“ ກິດຈະກຳ ຖາມ-ຕອບ ກ່ຽວກັບຂໍ້ມູນການປົກປັກຮັກສາມໍລະດົກໂລກ (ໂດຍໃຊ້ໂທລະສັບມືຖື)”

ໃນວັນທີ່ 05 ທັນວາ 2018 ທີ່່ຫ້ອງການ ມໍລະດົກໂລກ ຫຼວງພະບາງ ໄດ້ມີການຈັດກິດຈະກໍາ ຖາມ-ຕອບ ກ່ຽວກັບ ຂໍ້ມູນການປົກປັກຮັກສາ ມໍລະດົກໂລກ ໃຫ້ຍືນຍົງ, ໂດຍພາຍໃຕ້ການເປັນປະທານຂອງ ທ່ານ ສະເຫວີຍ ສີລາວັນ ຫົວໜ້າຫ້ອງການ ມໍລະດົກໂລກ ຫຼວງພະບາງ, ໃຫ້ກຽດເຂົ້າຮ່ວມງານໃນຄັ້ງນີ້ມີ: ທ່ານ ANDREAS ຫົວໜ້າ ກຸ່ມໂຄງການ ໃສ່ໃຈຫຼວງພະບາງ(Project Luang Prabang-Handle with Care)GIZ-EU, ລັດວິສາຫະກິດ ລາວໂທລະຄົມ, ບໍລິສັດ ສະຕ໋າໂທລະຄົມ, ບັນດາຄູອາຈານ, ສະຖາບັນ ຍຸຕິທຳພາກເໜືອ, ວິທະຍາໄລ ຄູຫຼວງພະບາງ, ວິທະຍາໄລ ການເງີນພາກເໜືອ, ວິທະຍາໄລ ໂລຫວັນ, ວິທະຍາໄລ ວິຈິດສີນ, ວິທະຍາໄລ ວິທະຍາສາດສຸຂະພາບ, ວິທະຍາໄລ ເຕັກນິກວິຊາຊີບ ຫຼວງພະບາງ ແລະ ອ້າຍນ້ອງພະນັກງານທັງໝົດ ຫ້ອງການມໍລະດົກ ກໍ່ເຂົ້າຮ່ວມງານ ເຊີ່ງລວມທັງໝົດມີ 250 ຄົນ, ຍີງ 80 ຄົນ.

ຈຸດປະສົງໃນການຈັດງານໃນຄັ້ງນີ້: ເພື່ອເປັນການສະເຫຼີມສະຫຼອງ ຫຼວງພະບາງ ເຂົ້າເປັນເມືອງມໍລະດົກໂລກ ຄົບຮອບ 23 ປີ ແລະ ເພື່ອເປັນການປຸກລະດົມ ໃຫ້ປະຊາຊົນ ຊາວຫຼວງພະບາງ ມີສ່ວນຮ່ວມ ເຂົ້າໃນການປົກປັກຮັກສາ ມໍລະດົກໂລກ ຫຼວງພະບາງໃຫ້ຍືນຍົງ. ນອກນັ້ນພາຍໃນງານ ໄດ້ມີການຈັດກິດຈະກຳເສີມເຊັ່ນ: ຮ້ອງເພັງ, ຊົມລາຍການຟ້ອນລວມໝູ່, ຫຼີ້ນເກມທາງໂທລະສັບມືຖືກ່ຽວກັບຂໍ້ມູນມໍລະດົກ ຢ່າງເປັນຂະບວນຟົດຟື້ນ ແລະ ກິດຈະກຳດຳເນີນມາຮອດເວລາ 12:00 ນາທີ ກໍ່ໄດ້ສີ້ນສຸດລົງ.