ກະຊວງການຕ່າງປະເທດ ລະນຶກວັນສຳຄັນຕ່າງໆຂອງຊາດ

ຂປລ. ຕອນເຊົ້າຂອງ ວັນທີ 26 ທັນວາ 2018, ກະຊວງການຕ່າງປະເທດ ໄດ້ຈັດພິທີ ປາຖະ ກະຖາ ລະນຶກວັນສຳຄັນຕ່າງໆຂອງຊາດ ຄື: ວັນສ້າງຕັ້ງເມືອງວຽງໄຊ-ຖານທີ່ໝັ້ນຂອງການປະຕິວັດລາວ ຄົບຮອບ 50 ປີ(30/11/1968–30/11/2018), ວັນສະຖາປະນາ ສປປ ລາວ ຄົບຮອບ 43 ປີ (2/12/1975-2/12/2018) ແລະ ວັນຄ້າຍວັນເກີດ ຂອງປະທານ ໄກສອນ ພົມວິຫານ ຄົບຮອບ 98 ປີ (13/12/1920-13/12/ 2018), ໂດຍການເປັນປະທານ ຂອງທ່ານ ສົມສະຫວາດ ເລັ່ງສະຫວັດ, ອະດີດ ຮອງນາຍົກລັດຖະມົນຕີ, ມີຄະນະພັກ-ຄະນະນຳ, ສະມາຊິກພັກ, ພະນັກງານຫລັກແຫລ່ງ ແລະ ພະນັກ ງານ-ລັດຖະກອນ ອ້ອມຂ້າງກະຊວງການຕ່າງປະເທດ ເຂົ້າຮ່ວມ.

ທ່ານ ສົມສະຫວາດ ເລັ່ງສະຫວັດ, ອະດີດ ຮອງນາຍົກລັດຖະມົນຕີ

ໃນໂອກາດດັ່ງກ່າວ, ທ່ານ ສົມສະຫວາດ ເລັ່ງສະຫວັດ ໄດ້ເລົ່າປະຫວັດມູນເຊື້ອເມືອງວຽງໄຊ- ຖານທີ່ໝັ້ນຂອງການປະຕິວັດລາວ ໂດຍຍົກໃຫ້ເຫັນວ່າ: ເມືອງວຽງໄຊ ແມ່ນບ່ອນກໍາເນີດອົງການແນວລາວຮັກຊາດ ແລະ ເປັນໃຈກາງແຫ່ງການເຕົ້າໂຮມຄວາມສາມັກຄີ ທົ່ວປວງຊົນລາວທັງຊາດ ເພື່ອສ້າງກຳແຮງສັງລວມຕີເອົາຊະນະສັດຕູຢ່າງເຂັ້ມແຂງ, ທັງເປັນບ່ອນກໍ່ສ້າງ ແລະ ຂະຫຍາຍກຳລັງປະກອບອາ ວຸດ, ກໍ່ສ້າງ ແລະ ປົກປັກຮັກສາຖານທີ່ໝັ້ນຂອງການປະຕິວັດຕະຫລອດໄລຍະຜ່ານມາ ເຊິ່ງເຮັດໃຫ້ການປະຕິວັດ ມີຜົນສຳເລັດໃນແຕ່ລະໄລຍະການສູ້ຮົບ ແລະ ມາຮອດ ປີ 1968 ເຂດປົດປ່ອຍໄດ້ຮັບການປົກປັກຮັກສາ ແລະ ເປີດກ້ວາງ ເຮັດໃຫ້ຕິດລ່ຽນກັນແຕ່ພາກເໜືອລົງຮອດພາກໃຕ້.