ປກສ ແຂວງສະຫວັນນະເຂດ ທຳລາຍອາວຸດລ່າເນື້ອຜິດກົດໝາຍ

0
251

ໃນອາທິດຜ່ານມາ, ກອງບັນຊາການ ປກສ ແຂວງສະຫວັນນະເຂດ ໄດ້ທໍາລາຍອາວຸດລ່າເນື້ອ, ບັ້ງກະໂພກ ແລະ ທາດແຕກຈຳນວນໜຶ່ງທີ່ສູນດັດສ້າງຄຳສະຫວ່າງ (ຫຼັກ33) ເມືອງໄຊພູທອງ. ໂດຍການເຂົ້າຮ່ວມ ຂອງ ພັທ ຈັນທາ ແສນສຸລິວົງ ຮອງຫົວໜ້າກອງບັນຊາການ ປກສ ແຂວງສະຫວັນນະເຂດ, ມີຄະນະຫ້ອງອ້ອມຂ້າງກອງບັນຊາການ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

ພັທ ຈັນທາ ແສນສຸລິວົງ ໃຫ້ຮູ້ວ່າ: ພິທີທໍາລາຍອາວຸດລ່າເນື້ອ, ບັ້ງກະໂພກ ແລະ ທາດແຕກໃນຄັ້ງນີ້ລວມມີ: ອາວຸດ ລ່າເນື້ອທັງໝົດ 9.581 ກະບອກ ແລະ ວັດຖຸຕ້ອງຫ້າມຈໍານວນ 56 ລາຍ ການ, ອາວຸດເສິກ, ທາດເຄມີ, ທາດ ເບື່ອ, ໝາກແຕກ; ເຊິ່ງລ້ວນແຕ່ເປັນອັນຕະລາຍຕໍ່ຊີວິດ, ຕໍ່ຄວາມສະຫງົບ, ທັງເປັນການທຳລາຍຊັບພະຍາກອນ ແລະ ສັດປ່າປະເພດຫວງຫ້າມຕ່າງໆ. ດັ່ງນັ້ນ, ຄະນະພັກ-ຄະນະກອງບັນຊາການ ປກສ ແຂວງ ຈຶ່ງໄດ້ຊີ້ນຳ ປກສ ເມືອງ, ປກສ ກຸ່ມບ້ານ ໃຫ້ເອົາໃຈໃສ່ຄຸ້ມຄອງພົນລະເມືອງ ໂດຍການລົງເກັບກຳຂໍ້ມູນຂຶ້ນບັນຊີເປົ້າໝາຍຜູ້ທີ່ຄອບຄອງ ແລະ ນຳໃຊ້ອາວຸດລ່າເນື້ອທີ່ບໍ່ຖືກຕ້ອງຕາມລະບຽບ, ພ້ອມດຳເນີນການສຶກສາອົບຮົມໃຫ້ມີຄວາມເຂົ້າໃຈຕໍ່ລະບຽບກົດໝາຍ, ມີຄວາມຕື່ນຕົວໃນການສົ່ງມອບອາວຸດ ແລະ ເຄື່ອງມືດັ່ງກ່າວໃຫ້ເຈົ້າໜ້າທີ່ ກໍຄືອຳນາດການ ປົກຄອງທ້ອງຖິ່ນຂອງຕົນ.

ໃນໂອກາດດັ່ງກ່າວ, ທ່ານຮອງຫົວໜ້າກອງບັນຊາການ ປກສ ແຂວງສະຫວັນນະເຂດ ໄດ້ເນັ້ນໃຫ້ບັນດາກໍາລັງວິ ຊາສະເພາະເອົາໃຈໃສ່ປະຕິບັດວຽກງານຢ່າງຕໍ່ເນື່ອງ, ເພາະວ່າອາວຸດດັ່ງກ່າວເປັນອັນຕະລາຍຕໍ່ຊີວິດ ແລະ ສ້າງ ຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍໃນສັງຄົມ ແລະ ໄດ້ຮຽກຮ້ອງໃຫ້ທຸກພາກສ່ວນຊ່ວຍກັນ ສະກັດກັ້ນບັນຫາດັ່ງກ່າວໃຫ້ຫຼຸດໜ້ອຍຖອຍລົງເທື່ອລະກ້າວ.

ທີ່ມາ: ນາພ ຄວາມສະຫງົບ