ປະທານປະເທດ ສປປລາວ ໂທລະເລກອວຍພອນເຈົ້າຈັກກະພັດ ແຫ່ງ ປະເທດຍີ່ປຸ່ນ

ຂປລ. ໃນວັນທີ 21 ທັນວາ 2018 ທີ່ ນະຄອນຫລວງວຽງຈັນ, ທ່ານ ບຸນຍັງ ວໍລະຈິດ ປະ ທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງໂທລະເລກອວຍພອນ ເຖິງ ສົມເດັດ ອາກິຮິໂຕະ ເຈົ້າຈັກກະພັດ ແຫ່ງ ປະເທດຍີ່ປຸ່ນ ທີ່ ນະຄອນຫລວງໂຕກຽວ.

ເນື້ອໃນສານລະບຸວ່າ: ເນື່ອງໃນໂອກາດອັນເປັນສິລິມົງຄຸນ ແຫ່ງ ວັນພະຣາຊະສົມພົບ ຄົບ ຮອບ 85 ພັນສາ ຂອງພະອົງ, ໃນນາມປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄື ໃນນາມສ່ວນຕົວ, ຂ້າພະເຈົ້າ ຂໍສົ່ງຄຳອວຍພອນໄຊອັນປະເສີດ ແລະ ຄຳຊົມເຊີຍອັນອົບອຸ່ນ ມາຍັງ ພະອົງ ແລະ ພະບໍລົມວົງສານຸວົງ ຈົ່ງຊົງພະກະເສມສຳລານ ເພື່ອສືບຕໍ່ເປັນຮົ່ມໂພຮົ່ມໄຊໃຫ້ແກ່ປະຊາຊົນຍີ່ປຸ່ນ ຕະຫລອດໄປ.

ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງ ທີ່ເຫັນວ່າສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ຍີ່ປຸ່ນ ໄດ້ຮັບການເພີ່ມທະວີ ແລະ ພັດທະນາຢ່າງຕໍ່ເນື່ອງຕະຫລອດໄລຍະຜ່ານມາ ແລະ ໄດ້ກາຍເປັນຄູ່ຮ່ວມຍຸດທະສາດນຳກັນ.
ຂ້າພະເຈົ້າຫວັງຢ່າງຍິ່ງວ່າ ພາຍໃຕ້ການເປັນຄູ່ຮ່ວມມືດັ່ງກ່າວ, ຈະນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ ແລະ ຍີ່ປຸ່ນ ພ້ອມທັງເປັນການປະກອບສ່ວນໃນການສ້າງສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາຢູ່ໃນພາກພື້ນ ແລະ ໃນໂລກ. ຂໍອວຍພອນໄຊໃຫ້ພະອົງ ຈົ່ງມີພະລານາໄມສົມບູນ ແລະ ຊົງພະກະເສມສຳລານຍິ່ງຍືນນານ.
ໃນໂອກາດດຽວກັນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະ ຊາທິປະໄຕ ປະຊາຊົນລາວ ກໍ່ໄດ້ສົ່ງໂທລະເລກອວຍພອນ ເຖິງ ທ່ານ ຊີນໂຊ ອາເບະ ນາຍົກລັດ ຖະມົນຕີ ແຫ່ງ ປະເທດຍີ່ປຸ່ນ ແລະ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍ່ໄດ້ສົ່ງໂທລະເລກອວຍພອນ ເຖິງ ທ່ານ ທະໂຣ ໂຄໂນະ ລັດຖະມົນຕີ ກະຊວງການຕ່າງປະເທດ ຍີ່ປຸ່ນ ເຊັນດຽວກັນ.

Japan LJI: Laos-Japan Institute #laosjapan