະເຫຼີມສະຫຼອງປີທອງທ່ຽວລາວປີ 2018 ນອກຈາກຈຸດປະສົງເພື່ອເປັນການຊູກຍູ້ສົ່ງເສີມການທ່ອງທ່ຽວຢູ່ແຂວງຊຽງຂວາງໃຫ້ມີບັນຍາກາດພົດຟື້ນແລ້ວພວກເຮົາມີຈຸດປະສົງເພື່ອລະດົມຈິດໃຈໃຫ້ພະນັກງານ ທະຫານຕຳຫຼວດພໍ່ແມ່ປະຊາຊົນບັນດາເຜົ່າ ໃນທົ່ວແຂວງຊຽງແຂວງ ແລະຜູ້ດຳດົງຊີວິດຢູ່ບັນດາແຂວງ ແລະ ທົ່ວປະເທດພ້ອມທັງຊາວລາວ ທັງຊາດເພື່ອກະກຽມຈິດໃຈຮັບເອົາໄຫຫີນທີ່ເປັນວັດຖຸບູຮານ ອັນລືຊື່ທີ່ ບັນພະບູລຸດຂອງພວກເຮົາໄດ້ສ້າງໄວ້ ເປັນມໍລະດົກໂລກໃນກາງປີ 2019
ຜ່ານການຈັດຕັ້ງປະຕິບັດປີທ່ອງທ່ຽວລາວເຮັດໃຫ້ນັກທ່ອງທ່ຽວເຂົ້າມາທ່ຽວຢູ່ແຂວງຊຽງຂວາງເພີ່ມຂຶ້ນໃນແຕ່ລະປີຄືປີ 2010 ມີນັກທ່ອງທ່ຽວເຂົ້າໄປແຂວງຊຽງຂວາງ 33 856 ຄົນ, ປີ 2017 ມີ 130 261ຄົນ,ປີ 2018 ມີື 144 728 ຄົນ. ສ້າງລາຍຮັບຈາກການທ່ອງທ່ຽວໄດ້ 12 ລ້ານກວ່າໂດລາ.

ໃນຕອນທ້າຍພິທີໄດ້ມີການມອບໃບຢັ້ງຢືນຖິ່ນກຳເນີດເຂົ້າໄກ່ນ້ອຍໃຫ້ການນຳແຂວງຊຽງຂວາງ ມອບໂດຍທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດແລະ ເຕັກໂນໂລຊີ ຮັບໂດຍ ທ່ານ ບຸນຕົນ ຈັນທະພອນເລຂາພັກແຂວງ ເຈົ້າ ແຂວງໆ ຊຽງຂວາງຈາກນັ້ນໄດ້ມີພິທີບາສີສູ່ຂັວນຕາມຮີດຄອງປະເພນີ ແລະ ທ່ຽວຊົມງານຕະຫຼາດນັດວາງສະແດງ ແລະຂາຍສິນຄ້າດ້ວຍບັນຍາກາດທີ່ຟົດຟື້ນ.

ຂ່າວ: ຄຳພຽນ ຈັນສະຫວັດ
ພາບ: ຄຳຜ່ອນ ໄຊອຸດົມ