ແຂວງຫຼວງພະບາງເປີດງານບຸນນໍເປເຈົາປະຈໍາປີ 2018-2019 ຢ່າງມ່ວນຊື່ນ

ວັນທີ 10 ທັນວາ 2018 ຢູ່ທີ່ບ້ານວັງເງິນ ນະຄອນຫຼວງພະບາງ ແຂວງຫຼວງພະບາງ ສະມາຄົມຊ່ວຍເຫຼືອເຊິ່ງກັນ ແລະ ກັນຂອງເຜົ່າມົ້ງແຂວງຫຼວງພະບາງ ໄດ້ຈັດງານສົ່ງທ້າຍປີເກົ່າຕ້ອນຮັບປີໃໝ່ ຫຼື ບຸນນໍເປເຈົາ ໂດຍໃຫ້ກຽດເຂົ້າຮ່ວມຂອງທ່ານ ຄໍາຂັນ ຈັນທະວີສຸກ ເລຂາພັກແຂວງ,ເຈົ້າແຂວງຫຼວງພະບາງ,ທ່ານ ສຸກັນ ບຸນຍົງ ເຈົ້ານະຄອນຫຼວງພະບາງ,ມີຄະນະປະຈໍາພັກແຂວງ,ກໍາມະການພັກເມືອງ,ປະທານແນວາລາວສາງຊາດແຂວງ,ອາດິດການນຳແຂວງ,ເມືອງ ແລະ ພະນັກງານບຳນານ,ຕາງໜ້າເຜົ່າລາວ ແລະ ເຜົ່າກຶມມຸ ພ້ອມດ້ວຍປະຊາຊົນຊາວເຜົ່າມົ້ງ ເຂົ້າຮ່ວມຢ່າງພ້ອມພຽງ.

ບຸນປະຈຳປີຂອງເຜົ່າມົ້ງ ແມ່ນງານສົ່ງທ້າຍປີເກົ່າຕ້ອນຮັບປີໃໝ່,ເປັນສັນຍາລັກແຫ່ງຄວາມສາມັກຄີ,ຄວາມຜູກໝັ້ນໃນວົງສາຄະນາຍາດຂອງປະຊາຊົນເຜົ່າມົ້ງທີ່ຢູ່ຫ່າງໄກໄດ້ມາພົບປະສ້າງສັນ ແລະ ເພື່ອເຮັດພິທີກຳລະນຶກເຖິງບັນພະບູລຸດຂອງວົງສາຄະນະຍາດຕົນ ເຊິ່ງເຈົ້າກົກເຈົ້າເລົ່າ ໄດ້ນຳພາຊາວເຜົ່າມົ້ງຈັດງານບຸນນໍເປເຈົາ ທີຍິ່ງໃຫຍ່ຂື້ນມາແຕ່ດົນນານ ແລະ ມີຄວາມໝາຍຄວາມສຳຄັນທີ່ສ່ອງແສງເຖິງຮິດຄອງປະເພນີ, ວັດທະນະທຳອັນດີງາມຂອງຊົນເຜົ່າໃນລາວ ໂດຍສະເພາະແມ່ນເຜົ່າມົ້ງ,ເຊິ່ງມີເອກະລັກສະເພາະຂອງເຜົ່າເຊັ່ນ: ການໂຍນໝາກຄອນ,ເປົ່າແຄນ,ການຂັບລຳ,ຍິງໜ້າເກັກ,ຕີໝາກຂ່າງ,ເປົ່າຂຸ່ຍ ແລະ ເປົ່າໃບໄມ້.
ທ່ານ ໄຊສຸລືເຮີ ປະທານສະມາຄົມຊ່ວຍເຫຼືອເຊິ່ງກັນ ແລະ ກັນເຜົ່າມົ້ງແຂວງຫຼວງພະບາງ ໄດ້ກ່າວວ່າ: ການຈັດງານນີ້ແມ່ນເພື່ອສະຫຼຸບຜົນສຳເລັດການຈັດຕັ້ງປະຕິບັດວຽກງານຮອບດ້ານໃນໄລຍະ 1 ປີຜ່ານມາ ຂອງຊາວເຜົ່າມົ້ງ

ພ້ອມທັງວາງທິດທາງແຜນການໃສ່ຊຸມປີຕໍ່ໄປ,ເພື່ອເປັນບ່ອນອິງໃຫ້ແກ່ແຜນພັດທະນາເສດຖະກິດ ແລະ ສັງຄົມ ໃຫ້ມີການຂະຫຍາຍຕົວຢ່າງຕໍ່ເນື່ອງ ເຮັດໃຫ້ຊີວິດການເປັນຢູ່ຂອງປະຊາຊົນທຸກຊັ້ນຄົນ,ມີວຽກເຮັດງານທຳອັນແນ່ນອນ,ສ້າງລາຍຮັບເຂົ້າສູ່ຄອບຄົວໃຫ້ນັບມື້ຫຼາຍຂື້ນ,ເພື່ອຫຼຸດພົ້ນອອກຈາກຄອບຄົວທຸກຍາກກາຍເປັນຄອບຄົວຮັ່ງມີເທື່ອລະກ້າວ ແລະ ສ້າງຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນໃຫ້ແໜ້ນແຟ້ນ,ພ້ອມກັນປົກປັກຮັກສາຮີດຄອງປະເພນີ ແລະ ວັດທະນະທຳ ອັນດີງາມຂອງເຜົ່າ,ຂອງຊາດໃຫ້ຍືນຍົງຄູ່ກັບເຜົ່າມົ້ງຕະຫຼອດໄປ,ທັງເປັນການສົ່ງເສີມການທ່ອງທ່ຽວ,ດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມແຂວງຫຼວງພະບາງໃຫ້ນັບມື້ຫຼາຍຂື້ນ.

ໂດຍສະເພາະເຜົ່າມົ້ງທີ່ອາໄສຢູ່ຂອບເຂດເທດສະບານແມ່ນໄດ້ປະກອບອາຊີບຕາມຄວາມເໝາະສົມ ເປັນຕົ້ນແມ່ນ ການບໍລິການຄ້າຂາຍ,ປູກຝັງ-ລ້ຽສັດ ແລະ ເຮັດຫັດຖະກຳຖັກແສ່ວ,ໂດຍອິງໃສ່ທ່າແຮງ ແລະ ຄວາມຕ້ອງການຂອງປະຊາຊົນ.ປະຈຸບັນໄດ້ສ້າງກອງທຶນຊ່ວຍເຫຼືອເຊິ່ງກັນ ແລະ ກັນມາແຕ່ປີ 1996,ປະຈຸບັນມີສະມາຊິກ 1.375 ຄອບຄົວ,ໃນນັ້ນລວມມີ ເຜົ່າກຶມມຸ 22 ຄອບຄົວ ແລະ ເຜົ່າລາວ 33 ຄອບຄົວ,ແບ່ງເປັນ 30 ໜ່ວຍຄຸ້ມຄອງ,ຢູ່ໃນ 1 ນະຄອນ 3 ເມືອງຄື: ນະຄອນຫຼວງພະບາງ,ເມືອງຊຽງເງິນ,ເມືອງປາກອູ, ແລະ ເມືອງໂພນໄຊ.ສະເພາະຊາວມົ້ງອາໄສຢູ່ນະຄອນຫຼວງພະບາງ ທັງໝົດ 1.192 ຄອບຄົວ,ມີ 9.826 ຄົນ,ຍິງ 4.633 ຄົນ.

ໂອກາດນີ້ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ກໍ່ໄດ້ຂື້ນກ່າວອວຍພອນປີໃໝ່ຕໍ່ພິທີ ໂດຍສະເພາະ ກໍ່ແມ່ນຊາວເຜົ່າມົ້ງ ເຊິ່ງມີບາງຕອນທ່ານກ່າວວ່າ: ໃນນາມຕາງໜ້າໃຫ້ຄະນະພັກ, ສະພາປະຊາຊົນ, ອົງການປົກຄອງແຂວງ ແລະ ສ່ວນຕົວຂໍອວຍພອນໄຊອັນປະເສີດໃຫ້ແກ່ພີ່ນ້ອງປະຊາຊົນເຜົ່າມົ້ງ ແລະ ບັນດາເຜົ່າທົ່ວແຂວງຫຼວງພະບາງຈົ່ງມີສຸຂະພາບແຂງແຮງ, ອາຍຸໝັ້ນຍືນຍາວ, ເປັນຫຼັກແຫຼ່ງໃນການເຕົ້າໂຮມຄວາມສາມັກຄີປອງດອງປະຊາຊົນໃຫ້ເປັນປຶກແຜ່ນແໜ້ນໜາເພື່ອພ້ອມກັນປົກປັກຮັກສາ, ສ້າງສາພັດທະນາປະເທດຊາດ ແລະ ພັດທະນາແຂວງຫຼວງພະບາງໃຫ້ກ້າວຂື້ນຢ່າງບໍ່ຢຸດຢັ້ງ,ຂໍອວຍພອນໄຊໃຫ້ບຸນກິນຈຽງຂອງພີ່ນ້ອງເຜົ່າມົ້ງຈົ່ງເປັນບຸນແຫ່ງຄວາມເບີກບານມ່ວນຊື່ນ, ເປັນບຸນແຫ່ງຄວາມສຸກສົມຫວັງ,ຄວາມຄິດຮອດຄິດເຖິງ,ຄວາມຮັກໄຄ່ໄມຕີຂອງປະຊາຊົນບັນດາເຜົ່າໃນທົ່ວແຂວງ,ເປັນບຸນປະເພນີແຫ່ງປີສ້າງທ່ວງທ່າ ແລະ ບາດກ້າວໃໝ່ເພື່ອຍົກລະດັບຊີວິດການເປັນຢູ່ຂອງຕົນເອງ,ຄອບຄົວໃຫ້ຫຼຸດພົ້ນອອກຈາກຄວາມທຸກຍາກກ້າວໄປເຖິງຄອບຄົວທີ່ຮັ່ງມີກາຍເປັນຕົວແບບທີ່ດີເດັ່ນຂອງບ້ານ, ເມືອງ,ຂອງແຂວງ ແລະ ພ້ອມກັນຈັດຕັ້ງປະຕິບັດແນວທາງນະໂຍບາຍຂອງພັກໃຫ້ປະກົດຜົນເປັນຈິງ,ຍົກສູງສະຕິຊາດ,ເຊີດຊູນໍ້າໃຈຮັກຊາດ,ຮັກລະບອບໃໝ່,ຮັກບ້ານເກີດເມືອງນອນ,ຮັກວັດທະນະທໍາພ້ອມກັນເຄົາລົບ ແລະ ປະຕິບັດລະບຽບກົດໝາຍຢ່າງເຂັ້ມງວດ.

ໃນພິທີກໍ່ໄດ້ຮັບຊົມການສະແດງສິລະປະວັນນະຄະດີຈາກໜ່ວຍສິລະປະມົ້ງແຕ່ລະບ້ານ ເປັນຕົ້ນແມ່ນ ການຟ້ອນ,ການເຕັ້ນ,ການເປົ່າປີ່-ເປົ່າແຄນ ທີ່ເປັນເອກະລັກສະເພາະຊົນເຜົ່າມົ້ງ ໃຫ້ຜູ້ເຂົ້າຮ່ວມໄດ້ຮັບຊົມ,ພ້ອມນີ້ບັນດາການນໍາກໍໄດ້ຮ່ວມປະຕິບັດຕົວຈິງຂອງການຕໍາເຂົ້າປາປາ ແລະ ໂຍນໝາກຄອນ ທ່າມກາງສຽງແຄນ ແລະ ສຽງປີ່ຮ່ວມກັນຢ່າງເບີກບານມ່ວນຊື່ນ.ງານບຸນນໍເປເຈົາແມ່ນຈະໄດ້ຈັດໄປເປັນເວລາ 5 ວັນຈິ່ງສໍາເລັດ.

ຂ່າວ: ເພັດສາຄອນ ສິມມະວົງ