ເປີດນໍາໃຊ້ເສັ້ນທາງ ເບີ 4 ແຕ່ບ້ານພູຫົວຊ້າງ ຫາ ບ້ານອ່າວໃຕ້ ເມືອງອະນຸວົງ

ໂຄງການກໍ່ສ້າງເສັ້ນທາງ ເບີ 4 ແຕ່ບ້ານພູຫົວຊ້າງ ຫາ ບ້ານອ່າວໃຕ້ ເມືອງອະນຸວົງ ແຂວງໄຊສົມບູນ ໄດ້ດໍາເນີນການກໍ່ສ້າງມາແຕ່ປີ 2014 ມາຮອດປັດຈຸບັນສຳເລັດເປັນທີ່ຮຽບຮ້ອຍ ໂດຍແມ່ນ ບໍລິສັດ ຫຼັກໄຊ ກໍ່ສ້າງ – ຂົວທາງ ຈຳກັດຜູ້ດຽວ ເປັນຜູ້ຮັບເໝົາ ລວມມູນຄ່າກໍ່ສ້າງທັງໝົດແມ່ນ 263 ຕື້ກວ່າກີບ. ຫຼ້າສຸດໃນທ້າຍເດືອນທັນວາ 2018 ຜ່ານມາ ເພື່ອເປັນການຕ້ອນຮັບປີໃໝ່ສາກົນ ຈຶ່ງໄດ້ຈັດພິທີມອບ – ຮັບຊົ່ວຄາວ ແລະ ເປີດນຳໃຊ້ເສັ້ນທາງ ເບີ 4 ທີ່ເມືອງອະນຸວົງ.

ພິທີມອບ – ຮັບຊົ່ວຄາວ ແລະ ເປີດນຳໃຊ້ເສັ້ນທາງ ເບີ 4 ແຕ່ບ້ານພູຫົວຊ້າງ ຫາ ບ້ານອ່າວໃຕ້ ເມືອງອະນຸວົງ ໄດ້ຈັດຂຶ້ນໃນວັນທີ 28 ທັນວາ 2018 ນີ້ ຢູ່ທີ່ຂົວຫ້ວຍສັງກາດ ບ້ານພູຫົວຊ້າງ ເມືອງອະນຸວົງ ແຂວງໄຊສົມບູນ ເຊິ່ງກ່າວມອບໂດຍ ທ່ານ ຄຳໄຊ ບຸນມີສີລາວົງ ອຳນວຍການ ບໍລິສັດ ຫຼັກໄຊ ກໍ່ສ້າງ – ຂົວທາງ ຈຳກັດຜູ້ດຽວ ແລະ ກ່າວຮັບໂດຍ ທ່ານ ພອຍຄຳ ຮຸ່ງບຸນຍວງ ຮອງເຈົ້າແຂວງໆໄຊສົມບູນ ເຊິ່ງໃຫ້ກຽດເຂົ້າຮ່ວມຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ມີທ່ານ ແພງ ດວງເງິນ ຫົວໜ້າກົມຂົວທາງ, ມີບັນດາພະແນກການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.

ໃນພິທີ, ທ່ານ ເພັດສະຫວັນ ພັນສະດາ ຫົວໜ້າໂຄງການກໍ່ສ້າງເສັ້ນທາງ ເບີ 4 ໄດ້ລາຍງານການຈັດຕັ້ງປະຕິບັດ ແລະ ຜົນສຳເລັດຂອງໂຄງການ ເຊິ່ງໂຄງການໄດ້ເລີ່ມກໍ່ສ້າງມາແຕ່ຕົ້ນປີ 2014 ມາຮອດປັດຈຸບັນສຳເລັດແລ້ວຮ້ອຍສ່ວນຮ້ອຍ ໄດ້ຕັດຜ່ານຈຳນວນ 4 ບ້ານ ຄື: ບ້ານພູຫົວຊ້າງ ບ້ານອ່າວເໜືອ, ບ້ານອ່າວກາງ ແລະ ບ້ານອ່າວໃຕ້ ມີຄວາມຍາວທັງໝົດ 30,50 ກິໂລແມັດ, ກວ້າງ 6 ແມັດ ແລະ ປູດ້ວຍຢາງສອງຊັ້ນ. ພ້ອມນີ້, ຍັງໄດ້ກໍ່ສ້າງຂົວໃໝ່ອີກຈຳນວນ 1 ແຫ່ງ ໂດຍແມ່ນ ບໍລິສັດ ຫຼັກໄຊ ກໍ່ສ້າງ – ຂົວທາງ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ລວມມູນຄ່າການກໍ່ສ້າງທັງໝົດ 263 ຕື້ກວ່າກີບ ເຊິ່ງເປັນທຶນຂອງລັດຖະບານ 100%.

ໂອກາດນີ້, ທ່ານ ພອຍຄຳ ຮຸ່ງບຸນຍວງ ຮອງເຈົ້າແຂວງໆໄຊສົມບູນ ໄດ້ຂຶ້ນກ່າວຮັບ ແລະ ເປີດນຳໃຊ້ເສັ້ນທາງດັ່ງກ່າວຢ່າງເປັນທາງການ ວ່າ: ເສັ້ນທາງດັ່ງກ່າວແມ່ນມີຄວາມສຳຄັນຫຼາຍ ເພາະເປັນເສັ້ນທາງຍຸດທະສາດປ້ອງກັນຊາດ – ປ້ອງກັນຄວາມສະຫງົບ ເພື່ອອຳນວຍຄວາມສະດວກໃນການໄປ – ມາຫາສູ່ ແລະ ຂົນສົ່ງແລກປ່ຽນສິນຄ້າຂອງປະຊາຊົນ, ຊຸກຍູ້ການຜະລິດ, ການຄ້າ, ການລົງທຶນ ແລະ ການທ່ອງທ່ຽວຂອງແຂວງໄຊສົມບູນ ໂດຍສະເພາະກໍແມ່ນປະຊາຊົນບັນດາເຜົ່າທີ່ດຳລົງຊີວິດຢູ່ຕາມແລວທາງດັ່ງກ່າວ. ພ້ອມນີ້, ທ່ານຍັງໄດ້ມອບເສັ້ນທາງດັ່ງກ່າວໃຫ້ອຳນາດການປົກຄອງເມືອງອະນຸວົງ ແລະ ພະແນກໂຍທາທິການ ແລະ ຂົນສົ່ງແຂວງ ເປັນຜູ້ຄຸ້ມຄອງປົກປັກຮັກສາຕໍ່ໄປ ເຊິ່ງໃນຕອນທ້າຍຂອງພິທີ ໄດ້ມີການມອບໃບຢັ້ງຢືນ ແລະ ຮ່ວມກັນຕັດແຖບຜ້າ ເພື່ອເປັນຂີດໝາຍໃນການນຳໃຊ້ເສັ້ນທາງດັ່ງກ່າວ.

ຂ່າວ: ສົມສະຫວິນ; ຮູບ: ພຸດທະສອນ