ປຶກສາຫາລືການຈັດຕັ້ງປະຕິບັດວຽກງານຂຶ້ນທະບຽນ ແລະ ອອກບັດ ອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດ ທົ່ວເມືອງ ທ່າແຕງ

0
154

ໃນທ້າຍອາທິດຜ່ານມາ ນີ້ ຄະນະປະສານງານຂັ້ນເມືອງ ທ່າແຕງ ແຂວງ ເຊກອງ ໄດ້ຈັດກອງປະຊຸມປຶກສາຫາລືການຈັດຕັ້ງປະຕິບັດວຽກງານການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວຂອງຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຢູ່ເມືອງທ່າແຕງຂຶ້ນຢູ່ທີ່ສະໂມສອນຂອງເມືອງດັ່ງກ່າວ ໂດຍການເປັນປະທານຂອງທ່ານ ສົມເພັດ ເອິດລັດດາ ຄະນະປະຈໍາພັກເມືອງ ຮອງເຈົ້າເມືອງ ທ່າແຕງ ປະທານຄະນະປະສານງານຂັ້ນເມືອງ ພ້ອມດ້ວຍຄະນະທິມງານຈາກຫ້ອງການອ້ອມຂ້າງເມືອງ,ເຂດຈຸດສຸ່ມພັດທະນາ 6 ເຂດ,ປກສ ບໍລິການປະຊາຊົນ ແລະ ອໍານາດການປົກຄອງບ້ານພາຍໃນເມືອງເຂົ້າຮ່ວມ.

ທ່ານ ພັທ ອ່ອນຕາ ສະສົມບັດ ກໍາມະການພັກເມືອງ ຫົວໜ້າກອງບັນຊາການປ້ອງກັນຄວາມສະຫງົບເມືອງ ຄະນະປະສານງານຂັ້ນເມືອງທ່າແຕງ ໄດ້ສະຫຼຸບລາຍງານໂດຍຫຍໍ້ຜົນການຈັດຕັ້ງປະຕິບັດການຂຶ້ນທະບຽນແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດປະຈຳປີ 2017 ແລະ ທິດທາງແຜນການປະຈຳປີ 2018 ຊຶ່ງໄດ້ຍົກໃຫ້ເຫັນຂໍ້ສະດວກ,ຂໍ້ຫຍຸ້ງຍາກໃນການປະຕິບັດ ແລະ ບາງບົດຮຽນທີ່ຖອດຖອນໄດ້ ໃນການປະຕິບັດຕົວຈິງຜ່ານມາ ພ້ອມທັງມີການເຈາະຈີ້ມ ແລະ ປຶກສາຫາລືຕໍ່ກັບວຽກງານດັ່ງກ່າວ ເພື່ອປັບປຸງສະຖານະພາບການຄຸ້ມຄອງຄົນຕ່າງປະເທດໃຫ້ເຂົ້າສູ່ລະບຽບຫຼັກການຕື່ມ,ເພື່ອເຮັດໃຫ້ເຂົາເຈົ້າເຂົ້າມາເຄື່ອນໄຫວປະກອບການຕ່າງໆຢ່າງຖືກຕ້ອງຕາມລະບຽບກົດໝາຍແຫ່ງ ສປປລາວ ໄດ້ກຳນົດໄວ້.ເຊີ່ງປະຈຸບັນ ຄົນຕ່າງປະເທດທີ່ເຂົ້າມາເຄື່ຶອນໄຫວຢູ່ພາຍໃນເມືອງ ທ່າແຕງ,ມີທັງໝົດ 396 ຄົນ,ຍິງ 101 ຄົນ

ໃນນີ້ ສັນຊາດຈີນມີ 31 ຄົນ,ຍິງ 14 ຄົນ,ຫວຽດນາມ 349 ຄົນ,ຍິງ 81 ຄົນ,ໄທ 3 ຄົນ,ຝຣັ່ງ 6 ຄົນ,ຍິງ 4 ຄົນ,ສະວິກເຊີແລນ 1 ຄົນ,ຟິລິບປິນ 4 ຄົນ,ຍິງ 2 ຄົນ ແລະ ສັນຊາດຢີ່ປຸ່ນມີ 2 ຄົນ,ມີເອກະສານຖືກຕ້ອງທັງໝົດ 154 ຄົນ,ຍິງ 31 ຄົນ,ຂໍຂື້ນທະບຽນອະນຸຍາດເຄື່ອນໄຫວຊົ່ວຄາວມີ 189 ຄົນ,ຍິງ 42 ຄົນ,ປັບສະຖານະພາບມີ 168 ຄົນ,ຍິງ 37 ຄົນ,ຊໍາລະສະສາງມີ 21 ຄົນ,ຍິງ 5 ຄົນ,ສ່ວນທີ່ເຫຼືອແມ່ນໄດ້ສ້າງບົດບັນທຶກແນະນໍາກັບຄືນປະເທດ 15 ວັນມີທັງໝົດ 31 ຄົນ,ຍິງ 17 ຄົນ,ໃນນີ້ ເດັກອາຍຸຕໍ່າກວ່າ 15 ປີມີ 22 ຄົນ,ຍິງມີ 11 ຄົນ ເຊິ່ງພາໃຫ້ມີດ້ານຕັ້ງໜ້າ ແລະ ດ້ານຫຍໍ້ທໍ້ພາໃຫ້ເກີດຄວາມບໍ່ເປັນລະບຽບຮຽບຮ້ອຍ ແລະ ເຮັດໃຫ້ການຄຸ້ມຄອງໄດ້ພົບຄວາມຫຍຸ້ງຍາກ. ສະນັ້ນ ເພື່ອຮັບປະກັນໃຫ້ບັນຫາດັ່ງກ່າວ ໄດ້ຮັບການແກ້ໄຂທາງທີ່ດີ ທັງເປັນການປົກປ້ອງສິດ ແລະ ຜົນປະໂຫຍດຂອງແຮງງານເຄື່ອນຍ້າຍ, ເພື່ອໃຫ້ມີຄວາມເປັນເອກະພາບທາງດ້ານການຄຸ້ມຄອງຄົນຕ່າງປະເທດ,ດັ່ງນັ້ນ ທາງລັດຖະບານ ຈຶ່ງມອບໃຫ້ຂະແໜງແຮງງານສະຫວັດດີການ-ສັງຄົມແລະຂະແໜງປ້ອງກັນຄວາມສະຫງົບ ຮ່ວມກັນດຳເນີນການຂຶ້ນທະບຽນ ແລະ ອອກບັດອະນຸຍາດຊົ່ວຄາວໃຫ້ຄົນຕ່າງປະເທດທີ່ຍັງເຄື່ອນໄຫວແບບບໍ່ຖືກຕ້ອງຢູ່ໃນ ສປປ ລາວ.

ພາຍຫຼັງສຳເລັດກອງປະຊຸມ,ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງພາຍໃນເມືອງ ທ່າແຕງ ຕ້ອງຮີບຮ້ອນເອົາໃຈໃສ່ລົງໂຄ
ສະນາເຜີຍແຜ່ໃຫ້ຄົນຕ່າງປະເທດທີ່ອາໃສຢູ່ຕາມບ້ານຕ່າງໆພາຍໃນເມືອງ ທ່າແຕງ,ໃຫ້ຮັບຮູ້ ແລະ ເຂົ້າໃຈ,ເຮັດໃຫ້ຊາວຕ່າງປະເທດໄດ້ເຂົ້າມາສະເໜີຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວຢ່າງຖືກຕ້ອງຕາມລະບຽບກົດໝາຍແຫ່ງ ສປປລາວ ໄດ້ກຳນົດໄວ້ຢ່າງເຂັ້ມງວດ.

ຂ່າວ: ພອນ ບຸນອຸທິດ (ຂ່າວແຂວງເຊກອງ)