ສສກ – ມູນນິທິສັນຕິພາບສາກົນ ກຽມເຜີຍແຜ່ບົດຮຽນວິຊາການໃຫ້ 3 ມະຫາວິທະຍາໄລ

0
100

ກະຊວງສຶກສາທິການ ແລະ ກີລາ ( ສສກ ) ແລະ ມູນນິທິສັນຕິພາບສາກົນ ຮ່ວມກັນປຶກສາຫາລືກ່ຽວກັບການເຜີຍແຜ່ບົດຮຽນວິຊາການ ດ້ານຟີຊິກສາດ, ເຄມີສາດ, ເສດຖະສາດ ແລະ ການແພດ ໃຫ້ແກ່ນັກສຶກສາມະຫາວິທະຍາໄລແຫ່ງຊາດ, ມະຫາວິທະຍາໄລສຸພານຸວົງ ແລະ ມະຫາວິທະຍາໄລວິທະຍາສາດສຸຂະພາບ ລະຫວ່າງເດືອນພະຈິກ 2018 ເຖິງເດືອນມີນາ 2019.

ເມື່ອວັນທີ 7 ພຶດສະພາຜ່ານມາ ທີ່ສໍານັກງານກະຊວງສຶກສາທິການ ແລະ ກີລາ, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ໄດ້ໃຫ້ກຽດຕ້ອນຮັບການເຂົ້າພົບປະຂອງເຈົ້າຊາຍ ອັລເຟດ ( Alfred ) ແຫ່ງປະເທດເລັກເຕນສະແຕນ ( Liechtenstein ) ປະທານສະພາທີ່ປຶກສາຂອງມູນນິທິສັນຕິພາບສາກົນ ( International Peace Foundation ) ພ້ອມດ້ວຍຄະນະ, ມີຫົວໜ້າຫ້ອງການ, ກົມ, ອະທິການບໍດີມະຫາວິທະຍາໄລແຫ່ງຊາດ, ພ້ອມດ້ວຍຄະນະຮັບຜິດຊອບວຽກງານກ່ຽວຂ້ອງເຂົ້າຮ່ວມ.

ການພົບປະໃນຄັ້ງນີ້ແມ່ນເພື່ອໂຄສະນາເຜີຍແຜ່ກ່ຽວກັບກອງປະຊຸມສໍາມະນາ ທີ່ຈະມີເຈົ້າຂອງລາງວັນໂນເບລ ຈໍານວນ 4 ທ່ານ ມາເຜີຍແຜ່ບົດຮຽນວິຊາການດ້ານຟີຊິກສາດ, ເຄມີສາດ, ເສດຖະສາດ ແລະ ການແພດ ໃນຫົວຂໍ້ “ Bridges-Dialogues towards a Culture of Peace ” ໃຫ້ແກ່ນັກສຶກສາມະຫາວິທະຍາໄລແຫ່ງຊາດ, ມະຫາວິທະຍາໄລສຸພານຸວົງ ແລະ ມະຫາວິທະຍາໄລວິທະຍາສາດສຸຂະພາບ ໃນ 4 ໄລຍະລະ ຫວ່າງເດືອນພະຈິກ 2018 ເຖິງ ເດືອນມີນາ 2019 ຄື: ໄລຍະທີ 1 ລະຫວ່າງວັນທີ 20 – 24 ພະຈິກ 2018, ໄລຍະທີ 2 ລະຫວ່າງວັນທີ 15 – 19 ມັງກອນ 2019, ໄລຍະທີ 3 ລະຫວ່າງວັນທີ 8 – 15 ມີນາ 2019 ແລະ ໄລຍະທີ 4 ແມ່ນໃນລະຫວ່າງວັນທີ 13 – 17 ມີນາ 2019.

ໂອກາດດັ່ງກ່າວ, ທ່ານ ນາງ ແສງເດືອນ ຫຼ້າຈັນທະບູນ ກໍ່ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງຂອບໃຈທີ່ໄດ້ນໍາເອົາບົດຮຽນດ້ານວິຊາການທີ່ເປັນປະໂຫຍດມາເຜີຍແຜ່ໃຫ້ແກ່ 3 ມະຫາວິທະຍາໄລ ເຊິ່ງກະຊວງສຶກສາທິການ ແລະ ກີລາ ກໍ່ໄດ້ມີການກະກຽມຄວາມພ້ອມເພື່ອເຮັດໃຫ້ກິດຈະກໍາສໍາມະນາດັ່ງກ່າວ ດໍາເນີນໄປດ້ວຍຜົນສໍາເລັດອັນຈົບງາມ.

ພາບ-ຂ່າວ: ເສດຖະກິດ-ການຄ້າ