ປີໃໝ່ເຊີນໄປທ່ຽວເມືອງມໍລະດົກໂລກ ຫລວງພະບາງ…

0
131

ຫຼວງພະບາງເປັນໜຶ່ງໃນບັນດາແຂວງພາກເໜືອຂອງລາວ ທີ່ເຕັມໄປດ້ວຍຊັບພະຍາກອນທໍາມະຊາດ, ຫ້ວຍນໍ້າລໍາທານ ແລະ ພູຜາປ່າໄມ້ອັນດົກໜາ ແລະ ຂຽວງາມຕະຫຼອດປີ. ແຂວງຫຼວງພະບາງມີເນື້ອທີ່ກວ້າງປະມານ 18.000 ກິໂລຕາແມັດ, ມີພົນລະເມືອງທັງໝົດ 4 ແສນກວ່າຄົນ ເຊິ່ງປະກອບດ້ວຍ 12 ເມືອງຄື: ຫຼວງພະບາງ, ຊຽງເງິນ, ເມືອງນານ, ປາກອູ, ນໍ້າບາກ ເມືອງງອຍ, ປາກແຊງ, ໂພນໄຊ, ຈອມເພັດ, ວຽງຄໍາ, ໂພນທອງ ແລະ ພູຄູນ.


ເປັນແຂວງທີ່ອຸດົມສົມບູນໄປດ້ວຍສະຖານທີ່ທ່ອງທ່ຽວທາງດ້ານທໍາມະຊາດ, ປະ ຫວັດສາດ, ວັດທະນະທໍາອັນງົດງາມເຊັ່ນ: :ວັດຊຽງທອງ, ວັດວິຊຸນ, ຫໍພິພິທະພັນຫຼວງພະບາງ (ພະຣາຊະວັງເກົ່າ), ພະທາດພູສີ, ວັດໃໝ່, ວັດທາດຫຼວງ, ວັດແສນ, ວັດຊຽງແມນ, ວັດໂພນເພົາ, ຕະຫຼາດກາງຄືນ, ສູນວາງສະແດງຊົນເຜົ່າວິທະຍາ, ສູນຫັດຖະກໍາບ້ານຜານົມ, ບ້ານຊ່າງໄຫ, ຖໍ້າຕິ່ງ (ປາກອູ), ຕາດກວາງຊີ, ໜອງຂຽວ- ເມືອງງອຍ ແລະ ອື່ນໆ.


ເປັນແຂວງທີ່ມີຈຸດພິເສດແຕກຕ່າງຈາກແຂວງອື່ນໆ ເຊິ່ງອຸດົມສົມບູນ ແລະ ຮັ່ງມີໄປດ້ວຍວັດວາອາຮາມປູສະນິຍະສະຖານ, ວັດຖຸບູຮານ ແລະ ສະຖາປັດຕະຍະກໍາອັນເກົ່າແກ່ຈົນ ກາຍເປັນຄັງສາງທີ່ມີຄວາມສໍາຄັນໃນການເກັບມ້ຽນ ແລະ ປົກປັກຮັກສາວັດຖຸສິ່ງຂອງເຫຼົ່ານັ້ນ ໄວ້ເຊິ່ງລວມທັງວັດທະນະທໍາ, ຮີດຄອງປະເພນີ ແລະ ແບບແຜນດໍາລົງຊີວິດກໍຍັງຄົງຮັກສາໄວ້ເປັນຢ່າງດີ, ຊ່ວຍໃຫ້ແຂວງຫຼວງພະບາງໄດ້ຮັບຮອງໃຫ້ເປັນເມືອງມໍລະດົກໂລກ ໂດຍອົງການຢູ ເນສໂກ ນັບແຕ່ປີ 1995 ເປັນຕົ້ນມາ.ໂດຍສະເພາະແມ່ນປະເພນີສະຫລອງສົງການປີໃໝ່ລາວ ກໍ່ຈະມີຫລາຍຮູບຫລາຍແບບຢ່າງຈັບອົກຈັບໃຈ ເຊິ່ງບໍ່ພຽງແຕ່ທ່ານຈະໄດ້ທ່ຽວຊົມ ແລະ ສໍາພັດກັບບັນຍາກາດອັນເບີກບານມວນຊື່ນແລ້ວ, ທ່ານຍັງຈະໄດ້ຊິມລົດຊາດອາຫານພື້ນເມືອງທີ່ເປັນເອກະລັກສະເພາະຂອງແຂວງຫຼວງພະບາງດັ່ງ: ເອາະຫຼາມ, ແຈ່ວບອງ, ໄຄແຜ່ນ, ເຂົ້າໜົມຂີ້ໜູ ແລະ ໄສ້ອົ່ວແຊບໆນໍາອີກ ເຊິ່ງທັງໝົດເຫຼົ່ານີ້ໄດ້ກາຍເປັນມົນສະເໜ່ດຶງດູດຈິດໃຈບັນດາ ນັກທ່ອງທ່ຽວທີ່ມາທ່ຽວຊົມໄດ້ຕິດອົກຕິດໃຈ ແລະ ຫຼົງໄຫຼໄຝ່ຝັນຢາກຈະຫວນຄືນມາຫາຫຼວງພະບາງໃໝ່ອີກ.


ດັ່ງຄໍາຂວັນທີ່ວ່າ ຫຼວງພະບາງ ເມືອງງາມອາຮາມຮຸ່ງ ເມືອງນຸ່ງສິ້ນໄໝຂວັນໃຈນັກທ່ອງທ່ຽວເມືອງ ກ້ຽວຄໍາຫວານຕໍານານເມືອງຂັບທຸ້ມ ງາມພູຕັ້ງກາງເມືອງ ເລືອງລືວັດທະນະທໍາ ເອາະຫຼາມໃສ່ສະຂ່ານ ງາມຊ່ວງເຮືອເດືອນເກົ້າ ວັດເກົ່າແກ່ມາກ ມີຕາດກວາງຊີ ຖໍ້າຕິ່ງເປັນມິ່ງເມືອງມໍລະດົກໂລກ.


ຂອບໃຈທີ່ມາ: www.sanook.com