ຜົນຂອງກອງປະຊຸມລັດຖະບານສະໄໝສາມັນ ປະຈໍາເດືອນ ທັນວາ 2018

ກອງປະຊຸມລັດຖະບານສະໄໝສາມັນ ປະຈໍາເດືອນທັນວາ 2018 ໄດ້ສຸມໃສ່ພິຈາລະນາ ແລະ ປະກອບຄຳເຫັນໃສ່ 6 ເອກະສານສຳຄັນ ກອງປະຊຸມໄດ້ດໍາເນີນເປັນເວລາສອງວັນເຕັມ ຄື: 24 – 25 ທັນວາ 2018 ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ໂດຍມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ໄດ້ພ້ອມກັນສຸມໃສ່ພິຈາລະນາ, ປະກອບຄໍາເຫັນເຂົ້າໃສ່ 6 ເອກະສານສໍາຄັນ ດັ່ງນີ້:

1). ບົດລາຍງານກ່ຽວກັບສະພາບພົ້ນເດັ່ນຂອງການເຄື່ອນໄຫວວຽກງານການຕ່າງປະເທດຂອງລັດຖະບານ ປະຈຳປີ 2018 ແລະ ທິດທາງແຜນການສຳລັບປີ 2019;

2). ບົດລາຍງານການຕີລາຄາກ່ຽວກັບສະພາບການເຂົ້າຮ່ວມ, ລາຍງານ ແລະ ຕອບຄຳຊັກຖາມຂອງລັດຖະບານ ຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊູດທີ VII;

3). ບົດລາຍງານກ່ຽວກັບການວາງແຜນ ແລະ ດໍາເນີນວຽກງານຟື້ນຟູຫຼັງໄພພິບັດ ໃນຂອບເຂດທົ່ວປະເທດປີ 2018;

4). ບົດລາຍງານກ່ຽວກັບຜົນການຈັດຕັ້ງປະຕິບັດຄໍາສັ່ງ ສະບັບເລກທີ 15/ນຍ ແລະ ສະພາບການດຳເນີນທຸລະກິດໄມ້ຢູ່ ສປປ ລາວ;

5). ບົດລາຍງານກ່ຽວກັບການສະຫຼຸບຕີລາຄາການຈັດຕັ້ງປະຕິບັດປີທ່ອງທ່ຽວລາວ ປີ 2018 ແລະ ແຜນການເປີດປີທ່ອງທ່ຽວ ລາວ – ຈີນ ປີ 2019 ແລະ

6). ຮ່າງດຳລັດ ວ່າດ້ວຍແຜນພັດທະນາເສດຖະກິດ – ສັງຄົມແຫ່ງຊາດ, ແຜນງົບປະມານແຫ່ງລັດ ປະຈຳປີ 2019.

ຕໍ່ກັບບົດລາຍງານກ່ຽວກັບສະພາບພົ້ນເດັ່ນ ຂອງການເຄື່ອນໄຫວວຽກງານການຕ່າງປະເທດຂອງລັດຖະບານ ປະຈຳປີ 2018 ແລະ ທິດທາງແຜນການສຳລັບປີ 2019, ກອງປະຊຸມໄດ້ຊີ້ນໍາໃຫ້ທຸກພາກສ່ວນທີ່ກ່ຽວຂ້ອງສືບຕໍ່ເອົາໃຈໃສ່ຕິດຕາມສະພາບການປ່ຽນແປງຂອງພາກພື້ນ ແລະ ສາກົນຢ່າງໃກ້ຊິດ.

ຕໍ່ກັບບົດລາຍງານການວາງແຜນ ແລະ ດໍາເນີນວຽກງານຟື້ນຟູໄພພິບັດໃນຂອບເຂດທົ່ວປະເທດ ກອງປະຊຸມໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງສືບຕໍ່ເອົາໃຈໃສ່ຮີບຮ້ອນຈັດສັນທີ່ພັກຊົ່ວຄາວ ໃຫ້ຜູ້ທີ່ໄດ້ຮັບຜົນກະທົບຢູ່ທີ່ເມືອງສະໜາມໄຊ ໃຫ້ສໍາເລັດຕາມສັນຍາທີ່ໄດ້ຕົກລົງກັນ.

ພ້ອມດຽວກັນນີ້, ກໍ່ໃຫ້ດໍາເນີນການອອກແບບທີ່ພັກເຊົາຖາວອນ ແລະ ກໍານົດເນື້ອທີ່ທໍາການຜະລິດໃຫ້ປະຊາຊົນໂດຍໄວ, ມອບໃຫ້ຂະແໜງສາທາລະນະສຸກ ສືບຕໍ່ເອົາໃຈໃສ່ຕິດຕາມ ແລະ ເບິ່ງແຍງສຸຂະພາບຂອງປະຊາຊົນຜູ້ຖືກຜົນກະທົບ ໂດຍສະເພາະສຸຂະພາບຈິດຂອງປະຊາຊົນ, ມອບໃຫ້ຄະນະສະເພາະກິດແກ້ໄຂໄພພິບັດຂັ້ນສູນກາງ ແລະ ທ້ອງຖິ່ນປຶກສາຫາລືກັນ ເພື່ອແຈ້ງກ່ຽວກັບຄວາມຄືບໜ້າໃນການແກ້ໄຂໄພພິບັດໃນແຕ່ລະໄລຍະຕໍ່ສື່ມວນຊົນ ທັງເປັນການຕອບຕ້ານຫາງສຽງທັບຖົມໂຈມຕີຂອງຜູ້ບໍ່ຫວັງດີ ທີ່ຫວັງທໍາລາຍມ້າງເພ ແລະ ສ້າງຄວາມບໍ່ສະຫງົບໃນສັງຄົມ ແລະ ທີ່ສຳຄັນແມ່ນໃຫ້ເອົາໃຈໃສ່ໃນການວາງແຜນຟື້ນຟູໄພພິບັດທັງໄລຍະສັ້ນ ແລະ ໄລຍະຍາວໃຫ້ໄດ້ຮັບຜົນດີ.

ບົດລາຍງານກ່ຽວກັບຜົນການກວດກາ, ຕິດຕາມ, ຊຸກຍູ້ການຈັດຕັ້ງປະຕິບັດຄໍາສັ່ງ ເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້ໃນຂອບເຂດທົ່ວປະເທດ ເຊິ່ງກອງປະຊຸມໄດ້ສັງເກດຕີລາຄາວ່າ:

ຜ່ານການຈັດຕັ້ງປະຕິບັດຄໍາສັ່ງດັ່ງກ່າວໄດ້ເຮັດໃຫ້ສະພາບການລັກລອບຂຸດຄົ້ນ ແລະ ເຄື່ຶອນຍ້າຍໄມ້ຫຼຸດລົງຢ່າງຈະແຈ້ງທຽບໃສ່ເມື່ອກ່ອນ ເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ໄດ້ຮັບການຈັດຕັ້ງປະຕິບັດເປັນຮູບປະທໍາຫຼາຍຂຶ້ນ, ເຮັດໃຫ້ບົດບາດໃນການນໍາພາຄຸ້ມຄອງຂອງພັກ – ລັດສູງເດັ່ນຂຶ້ນ; ຜູ້ປະກອບການຈໍານວນໜຶ່ງໄດ້ເອົາໃຈໃສ່ປັບປຸງໂຮງງານ, ຍົກລະດັບສີມືແຮງງານ, ສາມາດສ້າງຜະລິດຕະພັນສໍາເລັດຮູບທີ່ເປັນການສ້າງມູນຄ່າເພີ່ມສູງຂຶ້ນ; ສາມາດເກັບກໍາໄດ້ຈໍານວນບໍລິມາດໄມ້ທີ່ຍັງຄ້າງຢູ່ໃນສະໜາມ, ໄມ້ທີ່ໄດ້ຊື້ – ຂາຍແລ້ວ ແລະ ຍັງບໍ່ໄດ້ຊື້ – ຂາຍ, ກວດກາພົບເຫັນການລະເມີດຄໍາສັ່ງ ເລກທີ 15/ນຍ;

ໄດ້ມີການຢຶດ ແລະ ປັບໃໝ, ປະຕິບັດວິໄນຕໍ່ຜູ້ລະເມີດຢ່າງເຂັ້ມງວດ ເຮັດໃຫ້ຜູ້ລະເມີດມີຄວາມຢ້ານກົວບໍ່ກ້າກະທໍາຜິດຊໍ້າອີກ; ອັນສໍາຄັນບາງແຂວງເລີ່ມມີການສ້າງເມືອງຕົວແບບໃນການຈັດຕັ້ງປະຕິບັດຄໍາສັ່ງ ເລກທີ 15/ນຍ ແລະ ປົກປັກຮັກສາປ່າໄມ້ ຄື: ເມືອງທ່າປາງທອງ ແຂວງສະຫວັນນະເຂດ ໂດຍເລີ່ມຈາກການຈັດຕັ້ງປະຕິບັດກົດໝາຍ ແລະ ລະບຽບການໃນການຄຸ້ມຄອງປ່າໄມ້ແຕ່ລະປະເພດໃຫ້ເຂັ້ມງວດ, ການຄຸ້ມຄອງໂຮງງານ, ການສົ່ງຜະລິດຕະພັນໄມ້ ແລະ ອື່ນໆເຂົ້າສູ່ລະບຽບກົດໝາຍ.

ຄຽງຄູ່ກັບຜົນສໍາເລັດດັ່ງກ່າວນີ້ຍັງມີຂໍ້ຄົງຄ້າງຫຼາຍດ້ານທີ່ໄດ້ສືບຕໍ່ແກ້ໄຂ ຕໍ່ບັນຫາດັ່ງກ່າວກອງປະຊຸມໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງສືບຕໍ່ເອົາໃຈໃສ່ຈັດຕັ້ງປະຕິບັດຄໍາສັ່ງ ເລກທີ 15/ນຍ ຢ່າງເຄັ່ງຄັດ, ເຂັ້ມງວດ ແລະ ເດັດຂາດ, ປັບປຸງຕື່ມບັນດານິຕິກໍາທີ່ກ່ຽວຂ້ອງທີ່ເຫັນວ່າຍັງບໍ່ຄົບຖ້ວນຮັດກຸມ, ຈະແຈ້ງ ແລະ ມີ ຄວາມເປັນເອກະພາບໃນການຈັດຕັ້ງປະຕິບັດໃນຂອບເຂດທົ່ວປະເທດ. ພ້ອມດຽວກັນນີ້, ໃຫ້ຢຸດຕິການຊອກຄົ້ນເຄື່ອງປ່າຂອງດົງໃນຂອບເຂດທົ່ວປະເທດ.

ກ່ຽວກັບບົດລາຍງານການສະຫຼຸບຕີລາຄາການຈັດຕັ້ງປະຕິບັດປີທ່ອງທ່ຽວລາວ ປີ 2018 ແລະ ແຜນການເປີດປີທ່ອງທ່ຽວ ລາວ – ຈີນ ປີ 2019 ກອງປະຊຸມໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງນໍາໄປປັບປຸງຕື່ມຕາມການປະກອບຄໍາເຫັນຂອງສະມາຊິກລັດຖະບານ ເປັນຕົ້ນໃນປີ 2019 ຖືເປັນປີທ່ອງທ່ຽວ ລາວ – ຈີນ ໃຫ້ທຸກຂະແໜງການນັບທັງສູນກາງ ແລະ ທ້ອງຖິ່ນເປັນເຈົ້າການ ແລະ ມີສ່ວນຮ່ວມໃນການສະເຫຼີມສະຫຼອງປີທ່ອງທ່ຽວດັ່ງກ່າວ. ພ້ອມດຽວກັນນັ້ນ, ໃຫ້ເອົາໃຈໃສ່ໃນການແກ້ໄຂສິ່ງອັດຕັນຕ່າງໆທີ່ເປັນອຸປະສັກໃຫ້ແກ່ນັກທ່ອງທ່ຽວ, ສໍາຄັນແມ່ນໃຫ້ເອົາໃຈໃສ່ໃນການປົກປັກຮັກສາຮີດຄອງປະເພນີ ແລະ ສະຖານທີ່ທ່ອງທ່ຽວສໍາຄັນຕ່າງໆໃຫ້ມີຄວາມເປັນລະບຽບຮຽບຮ້ອຍ ແລະ ສະອາດງາມຕາ.

ກ່ຽວກັບບົດລາຍງານ ຮ່າງດໍາລັດວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ແລະ ແຜນງົບປະມານແຫ່ງລັດ ປະຈໍາປີ 2019 ເຊິ່ງເປັນປີທີ 4 ຂອງການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ 5 ປີ ຄັ້ງທີ VIII ( 2016 – 2020 ) ກໍ່ຄືມະຕິກອງປະຊຸມໃຫຍ່ ຄັ້ງທີ X ຂອງພັກ ໃຫ້ໄດ້ຮັບຜົນສໍາເລັດຕາມທິດທາງ, ຄາດໝາຍ ແລະ ມີຄວາມເປັນເອກະພາບໃນຂອບເຂດທົ່ວປະເທດ ເຊິ່ງກອງປະຊຸມໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງນໍາໄປປັບປຸງຕື່ມຕາມການປະກອບຄໍາຄິດເຫັນຂອງສະມາຊິກລັດຖະບານ ເປັນຕົ້ນ:

1). ເອົາໃຈໃສ່ປັບປຸງຮ່າງດໍາລັດດັ່ງກ່າວໃຫ້ເປັນລະບົບ ເປັນຕ່ອງໂສ້ ແລະ ເພີ່ມອີກໝວດໜຶ່ງໃຫ້ກໍານົດມາດຕະການ ແລະ ກົນໄກການຈັດຕັ້ງປະຕິບັດ;

2). ໃຫ້ຂະແໜງການທີ່ກ່ຽວຂ້ອງເອົາໃຈໃສ່ໃນການສໍາຫຼວດ ແລະ ກະກຽມໃຫ້ແກ່ການສ້າງແຜນພັດທະນາເສດຖະກິດ – ສັງຄົມ 5 ປີ ຄັ້ງທີ 9;

3). ເອົາໃຈໃສ່ສູ້ຊົນ ໃນປີ 2019 ໃຫ້ບັນລຸຕາມຕົວເລກຄາດໝາຍຕາມມະຕິ.

ຫ້ອງວ່າການລັດຖະບານ