ພິທີປະກາດເມືອງເງິນ ເປັນເມືອງ ປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ

0
176
DCIM\100MEDIA\DJI_0106.JPG

ວັນທີ 11 ມັງກອນ 2019 ນີ້ ຢູ່ທີ່ເດີນກິລາ ເມືອງເງິນ ແຂວງ ໄຊຍະບູລີ ໄດ້ຈັດພິທີ ປະກາດເມືອງເງິນ ເປັນເມືອງ ປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂື້ນ. ເປັນກຽດ ເຂົ້າຮ່ວມຂອງທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ມີທ່ານພົງສະຫວັນ ສິດທະວົງ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງ ໄຊຍະບູລີ, ມີອົງການຈັດຕັ້ງມະຫາຊົນມາຈາກສູນກາງ, ພະແນກການ, ກົມກອງ ເມືອງອ້ອມຂ້າງ ແລະ ແຂກທີ່ຖືກເຊີນມາຈາກຕ່າງແຂວງ, ຕະຫຼອດຮອດມວນຊົນຊາວເມືອງເງິນ ເຂົ້າຮ່ວມ ຢ່າງຄັບຄາໜາແໜ້ນ.

ໃນພິທີ ກໍ່ໄດ້ເຄື່ອນກ້ອນກຳລັງຈຳນວນ 17 ກ້ອນ ທີ່ມາຈາກພະນັກງານ, ທະຫານ-ຕຳຫຼວດ ແລະ ປະຊາຊົນພາຍໃນເມືອງ ເຂົ້າສູ່ພິທີ ແລະ ຊົມການສະແດງສິລະປະວັນນະຄະດີ ຊົມການສະແດງກິລາກາຍຍະກຳຂອງນ້ອງນັກຮຽນ, ຈາກນັ້ນທ່ານ ບຸນມີ ຈັນທິບ ກຳມະການພັກແຂວງ ເລຂາພັກເມືອງ ເຈົ້າເມືອງໆເງິນ ໃນນາມປະທານພິທີ ກໍ່ໄດ້ຂື້ນກ່າວຕ້ອນຮັບ ແລະ ລາຍງານການຈັດຕັ້ງປະຕິບັດວຽກງງານຮອບດ້ານຂອງເມືອງ ແລະ ກ່າວເປີດພິທີຢ່າງເປັນທາງການ.



ທ່ານສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ ກໍ່ໄດ້ຂື້ນລາຍງານການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ, ເມືອງເງິນ ປະກອບມີ 22 ບ້ານ, ມີ 282 ໜ່ວຍຄຸ້ມຄອງພົນລະເມືອງ, ມີ 3.477 ຄອບຄົວ, ມີພົນລະເມືອງທັງໝົດ 18.447 ຄົນ, ຍິງ 9.209 ຄົນ ມີ 4 ເຜົ່າໃຫຍ່ຄື: ເຜົ່າລາວ, ເຜົ່າລື້, ເຜົ່າມົ້ງ, ແລະ ເຜົ່າກືມມຸ ໄລຍະຜ່ານມາ ເມືອງເງິນແມ່ນໄດ້ຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ມາແຕ່ຕົ້ນປີ 2012 ເຊິ່ງໄດ້ສຸ່ມໃສ່ປະຕິບັດ ຕາມບາດກ້າວ, ຂັ້ນຕອນ ແລະ ປະເມີນຕາມ 4 ມາດຖານ ຂອງການສ້າງຄອບຄົວ ແລະ 5 ມາດຕະຖານ ຂອງບ້ານເຕົ້າໂຮມຄວາມສາມັກຄີ: ສະແດງອອກ ຄອບຄົວທີ່ ປະຕິບັດໄດ້ ທັງໝົດ 3.202 ຄອບຄົວ ເທົ່າກັບ 90 %, ບ້ານເຕົ້າໂຮມຄວາມສາມັກຄີ ປະຕິບັດໄດ້ 21 ບ້ານ ເທົ່າກັບ 95,45% ຈົນສາມາດປະກາດ ແລະ ຮັບຮອງເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ
ຈາກນັ້ນ ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ກໍ່ໃຫ້ກຽດຂື້ນມອບໃບຢັ້ງຢືນ ເມືອງ ປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງຄະນະປະຈຳສູນກາງແນວລາວສ້າງຊາດ ໃຫ້ກຽດຮັບ ໂດຍແມ່ນທ່ານບຸນມີ ຈັນທິບ ກຳມະການພັກແຂວງ ເລຂາພັກເມືອງ ເຈົ້າເມືອງໆເງິນ.
ຕອນທ້າຍຂອງພິທີ ຄະນະປະທານ-ແຂກ ກໍ່ໄດ້ພ້ອມກັນຂື້ນຕັດແຖບຜ້າ-ປ່ອຍໝາກປູມເປົາ, ລັນຄອງ 9 ບາດ ແລະ ຮ່ວມກັນເປີດປ້າຍ ເມືອງເງິນ ເປັນເມືອງ ປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ອີກດ້ວຍ.
ໂດຍ: ອິນແປງ ແຫວນຄຳ