ເມືອງເງິນ ມີຄວາມພ້ອມ ເກືອບ 100% ຈະປະກາດ ເປັນເມືອງປະຕິບັດ ຂະບວນການສ້າງຄອບຄົວ ແລະ ບ້ານສາມັກຄີປອງດອງ

0
161

ເພື່ອເປັນການກະກຽມຄວາມພ້ອມຮອບດ້ານ ໃນການປະກາດເມືອງເງິນ ແຂວງ ໄຊຍະບູລີ ເປັນເມືອງປະຕິບັດ ຂະບວນການສ້າງຄອບຄົວ ແລະ ບ້ານສາມັກຄີປອງດອງ ທີ່ຈະໄດ້ຈັດຂື້ນ ໃນວັນທີ 11 ມັງກອນ 2019 ນີ້. ດັ່ງນັ້ນທາງອົງການປົກຄອງເມືອງ ສົມທົບກັບພາກສ່ວນທີ່ກ່ຽວຂ້ອງ ໄດ້ຫ້າງຫາກະກຽມ ເປັນຕົ້ນແມ່ນທາງດ້ານເນື້ອໃນ, ພິທີການ, ຂະບວນການອານາໄມ, ຕິດທຸງຊາດ, ທຸງພັກ, ທຸງທິວ,ຄຳຂວັນ, ໂຄມໄຟ, ປະດັບປະດາຕົວເມືອງໃຫ້ມີຄວາມສວຍສົດງົດງາມໃນການຕ້ອນຮັບງານດັ່ງກ່າວ.

ມາຮອດປະຈຸບັນນີ້ ຂະບວນການດ້ານຕ່າງໆ ໄດ້ມີຄວາມພ້ອມ ເປັນຕົ້ນແມ່ນ ຂະບວນການ ເດີນສວນສະນາມ ຂອງພະນັກງານ ແລະ ບ້ານ ຈຳນວນ 16 ກ້ອນກຳລັງ, ກິລາກາຍຍະກຳ ຂອງນ້ອງນັກຮຽນຈຳນວນ700 ກວ່ານ້ອງ, ການເດີນແບບຊຸດເຄື່ອງເຜົ່າ, ຟ້ອນລາຍລື້, ຮ້ານວາງສະແດງສິນຄ້າ ທີ່ຜະລິດຈາກຊາວເມືອງເງິນ, ແລະ ກິດຈະກຳອື່ນໆອີກຫຼາຍລາຍການ.
ທ່ານ ສີທະນົນໄຊ ທອງເທພາ ຄະນະປະຈຳພັກເມືອງ ຫົວໜ້າ ຫ້ອງວ່າການເມືອງ ໃນນາມຕາງໜ້າຄະນະຮັບຜິດຊອບ ໄດ້ລາຍງານຕໍ່ນັກຂ່າວເຮົາ ໃນຄັ້ງວັນທີ 3 ມັງກອນ 2019 ນີ້ວ່າ: ການ ກະກຽມຄວາມພ້ອມຮອບດ້ານໃນການປະກາດເມືອງເງິນ ເປັນເມືອງປະຕິບັດ ຂະບວນການສ້າງຄອບຄົວ-ບ້ານສາມັກຄີປອງດອງ ມາຮອດປະຈຸບັນ ເມືອງເງິນແມ່ນມີຄວາມພ້ອມຮອບດ້ານ ເກືອບ 100%.
ໂດຍ:ສຸລິຍາ ແສງເດືອນ