ເມືອງແກ່ນທ້າວ ຈະເປີດປີທ່ອງທ່ຽວ ຕິດພັນກັບບຸນນະມັດສະການພະທາດທ້າວແກ່ນ-ພະທາດນາງແພງສີ

0
534

ເມືອງແກ່ນທ້າວ ແຂວງໄຊຍະບູລີ ຈະເປີດປີທ່ອງທ່ຽວ ຕິດພັນກັບບຸນນະມັດສະການພະທາດທ້າວແກ່ນ-ພະທາດນາງແພງສີ ປະເພນີບຸນເດືອນ 7 (ບຸນພຣະເຫວດ) ເລີ່ມແຕ່ວັນທີ 23 ພຶດສະພາ 2018 ຈະມີການປະກວດນັກຮ້ອງສຽງດີ ແລະ ການສະແດງສິລະປະ-ວັນນະຄະດີ. ສ່ວນໃນຕອນຄໍ່າວັນທີ 24 ພຶດສະພາ ປະກວດນາງສາວງາມບຸນເດືອນ 7 ແລະ ການສະແດງສິລະປະ-ວັນນະຄະດີ.

  • ຂະນະທີ່ ວັນທີ 26 ພຶດສະພາ 2018 ພິທີເປີດປີທ່ອງທ່ຽວຂອງເມືອງຢ່າງເປັນທາງການ.
  •  ວັນທີ 27 ພຶດສະພາ 2018 ກົງກັບມື້ຂຶ້ນ 13 ຄໍ່າ ເດືອນ 7 ເປັນມື້ຫ້າງຫາກະກຽມ, ຕົບແຕ່ງເຄື່ອງສັກກາລະບູຊາ, ຕົບແຕ່ງປະດັບປະດາວັດວາອາຮາມໃຫ້ມີຄວາມຈົບງາມ ແລະ ເປັນລະຮຽບຮ້ອຍ,
  • ວັນທີ 28 ພຶດສະພາ 2018 ກົງກັບມື້ຂຶ້ນ 14 ຄໍ່າ ເດືອນ 7 ເຕົ້າໂຮມບຸນ, ຕ້ອນຮັບພຣະສົງສາມະເນນ, ເຖົ້າແກ່ທີ່ມາຈາກບ້ານຕ່າງໆ, ຮັບກັນສົມໂພດຈາກສັດທາຍາດໂຍມຈາກບ້ານຕ່າງໆ ແລະ ຕອນຄໍ່າຊົມການສະແດງຄອນເສີດ, ໝໍລໍາເລື່ອງ.

  • ວັນທີ 29 ພຶດສະພາ 2018 ກົງກັບມື້ຂຶ້ນ 15 ຄໍ່າ ເດືອນ 7 ພິທີຖວາຍສັງຄະທານແດ່ພຣະສົງສາມະເນນ, ບາສີສູ່ຂວັນນາກຜູ້ຈະບວດ, ແຫ່ນາກຈາກວັດຈອມແຈ້ງໄປບວດຢູ່ວັດສີພູມ, ເຕົ້າ ໂຮມຊັ້ນຄົນຕ່າງໆ ເພື່ອໄປເຊີນພຣະເຫວດສັນດອນ, ຊົມການຈູດບັ້ງໄຟຫາງ, ເລີ່ມພິທີອັນເຊີນພຣະເຫວດຢ່າງເປັນທາງ ການ.   ຈາກນັ້ນເລີ່ມເຄື່ອນຍ້າຍຂະບວນພຣະເວດເຂົ້າເມືອງ ແລະ ຕອນຄໍ່າຊົມການສະແດງຄອນເສີດ, ໝໍລໍາເລື່ອງ ແລະ ການຈູດບັ້ງໄຟດອກ, ພ້ອມນີ້ ຕະຫຼອດງານບຸນຍັງມີຕະຫຼາດນັດວາງສະແດງ ແລະ ຂາຍສິນຄ້າຈາກບ້ານ-ກຸ່ມບ້ານ ບໍລິເວນໃນທົ່ວເມືອງຕື່ມອີກ.

ພາບ-ຂ່າວ: ຫ້ອງການ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ເມືອງແກ່ນທ້າວ