ງາຊ້າງຂອງແທ້ ຫລື ຂອງປອມ ມີວິທີການເບິ່ງແນວໃດ…

0
155

ງາຊ້າງ (Ivory) ເປັນສ່ວນປະກອບໜຶ່ງຂອງຊ້າງ ບາງທ່ານອາດຈະບໍ່ຮູ້ວ່າງາຊ້າງແມ່ນຫຍັງກັນແທ້ ຄຳຕອບກໍ່ຄື ງາຊ້າງແມ່ນແຂ້ວໜ້າຂອງຊ້າງທີ່ປົ່ງອອກມາຈາກຄາງກະໄຕເບື້ອງລະຂ້າງ ຈະປະກົດອອກມາໃຫ້ເຫັນເມື່ອຊ້າງມີອາຍຸ 2 ປີຂຶ້ນໄປ, ມີລັກສະນະຍາວ, ແຫລມ ແລະ ສີເຫລືອງອ່ອນ ຫລື ສີໄຂ່.

ງາຊ້າງໄດ້ຮັບຄວາມນິຍົມເອົາມາເຮັດເຄື່ອງປະດັບ, ເຄື່ອງລາງຂອງຂັງ ແລະ ເຄື່ອງຕົກແຕ່ງພາຍໃນບ້ານເຮືອນ, ມີລາຄາແພງ ເຊິ່ງເນື່ອງຈາກຄວາມນິຍົມ ແລະ ລາຄາແພງນີ້ ຈຶ່ງເຮັດໃຫ້ເກີດການປອມງາຊ້າງຂຶ້ນມາ ເພື່ອເອົາມາຂາຍເປັນຂອງແທ້ໃນລາຄາແພງ.

ມື້ນີ້ພວກເຮົາມີວິທີພິສູດວ່າງາຊ້າງ ຫລື ສິ່ງທີ່ເຮົາສົນໃຈນັ້ນເຮັດມາຈາກງາຊ້າງແທ້ຫລືບໍ່ມາແນະນຳທ່ານ.

– ໃຊ້ລວດ ຫລື ຕະປູລົນໄຟໃຫ້ແດງ ແລ້ວຈີ້ໃສ່ງາຊ້າງ ຖ້າເປັນຂອງແທ້ ງາຊ້າງນັ້ນຈະເປັນພຽງແຕ່ຈຸດດຳນ້ອຍໆ ແຕ່ຖ້າເປັນຂອງປອມຈະຊອດເຂົ້າໄປໃນຊີ້ນຂອງງາຊ້າງໄດ້ຢ່າງງ່າຍດາຍ.

– ງາຊ້າງແທ້ຈະໜັກ ແລະ ເນື້ອແໜ້ນຫລາຍ ສ່ວນຂອງປອມຈະເບົາ.

– ງາຊ້າງຂອງແທ້ຈະມີລວດລາຍຢູ່ຜິວ, ແຕ່ຂອງປອມຈະບໍ່ມີ.

– ເອົາງາຊ້າງໄປຖູໃສ່ແວ່ນ ຖ້າແມ່ນຂອງແທ້ຈະເກີດຮອຍສີດຳຂອງກາກບອນຕິດຢູ່ແວ່ນ.

– ເອົາຜ້າຈຸ່ມນຳ້ສະບູແລ້ວພັນອ້ອມງາຊ້າງ ເອົາໄປຕາກແດດຈົນເກີດຄາບສະບູ ຖ້າເປັນຂອງແທ້ເມື່ອເຮົາເຊັດ ຄາບສະບູຈະຫາຍໄປ ງາຊ້າງກໍ່ຈະງາມຄືເກົ່າ.

– ເອົາງາຊ້າງໄປລົນໄຟ ຂອງແທ້ຈະບໍ່ດຳ ແລະ ບໍ່ຕິດໄຟ.

– ຖ້າເບິ່ງພາບຕັດທາງຂວາງ ງາຊ້າງຂອງແທ້ຈະມີທໍ່ ຫລື ຮູນ້ອຍໆຫລວງຫລາຍ.

ເປັນແນວໃດແດ່ ວິທີເບິ່ງງາຊ້າງຂອງແທ້ບໍ່ຍາກປານໃດແມ່ນບໍ່, ແຕ່ທາງທີ່ດີຢ່າຊື້ງາຊ້າງແທ້ຈະດີທີ່ສຸດ ເພາະງາຊ້າງທີ່ທ່ານກຳລັງສົນໃຈໝາຍເຖິງ 1 ຊີວິດຂອງຊ້າງທີ່ຕ້ອງສູນເສຍໄປ ຍິ່ງຖ້າງາຊ້າງໄດ້ຮັບຄວາມນິຍົມກໍ່ຍິ່ງເຮັດໃຫ້ເກີດການລ່າຊ້າງເພື່ອເອົາງາຫລາຍຂຶ້ນ ຖ້າບໍ່ຊ່ວຍກັນປ້ອງກັນ ໃນວັນຂ້າງໜ້າລູກຫລານຂອງເຮົາຄົງໄດ້ເຫັນຊ້າງພຽງແຕ່ໃນຮູບຖ່າຍ ຫລື ໃນຮູບແຕ້ມເທົ່ານັ້ນ ຈົ່ງຊ່ວຍກັນອະນຸລັກຊ້າງໄວ້ດີກ່ວາ.