ລາວ-ຈີນ ໄດ້ຕົກລົງຮ່ວມມືກັນ ຈັດປີທ່ອງທ່ຽວ 2019 ເລີ່ມທ້າຍເດືອນ ມັງກອນນີ້

ລາວ-ຈີນ ໄດ້ຕົກລົງຮ່ວມມືກັນ ຈັດປີທ່ອງທ່ຽວ 2019 ຢ່າງຄຶກຄື້ນ ເພື່ອດຶງດູດນັກທ່ອງທ່ຽວ ເຂົ້າມາລາວໃຫ້ໄດ້ຫລາຍກວ່າ 4,5 ລ້ານຄົນ ເຊິ່ງຈະມີການຈັດກິດຈະກໍາຫລາຍຢ່າງຜ່ານ 7 ແຜນງານ ທີ່ສອງຝ່າຍໄດ້ຕົກລົງຮ່ວມກັນເປັນພື້ນຖານ.

ເພື່ອປະຕິບັດຕາມ ການຕົກລົງເຫັນດີຂອງສອງລັດຖະບານລາວ-ຈີນ ໃນການຈັດຕັ້ງປີ 2019 ໃຫ້ເປັນປີທ່ອງທ່ຽວ ລາວ-ຈີນ. ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ຮ່ວມກັບສະຖານທູດຈີນ ປະຈຳລາວ ໄດ້ປຶກສາຫາລືການສ້າງແຜນຈັດຕັ້ງເປີດປີທ່ອງທ່ຽວ ລາວ-ຈີນ 2019 ຢູ່ໃນສອງປະເທດ

ຜ່ານບັນດາແຜນງານທີ່ໄດ້ຕົກລົງຮ່ວມກັນ, ເຊິ່ງຈະໃຫ້ກົງກັບໄລຍະເວລາ ການສະເຫລີມສະຫລອງບຸນກຸດຈີນ ໃນທ້າຍເດືອນມັງກອນ ຫາ ຕົ້ນເດືອນກຸມພາ 2019 ແລະ ໂອກາດຄົບ ຮອບ 58 ປີ ຂອງສາຍພົວພັນການທູດລາວ-ຈີນ ຢູ່ນະຄອນຫລວງວຽງຈັນ ແລະ ຈະປິດລົງຢູ່ນະຄອນ ຫລວງປັກກິ່ງ ໃນທ້າຍປີດຽວກັນ.