ຈັບໄວລຸ້ນ 9 ຄົນຍົກແກ້ງຕີຄົນອື່ນ ຈົນເສຍຊີວິດ 1 ເຈັບ 3 ທີ່ນະຄອນປາກເຊ

ພະແນກຕໍາຫຼວດສືບສວນ-ສອບສວນ ຫ້ອງຕຳຫຼວດ ປກສ ແຂວງຈຳປາສັກ ຕິດຕາມກັກຕົວກຸ່ມໄວລຸ້ນທີ່ກໍ່ເຫດອາລະວາດທຳຮ້າຍຮ່າງກາຍຄົນອື່ນ ຈົນເສຍຊີວິດ 1 ຄົນ ແລະ ຮັບບາດເຈັບ 3 ຄົນ ໃນວັນທີ 10 ທັນວາ 2018 ຢູ່ໜ້າຮ້ານບັນເທີງແຫ່ງໜຶ່ງ ເຂດບ້ານໂພນສະຫວັນ ນະຄອນປາກເຊ ແຂວງຈຳປາສັກ ໄດ້ທັງໝົດ 9 ຄົນ.


ທ້າວ ສາຍເມກ ໜຶ່ງໃນຜູ້ຖືກຫາຄະດີທຳຮ້າຍຮ່າງກາຍຈົນຜູ້ອື່ນເຖິງແກ່ຊີວິດ
ຫ້ອງຕຳຫຼວດ ປກສ ແຂວງຈຳປາສັກ ເປີດເຜີຍວ່າ: ມີພົນລະເມືອງດີແຈ້ງເຂົ້າສາຍດ່ວນຂອງ ປກສ ແຂວງ ວ່າ: ເວລາປະມານ 2:00 ໂມງ ຂອງວັນທີ 10 ທັນວາ 2018 ມີກຸ່ມໄວລຸ້ນອາລະວາດຕີກັນຢູ່ໜ້າຮ້ານບັນເທີງແຫ່ງໜຶ່ງ ເຂດບ້ານໂພນສະຫວັນ ນະຄອນປາກເຊ ມີຜູ້ຮັບບາດເຈັບ 3 ຄົນ ແລະ ເສຍ ຊີວິດ 1 ຄົນ. ຜ່ານການລົງກວດກາສະຖານທີ່ເກີດເຫດຮູ້ວ່າຜູ້ເສຍຊີວິດ ຊື່ ທ້າວ ໄຊຍະເວດ ອາຍຸ 24 ປີ ແລະ ຜູ້ຮັບບາດເຈັບ ຊື່ ທ້າວ ໂນວາ ອາຍຸ 28 ປີ, ທ້າວ ໄຊຍະພອນ ອາຍຸ 24 ປີ, ທ້າວ ອຳຄານ ອາຍຸ 23 ປີ ທັງ 4 ຄົນ ຢູ່ບ້ານດອນຕະລາດ ແລະ ທ້າວ ກຸ້ງ ອາຍຸ 23 ປີ ຢູ່ບ້ານຫ້ວຍເງິນ ທັງໝົດຢູ່ນະຄອນປາກເຊ ແຂວງຈຳປາສັກ; ເຊິ່ງຜູ້ກໍ່ເຫດແມ່ນກຸ່ມຂອງ ທ້າວ ສາຍເມກ, ເຈົ້າໜ້າທີ່ ຈຶ່ງຕິດຕາມກັກຕົວພວກກ່ຽວ ໄດ້ໝົດທັງ 9 ຄົນໃນວັນທີ 12-22 ທັນວາ 2018.


ຜູ້ຖືກຫາຈຳນວນ 9 ຄົນ ມີ: ທ້າວ ສາຍເມກ ອາຍຸ 22 ປີ ຢູ່ບ້ານພະບາດ, ທ້າວ ສົມສັກ ອາຍຸ 29 ປີ ຢູ່ບ້ານໂພນສະອາດ; ທ້າວ ດວງຈັນ ອາຍຸ 26 ປີ ຢູ່ບ້ານຊົ້ງ; ທ້າວ ຈິມມີ້ ອາຍຸ 16 ປີ ຢູ່ບ້ານຮ່ອງຄະຍອມ; ທ້າວ ອາລຸນ ອາຍຸ 15 ປີ; ທ້າວ ອ໋ອຍຄຳ ອາຍຸ 25 ປີ ຢູ່ບ້ານຄັນເກີງ; ທ້າວ ສຸກສາຄອນ ຫຼື ໂລ້ ອາຍຸ 17 ປີ ຢູ່ບ້ານແກ້ວສຳພັນ ແລະ ທ້າວ ສິນນະວັດ ອາຍຸ 17 ປີ ຢູ່ບ້ານຫົວແຊ ທັງໝົດຂຶ້ນກັບນະຄອນປາກເຊ ແລະ ທ້າວ ສຸກສາຄອນ ອາຍຸ 15 ປີ ຢູ່ບ້ານຄັນແຍງ ເມືອງໂພນທອງ ແຂວງຈຳປາສັກ.


ຈາກການສອບສວນ, ພວກກ່ຽວຮັບສາລະພາບວ່າ: ໃນຄືນຂອງວັນທີ 9 ທັນວາ 2018 ໄດ້ພາກັນໄປທ່ຽວຮ້ານກິນ-ດື່ມແຫ່ງໜຶ່ງໃນນະຄອນປາກເຊ, ຮອດເວລາ 23:00 ໂມງ ໄດ້ອອກໄປຮ້ານບ້ານເທີງເຂດບ້ານໂພນສະຫວັນ; ເມື່ອເຂົ້າໄປຮ້ານ, ທ້າວ ເຕົ້າ ໄດ້ຜິດຖຽງກັນກັບກຸ່ມໄວລຸ້ນຈຳນວນ 4-5 ຄົນ ທີ່ເຕັ້ນຢູ່ທາງຂ້າງໂຕະແລ້ວລົງມືຕີກັນ. ໃນຂະນະນັ້ນ, ພະນັກງານປ້ອງກັນຮ້ານບັນເທີງໄດ້ເຂົ້າໄປຫ້າມ ແລະ ຄວບຄຸມສະຖານະການໄວໄດ້ ພ້ອມທັງໄລ່ທັງສອງ ກຸ່ມອກນອກຮ້ານ. ສ່ວນກຸ່ມຂອງ ທ້າວ ສາຍເມກ ໄດ້ເຕົ້າໂຮມພັກພວກເຮັດເປັນກຸ່ມແກ້ງຢູ່ທາງໜ້າຮ້ານ, ເພື່ອຫາເລື່ອງຕີກັບຄູ່ກໍລະນີທີ່ມີເລື່ອງກັນຢູ່ໃນຮ້ານ ໃນເວລາທີ່ລໍຖ້າຄູ່ລະນີໄດ້ເຫັນ ທ້າວ ກຸ້ງ (ຜູ້ຮັບບາດເຈັບ) ຂັບລົດຈັກໄປກິນເຂົ້າປຽກຢູ່ຕໍ່ໜ້າຮ້ານບັນເທີງ ພວກກ່ຽວຄິດວ່າແມ່ນກຸ່ມທີ່ມີເລື່ອງກັນຢູ່ພາຍໃນຮ້ານ ຈຶ່ງເຂົ້າຫາເລື່ອງແລ້ວເອົາມີດໄລ່ທຳຮ້າຍຮ່າງກາຍ ທ້າວ ກຸ້ງ ຈົນເຮັດໃຫ້ ທ້າວ ກຸ້ງ ແລ່ນໜີໄປຫາຄວາມຊ່ວຍເຫຼືອຈາກປ້ອງກັນຮ້ານບັນເທີງ ຈຶ່ງເຮັດໃຫ້ພວກກ່ຽວຢຸດເຊົາ ແຕ່ກໍບໍ່ຍອມກັບເມືອ ພ້ອມທັງປິດເສັ້ນທາງການສັນຈອນເຂດດັ່ງກ່າວ.


ໃນຂະນະນັ້ນ, ທ້າວ ໂນວາ, ທ້າວ ໄຊຍະເວດ ແລະ ທ້າວ ອຳຄານ (ຜູ້ເສຍຫາຍ) ໄດ້ຂັບຂີ່ລົດຈັກຜ່ານມາເຫັນເຫດການສົນລະວົນ ຈຶ່ງໄດ້ຈອດລົດຈັກແນມເບິ່ງ, ຈາກນັ້ນ ທ້າວ ສາຍເມກ ໄດ້ຮ້ອງໃສ່ດ້ວຍຄຳບໍ່ສຸພາບຫຼາຍຢ່າງ ພ້ອມທັງຍົກປືນສັ້ນຍິງໃສ່ ທ້າວ ໄຊຍະເວດ ແລະ ທ້າວ ອຳຄານ 2 ຄັ້ງ ແຕ່ບໍ່ຖືກ; ຈາກນັ້ນ, ພວກກ່ຽວໄດ້ໂດດເຂົ້າໄປທຳຮ້າຍ ທ້າວ ໄຊຍະເວດ ແລະ ທ້າວ ອຳຄານ ດ້ວຍການໃຊ້ມີດຟັນ ເຮັດໃຫ້ ທ້າວ ໄຊຍະເວດ ບາດເຈັບສາຫັດ ແລະ ເສຍຊີວິດໃນເວລາຕໍ່ມາ, ສ່ວນ ທ້າວ ອຳຄານ ແລະ ທ້າວ ໂນວາ ໄດ້ຮັບບາດເຈັບສົມຄວນ.


ພາຍຫຼັງພວກກ່ຽວຮູ້ວ່າ ທ້າວ ໄຊ ຍະເວດ ໄດ້ເສຍຊີວິດ ຈຶ່ງພາກັນແຕກແຍກໄປລີ້ຊ່ອນຢູ່ນຳເຮືອນພີ່ນ້ອງໃຜລາວ, ທ້າວ ສຸກສາຄອນ ຫຼື ໂລ້ ໜີໄປພັກເຊົານຳພີ່ນ້ອງຢູ່ບ້ານໂພນເຄັງ ເມືອງໄຊເສດຖາ ນະຄອນຫຼວງວຽງຈັນ ຖືກເຈົ້າໜ້າທີ່ຕາມຈັບທັນ ໃນວັນທີ 12 ທັນວາ, ກັກຕົວ ທ້າວ ດວງຈັນ ໃນວັນທີ 19 ທັນວາ, ກັກຕົວ ທ້າວ ຈີມມີ້ ໃນວັນທີ 20 ທັນວາ, ກັກ ທ້າວ ສຸກສາຄອນ ຫຼື ເປ້ ແລະ ທ້າວ ອາລຸນ ໃນວັນທີ 21 ທັນວາ, ກັກຕົວ ທ້າວ ສາຍເມກ ແລະ ທ້າວ ອ່ອຍຄຳ ໃນວັນທີ 22 ທັນວາ, ກັກຕົວ ທ້າວ ສີນນະວັດ ແລະ ທ້າວ ສຸກສາຄອນ ຫຼື ໂລ້ ໄປດຳເນີນຄະດີໃນເວລາຕໍ່ມາ.

ພາບແລະຂ່າວ: ໜັງສືພິມຄວາມສະຫງົບ