ເຄັດລັບງ່າຍໆຊ່ວຍສ້າງແຮງໃຈໃຫ້ແກ່ຊີວິດທ່ານ

0
109

ຄວາມຈິງແລ້ວ ຢາທີ່ໃຊ້ປິ່ນປົວອາການຂາດແຮງບັນດານໃຈໄດ້ດີທີ່ສຸດກໍ່ແມ່ນຕົວເຮົາເອງ ຕໍ່ໄປນີ້ກໍ່ແມ່ນ 7 ເຄັດລັບໃນການສ້າງແຮງໃຈໃຫ້ຕົນເອງແບບງ່າຍໆ.

1.ການເປົ້າໝາຍ: ຕັ້ງເປົ້າໝາຍໃຫ້ຈະແຈ້ງ ເພາະຫາກມີເປົ້າໝາຍໃນຊີວິດທີ່ຈະແຈ້ງ ແລະ ຊື່ສັດກັບມັນຫລາຍພໍ ເປົ້າໝາຍຈະເຮັດໜ້າທີ່ປຽບດັ່ງເຂັມທິດນຳທາງທ່ານໄປສູ່ຄວາມສຳເລັດໄດ້. ຄວາມຈິງແລ້ວ ທ່ານກໍ່ປຽບດັ່ງແກ່ນພືດທີ່ລໍຖ້າມື້ຜະລິດດອກອອກໝາກ ເປົ້າໝາຍກໍ່ປຽບດັ່ງດິນທີ່ເປັນແຫລ່ງອາຫານຂອງແກ່ນພືດ ເປົ້າໝາຍທີ່ດີກໍ່ປຽບດັ່ງດິນທີ່ດີ ແລະ ແນ່ນອນໃນບໍ່ຊ້າມັນຈະຊ່ວຍໃຫ້ທ່ານຈະເລີນເຕີບໃຫຍ່ເປັນຕົ້ນໄມ້ໃຫຍ່ ເຊິ່ງປຽບໄດ້ກັບຄວາມສຳເລັດຂອງທ່ານເອງ ດັ່ງນັ້ນ ຈົ່ງຕັ້ງເປົ້າໝາຍຊີວິດໃຫ້ດີ ແລ້ວລົງມືເຮັດຢ່າງຕັ້ງໃຈ ຢ່າລືມວ່າຊີວິດທ່ານມີເວລາບໍ່ຫລາຍ.

2.ຫາຈຸດດ້ອຍຂອງຕົນເອງໃຫ້ພົບ: ທ່ານຕ້ອງຫາໃຫ້ໄດ້ວ່າຈຸດດ້ອຍຂອງທ່ານແມ່ນຫຍັງ ? ທັກສະ, ຄຸນລັກສະນະ ຫລື ອັນໃດທີ່ທ່ານຍັງຂາດຢູ່ແດ່ ? ຫາໃຫ້ພົບວ່າທ່ານຍັງຈະຕ້ອງພັດທະນາໃນດ້ານໃດອີກ ຫາກທົບທວນເບິ່ງແລ້ວ ແຕ່ຍັງຫາບໍ່ໄດ້ ລອງຖາມຄົນໃກ້ຊິດທ່ານເບິ່ງ ເພາະບຸກຄົນເຫລົ່ານີ້ຈະໃຫ້ຄຳຕອບກັບທ່ານໄດ້ຢ່າງແນ່ນອນ. ຈົ່ງຫາໃຫ້ພົບວ່າອັນໃດທີ່ເຮັດໃຫ້ທ່ານຕົກຕໍ່າ, ຢຸດຢູ່ກັບບ່ອນ ຫລື ແມ່ນແຕ່ອັນໃດທີ່ຂັດຂວາງທ່ານບໍ່ໃຫ້ປະສົບຄວາມສຳເລັດ.

3.ຜູກສຳພັນໄມຕີກັບຄົນດີ ແລະ ຄົນເກັ່ງ: ຄຳເວົ້າທີ່ວ່າ ຄົບຄົນພານພານພາໄປຫາຜິດ ຄົບບັນດິດ ບັນດິດພາໄປຫາຜົນ ຍັງຄົງເຕືອນໃຈເຮົາໄດ້ສະເໝີ ຄຳຖາມກໍ່ຄື ໃຜທີ່ທ່ານຄວນຢູ່ໃກ້ຫລາຍທີ່ສຸດ ແນ່ນອນກໍ່ຕ້ອງແມ່ນຄົນທີ່ມີທັດສະນະຄະຕິທີ່ດີ, ຄົນທີ່ມີເປົ້າໝາຍໃນຊີວິດຈະແຈ້ງ, ຄົນທີ່ຮູ້ຕົວດີວ່າພວກເຂົາກຳລັງເຮັດຫຍັງຢູ່ ແລະ ຮູ້ວ່າສິ່ງໃດທີ່ຈະນຳພາພວກເຂົາໄປສູ່ຄວາມສຳເລັດນັ້ນໄດ້ ຍິ່ງຜູ້ຄົນອ້ອມຂ້າງທ່ານມີແຕ່ຄົນທີ່ດີ ແລະ ເກັ່ງ ທ່ານກໍ່ຍິ່ງຈະໄດ້ຮັບແຮງໃຈຫລາຍຂຶ້ນເທົ່ານັ້ນ.

4.ແນວໃດກໍ່ຕາມ, ຢູ່ໃຫ້ຫ່າງຈາກຄົນທີ່ເບິ່ງໂລກໃນແງ່ຮ້າຍເຂົ້າໄວ້ຈະດີທີ່ສຸດ ເພາະການຢູ່ກັບຄົນພວກນີ້ນອກຈາກຈະບໍ່ຊ່ວຍໃຫ້ທ່ານເຂົ້າໃຈຄວາມສຳເລັດແລ້ວ ຊຳ້ພັດຈະເປັນພິດຮ້າຍຕໍ່ທ່ານນຳອີກ ເພາະພວກເຂົາຈະເມົາແຕ່ຈົ່ມ ແລະ ຫຍໍ້ທໍ້ກັບບັນຫາທີ່ໂຮມເຂົ້າມາ ເຊິ່ງມັນບໍ່ເປັນຜົນດີກັບທ່ານແນ່ນອນ.

5.ຫັນມາເອົາໃຈໃສ່ໂຕເອງ: ສິ່ງສຳຄັນອີກຢ່າງໜຶ່ງຄົງໜີບໍ່ພົ້ນເລື່ອງຂອງສຸຂະພາບ ເຊິ່ງການຈະມີສຸຂະພາບທີ່ດີກໍ່ເປັນເລື່ອງທີ່ເຂົ້າໃຈກັນດີຢູ່ແລ້ວວ່າຮ່າງກາຍເຮົາຄວນເລືອກກິນອາຫານທີ່ດີ, ມີປະໂຫຍດຕໍ່ສຸຂະພາບ, ອອກກຳລັງກາຍຢ່າງສະໝໍ່າສະເໝີ ແລະ ພັກຜ່ອນໃຫ້ພຽງພໍ ຍິ່ງຖ້າທ່ານຕ້ອງເຮັດວຽກໜັກຕະຫລອດອາທິດ ກໍ່ຍິ່ງຈະຕ້ອງເຂົ້ານອນໃຫ້ໄວຢ່າງໜ້ອຍ 5 ມື້ຕໍ່ອາທິດ ຈົ່ງຕື່ມພະລັງໃຫ້ຮ່າງກາຍສະເໝີ ພ້ອມສຳລັບການເລີ່ມຕົ້ນມື້ໃໝ່ຢ່າງສົດໃສໝັ້ນໃຈ ແລະ ເຮັດວຽກຢ່າງມີປະສິດທິພາບ.

6.ຈົ່ງເຊື່ອວ່າທ່ານເກັ່ງທີ່ສຸດ: ສິ່ງສຳຄັນຄື ຈົ່ງຈື່ໄວ້ສະເໝີວ່າທຸກໆຄວາມສຳເລັດທີ່ຍິ່ງໃຫຍ່ໃນຊີວິດມັກເລີ່ມຕົ້ນຈາກຈຸດນ້ອຍໆ ດັ່ງການເບິ່ງເຫັນຄຸນຄ່າຂອງຕົວເອງ ດັ່ງນັ້ນ ບໍ່ວ່າທ່ານຈະກຳລັງລົງມືເຮັດຫຍັງຢູ່ກໍ່ຕາມ ຈື່ໄວ້ສະເໝີວ່າທ່ານເກັ່ງທີ່ສຸດ.

7.ກະຕືລືລົ້ນ ແລະ ຫ້າວຫັນເຂົ້າໄວ້: ລອງເຮັດຫຍັງດ້ວຍຄວາມກະຕືລືລົ້ນເບິ່ງ ຢ່າງໜ້ອຍມັນກໍ່ເປັນນິໄສທີ່ສ້າງໄດ້ ແລະ ຍັງຈະເຮັດໃຫ້ທ່ານໂດດເດັ່ນກ່ວາຄົນອື່ນ, ເຊົາອັກຄະຕິກັບທຸກສິ່ງແລ້ວຫັນມາລົງມືເຮັດ ຈື່ໄວ້ວ່າເມື່ອໃດກໍ່ຕາມທີ່ມີຄວາມຄິດດີໆເຂົ້າມາໃນຫົວ ໃຫ້ຟ້າວລົງມືເຮັດທັນທີ ຍິ່ງທ່ານລົງມືເຮັດໄວເທົ່າໃດມັນກໍ່ດີຕໍ່ຕົວທ່ານເທົ່ານັ້ນ ເພາະມັນໝາຍຄວາມວ່າທ່ານກຳລັງພະຍາຍາມມອບສິ່ງດີໆໃຫ້ກັບຕົວທ່ານເອງ ທ່ານກຳລັງຮັກຕົວເອງຫລາຍຂຶ້ນ ແລະ ຜົນທີ່ຕາມມາຈາກການຮັກຕົວເອງກໍ່ຄື ທ່ານກໍ່ຈະເຄົາລົບ ແລະ ມີລະບຽບວິໄນໃນຕົວເອງຫລາຍຍິ່ງຂຶ້ນໂດຍອັດຕະໂນມັດ.


ຂອບໃຈທີ່ມາ: .blogspot.com