ງົບສ້ອມແປງທາງ ນະຄອນຫລວງວຽງຈັນ ບໍ່ພຽງພໍ

ນສພ ເສດຖະກິດ-ການຄ້າ ລາຍງານເມື່ອບໍ່ດົນມານີ້ວ່າ: ທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ລາຍງານຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ I ໃຫ້ຮູ້ວ່າ: ໃນແຕ່ລະປີ ພະແນກ ຍທຂ ນະຄອນຫຼວງ ແມ່ນໄດ້ຮັບງົບປະມານໜ້ອຍເມື່ອທຽບກັບຄວາມຕ້ອງການຊົມໃຊ້ຕົວຈິງແລ້ວເຫັນວ່າຍັງມີ ຄວາມແຕກໂຕນກັນຫຼາຍ ໂດຍສະເພາະໃນປີ 2018 ໄດ້ຮັບງົບປະມານສ້ອມແປງພຽງແຕ່ 7 ຕື້ກວ່າກີບ ( ບໍ່ນອນໃນງົບຂອງທາງຫຼວງແຫ່ງຊາດ ) ແລ້ວນໍາມາແບ່ງໃຫ້ 9 ເມືອງ ຄື:

ສ້ອມແປງທາງດິນແດງເກືອບ 2 ຕື້ກີບ, ສ້ອມແປງທາງປູຢາງ 12 ເສັ້ນ ມູນຄ່າ 3 ຕື້ ກວ່າກີບ, ສ້ອມແປງຂົວ 2 ແຫ່ງ, ຮ່ອງລະບາຍນໍ້າ ສ່ວນທີ່ເຫຼືອນໍາໄປໃຊ້ໜີ້ຈໍານວນໜຶ່ງ ປັດຈຸບັນງົບປະມານສ້ອມແປງພຽງແຕ່ 39% ເທົ່ານັ້ນ ເພາະງົບປະມານທີ່ຕ້ອງການຕົວຈິງມີສູງເຖິງ 50 ຕື້ກີບ.

ແນວໃດກໍ່ດີ, ເນື່ອງຈາກລະດູຝົນປີນີ້ທີ່ຕົກລົງມາຕໍ່ເນື່ອງ ແລະ ຍາວນານເຮັດໃຫ້ຂະແໜງ ຍທຂ ໄດ້ຮັບຄວາມເສຍຫາຍຫຼາຍສົມຄວນ ເຊັ່ນດຽວກັບບັນດາແຂວງຕ່າງໆທີ່ກຳລັງຕ້ອງການງົບປະມານຈາກກະຊວງເປັນຈຳນວນຫຼາຍ ເມື່ອຄວາມຕ້ອງການຊົມໃຊ້ເສັ້ນທາງຕົວຈິງຂອງປະຊາຊົນ ໂດຍສະເພາະເສັ້ນທາງດິນແດງ, ຮ່ອມເຂົ້າບ້ານນ້ອຍ – ໃຫຍ່ຕ່າງໆໃນທົ່ວນະຄອນຫຼວງ ຍທຂ ນະຄອນຫຼວງ ກໍ່ເຫັນໄດ້ຄວາມຈຳເປັນ ແລະ ໄດ້ພິຈາລະນາຕາມຄວາມເໝາະສົມ ຜ່ານມາໄດ້ມີການຮ່ວມມືກັບບໍລິສັດເອກະຊົນ ໂດຍໃຫ້ເອກະຊົນລົງທຶນກໍ່ສ້າງກ່ອນ ເຊັ່ນ: ເສັ້ນທາງປູຢາງ 2 ຊັ້ນໃນຕົວເມືອງ ນັບແຕ່ປີ 2006 – 2007 ເຂດເມືອງຈັນທະບູລີ, ສີໂຄດຕະບອງ, ໄຊເສດຖາ, ສີສັດຕະນາກ ເຮັດໃຫ້ພະແນກ ຍທຂ ຕິດໜີ້ວຽກສ້ອມແປງສຸກເສີນໃນລະດູຝົນແຕ່ປີ 2014 – 2016 ລວມໜີ້ຕ້ອງຊໍາລະປະມານ 2,5 ຕື້ກີບ ບໍລິສັດຢຸດການກໍ່ສ້າງຍ້ອນສະພາບການເງິນ ປັດຈຸບັນກໍາລັງຊອກຫາທາງອອກໃຫ້ກັບບໍລິສັດກໍ່ສ້າງ.
ຍທຂ ນະຄອນຫຼວງວຽງຈັນ ຍອມຮັບວ່າ: ການສ້ອມແປງເສັ້ນທາງຕ່າງໆໃນນະຄອນຫຼວງ ແມ່ນຍັງບໍ່ປະຕິບັດໄດ້ຢ່າງທົ່ວເຖິງ ເພື່ອຄວາມຈຳເປັນໃນການຊົມໃຊ້ເສັ້ນທາງຜ່ານມາໄດ້ມີການແນະນໍາການນຳເມືອງ ແລະ ບ້ານລະດົມທຶນພາຍໃນເມືອງ ຫຼື ບ້ານສ້ອມແປງກັນໄປກ່ອນ ແຕ່ກໍປາສະຈາກບໍ່ໄດ້ບາງເສັ້ນທາງທີ່ຍັງສະພາບເດີມ ແລະ ມີຫາງສຽງຈົ່ມວ່າຈາກສັງຄົມຢ່າງໜາຫູ ແຕ່ກໍຈະພະຍາຍາມຄົ້ນຄວ້າທຶນຮອນເພື່ອນຳມາແກ້ໄຂ.