ຫາລືສ້າງແຜນສືບຕໍ່ແກ້ໄຂຄົນຕ່າງປະເທດ ທີ່ເຄື່ອນໄຫວ ບໍ່ຖືກຕ້ອງຕາມກົດໝາຍຂອງ ສປປ ລາວ

ຂປລ. ກອງປະຊຸມທົ່ວປະເທດ ປຶກສາຫາລືກ່ຽວກັບ ແຜນສືບຕໍ່ແກ້ໄຂຄົນຕ່າງປະເທດທີ່ເຄື່ອນໄຫວ ບໍ່ຖືກຕ້ອງຕາມກົດໝາຍ ຂອງ ສປປ ລາວ ໄດ້ປິດລົງດ້ວຍຜົນສຳເລັດ ໃນວັນທີ 8 ມັງກອນ 2019, ໂດຍການເປັນປະທານ ຂອງທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ແລະ ທ່ານ ພົນຕີ ສິນທະວົງ ໄຊຍະກອນ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ເປັນກຽດເຂົ້າຮ່ວມ ຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີຄະນະນຳບັນດາກະຊວງ, ພະແນກແຮງງານສະຫວັດດີການແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມໃນຄັ້ງນີ້, ໄດ້ປຶກສາຫາລື ໃນຫລາຍບັນຫາທີ່ພົ້ນເດັ່ນ ເປັນຕົ້ນ ການອຳນວຍຄວາມສະດວກໃນການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວ ໃຫ້ຄົນຕ່າງປະເທດ ທີ່ເຄື່ອນໄຫວ ບໍ່ຖືກຕ້ອງຕາມກົດໝາຍ ຢູ່ ສປປ ລາວ.

ພ້ອມນັ້ນ, ກໍໄດ້ກຳນົດແຜນຈັດຕັ້ງປະຕິບັດໃນຕໍ່ໜ້າ ໂດຍສ້າງແຜນສືບຕໍ່ການແກ້ໄຂຄົນຕ່າງປະເທດ ທີ່ເຄື່ອນໄຫວບໍ່ຖືກຕ້ອງ ນັບແຕ່ຕົ້ນ ປີ 2019 ເປັນຕົ້ນໄປ, ເຊິ່ງເນື້ອໃນຕົ້ນຕໍຂອງແຜນ ແມ່ນໃຫ້ແຕ່ລະຂະແໜງການ ເພີ່ມທະວີຄວາມຮັບຜິດຊອບ ໃນການນຳເອົາກົດໝາຍ, ລະບຽບການ ຂອງຂະແໜງການກ່ຽວຂ້ອງ ໄປຈັດຕັ້ງປະຕິບັດ ໃຫ້ປະກົດຜົນເປັນຈິງ, ເໝາະກັບສະພາບເງື່ອນໄຂຕົວຈິງ.