ສກຂ ຫຼວງພະບາງ ສະຫຼຸບຖອດຖອນບົດຮຽນວຽກງານກວດກາປະເມີນຜົນ ແລະ ປະກັນຄຸນນະພາບ ພະແນກສຶກສາທິການ ແລະ ກິລາ

ແຂວງຫຼວງພະບາງ ໄດ້ຈັດກອງປະຊຸມສະຫຼຸບຖອດຖອນບົດຮຽນວຽກງານກວດກາປະເມີນຜົນ ແລະ ປະກັນຄຸນນະພາບ ເມື່ອຕອນເຊົ້າຂອງວັນທີ 25 ທັນວາ ຜ່ານມາ ທີ່ພະແນກດັ່ງກ່າວ ໂດຍພາຍໃຕ້ການເປັນປະທານຂອງທ່ານ ປອ ວົງເພັດ ອຸດົມລິດ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີຫົວໜ້າ-ຮອງຫົວໜ້າຫ້ອງການສຶກສາທິການ ແລະ ກິລາເມືອງ,ນະຄອນຫຼວງ,ຫົວໜ້າ-ຮອງຫົວໜ້າຂະແໜງ ພະນັກງານ ແລະ ວິຊາການທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມໄດ້ຮັບຟັງການເຜີຍແຜ່ບົດສະຫຼຸບປະຈຳປີ 2017 ແລະ ທິດທາງແຜນການປະຈຳປີ 2018 ຂອງກົມກວດກາກະຊວງສຶກສາທິການ ແລະ ກິລາ,ຮັບຟັງການຜ່ານບົດສະຫຼຸບການຈັດຕັ້ງປະຕິບັດວຽກງານຕິດຕາມ ກວດກາ-ປະເມີນຜົນ ແລະ ປະກັນຄຸນນະພາບປະຈຳສົກປີ 2017-2018 ແລະ ທິດທາງແຜນການປະຈຳປີ 2018-2019,ຮັບຟັງການລາຍງານສະພາບການເຄື່ອນໄຫວວຽກງານຕິດຕາມ ກວດກາ-ປະເມີນຜົນ ແລະ ປະກັນຄຸນນະພາບຂອງເມືອງໃນປີຜ່ານມາ ພ້ອມກັນນັ້ນໃນກອງປະຊຸມຍັງຈະໄດ້ພ້ອມກັນປະກອບຄຳຄິດຄຳເຫັນໃສ່ຮ່າງບົດສະຫຼຸບ ເພື່ອແລກປ່ຽນບົດຮຽນເຊິ່ງກັນ ແລະ ກັນ, ນຳສະເໜີຄວາມຮູ້ພື້ນຖານ,ພາລະບົດບາດ,ຂອບເຂດ ສິດໜ້າທີ່ຂອງວຽກງານຕິດຕາມ ກວດກາ-ປະເມີນຜົນ ແລະ ປະກັນຄຸນນະພາບ,ວາງແຜນກຳນົດວິທີການໃນການຈັດຕັ້ງປະຕິບັດວຽກງານໃຫ້ມີປະສິດທິຜົນ.

ໂອກາດນີ້ ທ່ານ ປອ ວົງເພັດ ອຸດົມລິດ ໄດ້ຮຽກຮ້ອງມາຍັງຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບໃນການສົນທະນາແລກປ່ຽນຄຳຄິດເຫັນ ເພື່ອເອກະພາບຕໍ່ການຕີລາຄາດ້ານຕັ້ງໜ້າ,ຕໍ່ບັນຫາ,ສິ່ງທ້າທາຍ,ເຫດ ແລະ ວິທີແກ້ໄຂ ໂດຍສະເພາະມາດຕະການຈັດຕັ້ງປະຕິບັດວຽກງານກວດກາຂອງຂະແໜງການສຶກສາ ແລະ ກິລາໃຫ້ບັນລຸຕາມຈຸດປະສົງ ແລະ ເຂົ້າສູ່ຕົວຈິງຢ່າງທົ່ວເຖິງ.

ສຳລັບກອງປະຊຸມຄັ້ງນີ້ແມ່ນຈະໄດ້ດຳເນີນໄປເປັນເວລາ 2 ວັນຈື່ງຈະປິດລົງ( 25-26 ທັນວາ 2018).

ໂດຍ: ແຈັກກີ້ ສກຂ ຫຼວງພະບາງ