ນາຍົກ ເຂົ້າຮ່ວມ ສະຫລອງວັນສ້າງຕັ້ງ ສຳນັກຂ່າວສານ ປະເທດລາວຄົບຮອບ 50 ປີ ຢ່າງຄຶກຄື້ນ

ພິທີ​ ສະ​ເຫລີ​ມສະຫລອງ ວັນ​ສ້າງ​ຕັ້ງສຳນັກ​ຂ່າວສານ ​ປະ​ເທດ​ລາວຄົບຮອບ 50 ປີ(06/01/ 1968-06/01/2018) ​​ໄດ້​ ຈັດຂຶ້ນ ​ໃນ​ ວັນ​ທີ 9 ພຶດສະພາ 2018, ໂດຍ​ການໃຫ້ກຽດ​ເຂົ້າ​ຮ່ວມ​ຂອງ ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ  ນາຍົກລັດຖະມົນຕີ ແຫ່ງ ສປປ ລາວ, ທ່ານ  ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມບັນດາພະນັກງານ-​ລັດຖະກອນ ສຳນັກ​ ຂ່າວສານ​ປະ​ເທດ​ລາວ ​ແລະ ແຂກຖືກ​ເຊີນ​ ເຂົ້າ​ຮ່ວມ​ຢ່າງ​ຫລວງຫລາຍ.

​ໃນ​ໂອກາດ​ດັ່ງກ່າວ, ທ່ານ ສູນ​ທອນ ຄັນທະ​ວົງ ອຳນວຍການໃຫຍ່ ສຳນັກຂ່າວສານປະເທດລາວ ​ໄດ້​ຍົກ​ໃຫ້​ເຫັນມູນເຊື້ອ ແຫ່ງການກໍ່ສ້າງ ແລະ ເຕີບໃຫຍ່ ຂະຫຍາຍຕົວ ຂອງ ຂ່າວສານປະເທດລາວ ຕະຫລອດໄລຍະ 5 ທົດສະວັດ ຜ່ານມາ ທີ່ຕິດພັນ ຢ່າງສະໜິດແໜ້ນ ກັບພາລະກິດປະຕິວັດ ໃນ ແຕ່ລະໄລຍະ ແລະ ມູນເຊື້ອແຫ່ງນ້ຳໃຈຕໍ່ສູ້ ອັນເດັດດ່ຽວ, ບຸກບືນຜ່ານຜ່າຄວາມຫຍຸ້ງຍາກນາໆ ປະການ ຂອງປະຊາຊົນລາວບັນດາເຜົ່າ ພາຍໃຕ້ການນຳພາ ຂອງພັກ ປະຊາຊົນ ປະຕິວັດລາວ. ທ່ານ ​ສູນ​ທອນ ຄັນທະ​ວົງ ກ່າວ​ວ່າ: ກ່ອນ​ນີ້ 50 ປີ ເຖິງຈະມີຄວາມຫຍຸ້ງຍາກ ປານໃດກໍຕາມ, ​ແຕ່ດ້ວຍຄວາມຮັບຜິດຊອບຕໍ່ພາລະບົດບາດ ຂອງຕົນ ນັບແຕ່ມື້ສ້າງຕັ້ງຂຶ້ນ ຂ່າວສານປະເທດລາວ ໄດ້ມີສາຂາຂ່າວ ປະຈຳຢູ່ ບາງ ແຂວງເຊັ່ນ: ແຂວງຊຽງຂວາງ, ສະຫວັນນະເຂດ, ຄຳມ່ວນ, ອຸດົມໄຊ ແລະ ແຂວງຕາເວັນອອກ (ແຂວງເຊກອງ ໃນປັດຈຸບັນ). ພ້ອມກັນນີ້, ກໍມີໜ່ວຍຂ່າວເຄື່ອນໄຫວເກັບກຳ ຂ່າວຢູ່ເຂດເມືອງວຽງໄຊ ແລະ ທົ່ວແຂວງຫົວ ພັນ, ທັງອອກເຄື່ອນໄຫວເກັບກຳຂ່າວ ຢູ່ຕ່າງແຂວງ ​ແລະ ບ່ອນທີ່ມີສະໜາມຮົບ ອັນດຸເດືອດ ເຊັ່ນ: ບັ້ນຮົບຜາຖີ່ (ແຂວງຫົວພັນ), ບັ້ນຮົບນ້ຳບາກ (ແຂວງຫລວງພະບາງ) ບັ້ນຮົບ ກູ້ກຽດ, ທະນົງກຽດ (ແຂວງຊຽງ ຂວາງ), ບັ້ນຮົບລາມເຊີນ 719 (ແຂວງສະຫວັນນະເຂດ) ບັ້ນຮົບສາມສອນ, ສອນໄຊ (ຄຳມ່ວນ) ບັ້ນ ຮົບຕ່າງໆ ຢູ່ແຂວງ ສາລະວັນ, ປາກຊ່ອງບໍລະເວນ, ເລົ່າງາມ ແລະ ອື່ນໆ.

ພາຍຫລັງ ປະເທດຊາດໄດ້ຮັບການປົດປ່ອຍ, ໂຄງປະກອບການຈັດຕັ້ງ  ສຳນັກຂ່າວສານປະເທດລາວ ໄດ້ມີການປ່ຽນແປງ, ວິທະຍຸກະຈາຍສຽງ ໄດ້ແຍກອອກໄປເປັນຄະນະອຳນວຍການ ຕ່າງຫາກ.   ຂ່າວສານປະເທດລາວ ໄດ້ມີການປັບປຸງ ຫລາຍດ້ານແບບກ້າວກະໂດດຂັ້ນ, ຈຳນວນພະນັກງານ ໄດ້ເພີ່ມ ຂຶ້ນຢ່າງຫລວງຫລາຍ. ຫລັງຈາກການຈັດຕັ້ງ ເປັນຮູບເປັນຮ່າງເຂົ້າ ສູ່ລະບົບແລ້ວ ກໍໄດ້ສືບຕໍ່ພິມໃບຂ່າວລາຍວັນ ເປັນພາສາລາວ, ໃບຂ່າວຄົ້ນຄວ້າ, ໃບຂ່າວພາສາຝຣັ່ງ, ພາສາອັງກິດ. ນັບແຕ່ປີ 2001 ເປັນ ຕົ້ນມາ,  ສໍານັກຂ່າວສານ ປະເທດລາວ ໄດ້​ເພີ່ມ​ຜະລິດ​ຕະພັນ ຈັດ​ພິມໜັງສື​ພິມ​ປະ​ເທດ​ລາວ ​ແລະ ສືບຕໍ່ປະກອບສ່ວນ ຢ່າງຕັ້ງໜ້າ ເຂົ້າໃນການດຳເນີນວຽກງານ ຕາມພາລະບົດບາດ ແລະ ໜ້າທີ່ຂອງຕົນ ຢູ່ໃນເງື່ອນໄຂ ພາຍໃນ ແລະ ສາກົນທີ່ຜັນແປໄປຢ່າງສັບສົນ, ເຊິ່ງມີທັງກາລະໂອກາດດີ ແລະ ສິ່ງທ້າທາຍຫລາຍຢ່າງ.  ອັນໄດ້ເຮັດໃຫ້ສຳນັກຂ່າວສານ ໄດ້ມີການປັບປຸງ, ຍົກສູງຄຸນນະພາບ ແລະ ພັດທະນາດີຂຶ້ນ ເປັນກ້າວໆມາ.

ໄລຍະປີ 2012-2017 ໄດ້ດຳເນີນການປັບປຸງໂຄງປະກອບ ກົງຈັກການຈັດຕັ້ງ ຢ່າງຕໍ່ເນື່ອງ ໃຫ້ ສອດຄ່ອງ, ແທດເໝາະກັບເງື່ອນໄຂຕົວຈິງ ຂອງການພັດທະນາເຕັກນິກ ແລະ ຂະຫຍາຍຜະລິດຕະພັນ ໃຫ້​ຫລາຍ​ຂຶ້ນ, ເຊິ່ງມາຮອດປັດຈຸບັນ ໄດ້ ມີ ເວບໄຊ www.kpl.gov.la ເປັນ 3 ພາສາ ລາວ, ອັງກິດ ແລະ ຝຣັ່ງ; ໃບຂ່າວພາຍໃນປະເທດ ແລະ ຂ່າວໂລກ ທີ່ເປັນພາສາລາວລາຍວັນ ອອນລາຍ; ໃບຂ່າວ ຄົ້ນຄວ້າລາຍວັນ; ໜັງສືພິມປະເທດລາວ ລາຍວັນ; ວາລະສານປະເທດລາວ ລາຍໄຕມາດ; ຮູບພາບ-ສຳເນົາ ສຳຫລັບການໂຄສະນາ ແລະ ອື່ນໆ. ພ້ອມ​ນີ້, ຍັງ​ມີສື່ອອນລາຍ ປະເທດລາວ (Facebook), ຄລິບວີດີໂອ ຂ່າວພາສາລາວ ຜ່ານເຄືອຂ່າຍອິນເຕີເນັດ ແລະ ບໍລິການ SMS ຜ່ານເຄື່ອຂ່າຍໂທລະສັບ ຂອງບໍລິສັດລາວໂທລະຄົມ.

​​ໃນໂອກາດດຽວກັນ, ທ່ານ ນາຍົກລັດຖະມົນຕີ ທອງ​ລຸນ​ສີ​ສຸ​ລິດ ​ໄດ້​ໃຫ້ກຽດ​ໂອ້​ລົມຊີ້​ນຳ  ຕໍ່ຄະນະ​ນຳ ​ແລະ ພະນັກງານ-ລັດຖະກອນ, ​ໂດຍ​ເນັ້ນສືບຕໍ່ ປະຕິບັດບົດບາດ ຂອງສຳນັກຂ່າວສານ ໃນໄລຍະໃໝ່ ​ໃນ​ຖານະເປັນອົງການຂ່າວທາງການ ຂອງລັດຖະບານ ​ໃຫ້​ມີ​ຄຸນ​ນະພາ​ບ, ວ່ອງ​ໄວ ​ແລະ ທັນ​ເຫດການ, ​ທັງຮັບປະກັນ 4 ລັກສະນະຂອງສື່ມວນຊົນ ປະຕິວັດ ​ແລະ ​ເພື່ອ ​ຢາກ​ປະຕິບັດ​ໄດ້​ແນວ​ນັ້ນ, ສຳນັກ​ຂ່າວສານ ​ປະ​ເທດ​ລາວ ຕ້ອງ​ໄດ້​ເອົາ​ໃຈ​ໃສ່ ​ປັບປຸງ​ກໍ່ສ້າງ​ ຖັນ​ແຖວ​ພະນັກງານ ​ນັກຮົບ​ຂອງ​ຕົນ ໃຫ້ມີຄວາມຮູ້, ຄວາມ​ສາມາດ, ມີ​ຄຸນສົມບັດ ແລະ ມີຈັນ​ຍາ​ບັນ ​ເຮັດໜ້າທີ່​ ເປັນ​ກະບອກ​ສຽງອັນ​ແຫລມ​ຄົມ​ຂອງ​ພັກ ​ແລະ ລັດຖະບານ. ພ້ອມ​ທັງມີຄວາມຮູ້ ດ້ານພາສາຕ່າງປະເທດ ໃນລະດັບອັນແນ່ນອນ ​ແລະ ສິ່ງ​ສຳຄັນ​ອີກ​ອັນໜຶ່ງ  ຕ້ອງຊຸກຍູ້ການສ້າງ ແລະ ຂະຫຍາຍຕາໜ່າງຂ່າວ ຂອງຂ່າວສານປະເທດລາວ ໃຫ້ຄວບຄຸມ ໃນຂອບເຂດທົ່ວປະເທດ.

ທ່ານນາຍົກລັດຖະມົນຕີ ຢ້ຳຕື່ມ​ວ່າ:  ສຳນັກຂ່າວສານ ຕ້ອງບຸກບືນຊຸກຍູ້, ສົ່ງເສີມ ແລະ ຂະຫຍາຍການພົວພັນ ແລະ ຮ່ວມມືແລກປ່ຽນຂໍ້ມູນຂ່າວສານ ກັບສຳນັກຂ່າວສານ ບັນດາປະເທດເພື່ອນມິດ ຍຸດທະສາດ, ລວມທັງສະມາຊິກ ປະຊາຄົມອາຊຽນ, ພາກພື້ນ ແລະ ໃນໂລກ ເພື່ອຍາດແຍ່ງເອົາການຮ່ວມມື, ການສະໜັບສະໜູນ ຊ່ວຍເຫລືອ ​ແລະ ປະສົບການໃຫ້ຫລາຍຂຶ້ນ.

​ໃນ​ໂອກາດ​ ອັນ​ສະຫງ່າ​ລາສີ​ນີ້, ທ່ານ ລັດຖະມົນຕີ ບໍ່​ແສງ​ຄຳ ວົງ​ດາລາ ​ໄດ້​ຕາງໜ້າລັດຖະບານ ປະດັບ​ຫລຽນ​ໄຊ ​ອິດສະຫລະຊັ້ນ I ​ໃຫ້​ສຳນັກ​ຂ່າວສານ​ ປະ​ເທດ​ລາວ ຢ່າງ​ສົມ​ກຽດ ​ເພື່ອ​ສະ​ແດງ​ຄວາມ​ຍ້ອງຍໍ​ຊົມ​ເຊີຍ ຕໍ່ຜົນງານ ​ແລະ ​ໄຊຊະນະ ທີ່​ສຳນັກ​ຂ່າວສານ​ປະ​ເທດ​ລາວ ​ຍາດ​ມາ​ໄດ້​ຕະຫລອດ​ໄລ​ຍະ 50 ປີຜ່ານມາ, ອັນ​ໄດ້​ປະກອບສ່ວນ​ສຳຄັນ​ ເຂົ້າ​ໃນ​ພາລະກິດ​ປົດ​ປ່ອຍ​ຊາດ, ຍາດ​ເອົາ​ເອກະລາດ ​ມາສູ່​ປະ​ເທດ​ຊາດ​ໄດ້​ຢ່າງ​ສົມບູນ ກໍ​ຄື ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ປະ​ເທດ​ຊາດ ທີ່​ນັບ​ມື້​ເຕີບ​ໃຫຍ່​ເຂັ້ມ​ແຂງຂຶ້ນເລື້ອຍໆ.

ທີ່ມາ: ສໍານັກຂ່າວສານປະເທດລາວ