ປຸກລະດົມຫລີກລ່ຽງການນຳໃຊ້ປຼາສຕິກ ໃນຂະແໜງການທ່ອງທ່ຽວ

0
193

ສະມາຄົມທຸລະກິດໂຮງແຮມ ແລະ ຮ້ານອາຫານລາວ ຮ່ວມກັບສະມາຄົມທຸລະກິດ ທ່ອງທ່ຽວລາວ ໄດ້ຈັດງານ ພົບປະແລກປ່ຽນຂໍ້ມູນ ກ່ຽວກັບການປຸກລະດົມ ຫຼີກລ່ຽງການນໍາໃຊ້ ປຼາສຕິກ ໃນຂະແໜງການທ່ອງທ່ຽວ, ໂດຍການເຂົ້າຮ່ວມ ຂອງທ່ານ ປະກາສິດ ຈັນທະປັນຍາ ຮອງປະທານສະມາຄົມໂຮງແຮມ ແລະ ຮ້ານ ອາຫານລາວ, ທ່ານນາງ ທຸຍເຟືອງ ທີ່ປືກສາໂຄງການໃສ່ໃຈຫຼວງພະບາງ, ມີບັນດາຫົວໜ້າພະແນກ ຖວທ ນະຄອນຫຼວງວຽງຈັນ, ຜູ້ຊ່ຽວຊານຈາກໂຄງການໃສ່ໃຈຫຼວງພະບາງ, ຜູ້ຕາງໜ້າໂຮງແຮມຕ່າງໆເຊີນເຂົ້າຮ່ວມນຳດ້ວຍ.


ທ່ານ ປະກາສິດ ຈັນທະປັນຍາ ກ່າວວ່າ: ໃນປັດຈຸບັນ ນັກທ່ອງທ່ຽວຈາກທົ່ວໂລກມີຈຳນວນເພີ່ມຂຶ້ນຫຼາຍ ຊຶ່ງພວກເຂົາໄດ້ເຂົ້າມາມີບົດບາດໃນການເລືອກບ່ອນພັກ, ຮ້ານອາຫານ ແລະ ບໍລິສັດທ່ອງທ່ຽວທີ່ໃຫ້ການບໍລິການທີ່ເປັນມິດຕໍ່ສິ່ງແວດລ້ອມ ຫຼື ເລືອກທີ່ຈະບໍລິໂພກອາຫານປອດສານພິດຫຼາຍຂຶ້ນ. ສະນັ້ນ, ການລົງທຶນໃສ່ການທ່ອງທ່ຽວແບບຍືນຍົງ ຈິ່ງບໍ່ພຽງແຕ່ແມ່ນສິ່ງຈຳເປັນເທົ່ານັ້ນ, ແຕ່ຍັງມີປະໂຫຍດອີກດ້ວຍ, ດັ່ງນັ້ນ, ທຸລະກິດຫຼາຍແຫ່ງພາຍໃນນະຄອນຫຼວງວຽງຈັນ ກໍ່ຄືທົ່ວປະເທດ ແລະທົ່ວພາກພື້ນ ຕ່າງກໍ່ຫັນເປັນທຸລະກິດ “ທີ່ມີຄວາມຮັບຜິດຊອບຕໍ່ສິ່ງແວດລ້ອມ ແລະ ສັງຄົມ’’. ໜຶ່ງໃນບັນຫາທ້າທາຍໃຫຍ່ຫຼວງທີ່ສຸດ ກ່ຽວກັບສິ່ງແວດລ້ອມໃນ ປັດຈຸບັນແມ່ນຂີ້ເຫຍື້ອທີ່ເປັນປຼາສຕິກ ຊຶ່ງເຮັດໃຫ້ເກີດມົນລະພິດກັບດິນ, ແມ່ນໍ້າ ແລະ ອາກາດ (ເມື່ອຖືກເຜົາໄໝ້). ບັນຫາດັ່ງກ່າວບໍ່ພຽງ ແຕ່ເປັນບັນຫາທີ່ກະທົບຕໍ່ ພາກສ່ວນຂະແໜງການທ່ອງທ່ຽວ ຫຼື ຂະແໜງການໃດໜຶ່ງເທົ່ານັ້ນ, ແຕ່ເປັນ ບັນຫາທີ່ທຸກພາກສ່ວນຕ້ອງຕື່ນໂຕ ແລະ ຫັນມາໃຫ້ການເອົາໃຈໃສ່ແກ້ໄຂຢ່າງຈິງຈັງ.


ທ່ານກ່າວອີກວ່າ: ການສ້າງຈຸດເລີ່ມຕົ້ນທີ່ດີຈາກທຸກພາກສ່ວນຈະເປັນການ ປົກປັກຮັກສາສິ່ງແວດ ລ້ອມທີ່ດີ ແລະ ສ້າງເມືອງທ່ອງທ່ຽວທີ່ສະອາດໃຫ້ ແກ່ນະຄອນຫຼວງ ກໍ່ຄືທົ່ວປະເທດລາວເຮົາ.
ທີ່ມາ: ລາວພັດທະນາ