ພິທີວາງສີລາລຶກໂຄງການກໍ່ສ້າງ ພຣະເຈົ້າໃຫຍ່ ພຸດທະຣັດຕະນະບາຣະມີສຣີບໍ່ແກ້ວ

0
470

ພິທີວາງສີລາລຶກໂຄງການກໍ່ສ້າງ ພຣະເຈົ້າໃຫຍ່ ພຸດທະຣັດຕະນະບາຣະມີສຣີບໍ່ແກ້ວ

ວັນທີ 17 ພຶດສະພາ 2018 ໄດ້ມີພິທີວາງ ສີລາລຶກໂຄງການກໍ່ສ້າງ ພຣະເຈົ້າໃຫຍ່ ພຸດທະຣັດຕະນະບາຣະມີສຣີບໍ່ແກ້ວຂຶ້ນທີ່ ພູ 106 ເມືອງ ຫ້ວຍຊາຍ ແຂວງ ບໍ່ແກ້ວ ໂດຍການເຂົ້າຮ່ວມຂອງ ພຣະເຖລານຸເຖລະ, ພະນະທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ແລະ ອົງການກວດກາລັດຖະບານ ພ້ອມດ້ວຍພັນລະຍາ, ພະນະທ່ານ ສົມສະຫວາດ ເລັ່ງສະຫວັດ ອາດີດກົມການເມືອງສູນກາງພັກ, ອາດີດຮອງນາຍົກລັດຖະມົນຕີ, ບັນດາທ່ານ ການນໍາພັກ-ລັກຂັ້ນສູນກາງ, ຂັ້ນແຂວງ-ເມືອງ ຕະຫຼອດຮອດພໍ່ແມ່ປະຊາຊົນ ແລະ ມວນຊົນເຂົ້າຮ່ວມຢ່າງຫຼວງຫຼາຍ.

ໂຄງການກໍ່ສ້າງພຣະເຈົ້າໃຫຍ່ ກໍ່ສ້າງຂຶ້ນທ່າມກາງການສະເຫຼີມສະຫຼອງວັນສ້າງຕັ້ງແຂວງ ບໍ່ແກ້ວ ຄົບຮອບ 35 ປີຂອງອົງຄະນະພັກ, ອົງການປົກຄອງແຂວງ, ຕະຫຼອດຮອດປະຊາຊົນບັນດາເຜົ່າຢ່າງເປັນຂະບວນຟົດຟື້ນ. ໂຄງການກໍ່ສ້າງພຣະເຈົ້າໃຫຍ່ ປະດິດສະຖານຢູ່ພູໄຊຫົວຂອງບາຣະມີ(ພູ 106) ໂດຍແມ່ນຫ້ອງວ່າການແຂວງບໍ່ແກ້ວເປັນເຈົ້າຂອງໂຄງການ. ພຣະເຈົ້າອົງດັ່ງກ່າວ ແມ່ນພຣະປາງຊະນະມານ ໄດ້ນາມມາຈາກພຣະເຈົ້າແສນແຊ່ ໄດ້ປະດິດສະຖານຢູ່ວັດສີບຸນເຮືອງ ເມືອງ ຕົ້ນເຜີ້ງ ແຂວງ ບໍ່ແກ້ວ ໃນປີ ພສ 2386 ຄສ 1843 ຈສ 1205 ຕົວ. ເຊິ່ງເປັນພຣະເຈົ້າທີ່ມີຄວາມໝາຍສໍາຄັນທາງພຸດທະສາສະໜາ ທີ່ມີຄວາມສວຍສົດງົດງາມ, ເປັນພຣະອົງທີ່ສັກສິດຄູ່ບ້ານຄູ່ເມືອງ, ມີບາຣະມີສູງ ເປັນສູນລວມຈິດໃຈຂອງປະຊາຊົນ. ສະນັ້ນ ຄະນະນໍາຂອງແຂວງ ຈຶ່ງໄດ້ຕົກລົງເຫັນດີເປັນເອກະພາບ ສ້າງພຣະເຈົ້າໃຫຍ່ ໂດຍຖວາຍພະນາມ (ຕັ້ງຊື່)ວ່າ: ພຣະພຸດທະຣັດຕະນະບາຣະມີສຣີບໍ່ແກ້ວ ເຊິ່ງກໍານົດເອົາພູ 106 ເປັນຈຸດທີ່ຕັ້ງ ເພື່ອເປັນບ່ອນສັກກະລະບູຊາ, ເປັນສູນລວມຈິດໃຈຂອງຊາວພຸດທະສານິກະຊົນລາວ ກໍຄືຊາວແຂວງບໍ່ແກ້ວ, ສ້າງໃຫ້ກາຍເປັນແຫຼ່ງທ່ອງທ່ຽວທີ່ສໍາຄັນທາງວັດທະນະທໍາ ຕິດພັນກັບທໍາມະຊາດ, ມູນເຊື້ອທາງດ້ານປະຫວັດສາດ.

ເຊິ່ງແມ່ນບໍລິສັດຮ່ວມໃຈສໍາຫຼວດອອກແບ ແລະ ທີ່ປຶກສາຈໍາກັດ ເປັນບໍລິສັດສໍາຫຼວດອອກແບບ ໃນເນື້ອທີ່ 14 ເຮັກຕາ, ການຄິດໄລ່ມູນຄ່າການກໍ່ສ້າງແມ່ນ 54.847.369.315 ກີບແລະ ບໍລິສັດ ຫ່າຍເຊິງ ລາວ ຈໍາກັດ ເປັນຜູ້ຮັບເໝົາກໍ່ສ້າງ ໂດຍທຶນສົມທົບຈາກ ຄະນະອົງການພຸດທະສາສະໜາ, ຄະນະຂັ້ນສູງ, ຄະນະນໍາຂອງແຂວງ, ບໍລິສັດຜູ້ລົງທຶນ, ນັກທຸລະກິດ, ຜູ້ປະກອບການ ແລະ ມວນຊົນ ໄດ້ມີສັດທາຮ່ວມກັນໃນການສ້າງບຸນກຸສົນ ກໍ່ສ້າງອົງພຣະເຈົ້າໃຫຍ່ ເຊິ່ງມີສັດສ່ວນທີ່ຈະສ້າງໜ້າຕັດກວ້າງຈາກເຂົ່າຊ້າຍຫາເຂົ່າຂວາ 17,1 ແມັດ, ສູງຈາກຫນ້າແທ່ນ ເຖີງຈອມເກດ 25,2 ແມັດ ລວມນໍ້າໜັກ 90,78 ໂຕນ. ພິທີທາງສາສະໜາວາງສີລາລຶກມີພຣະ 35 ອົງເຂົ້າຮ່ວມ, ໄດ້ກໍານົດປ້າຍສິລາລຶກປະພດຫີນອ່ອນ ແລະ ພີທີກໍາຕ່າງໆຕາມພຣະພຸດທະສາສະໜາ.

ທ່ານ ຄໍາພັນ ເຜີຍຍະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ບໍ່ແກ້ວກ່າວວ່າ: ໂຄງການກໍ່ສ້າງພຣະເຈົ້າໃຫຍ່ ພຣະພຸດຕະນະບາລະມີສຮິບໍ່ແກ້ວ ທີ່ພູໄຊຫົວຂອງ ແຫ່ງນີ້ ແມ່ນສຸດທີ່ມີຄວາມໝາຍສໍາຄັນທາງດ້ານປະຫວັດສາດຂອງແຂວງ ເຊິ່ງເປັນໂຄງການທີ່ໄດ້ຜ່ານການສຶກສາ, ຄົ້ນຄວ້າ ແລະ ອອກແບບຢ່າງລະອຽດ ມາເປັນເວລາ 2 ປີ ກວ່າ ໂດຍໄດ້ຮັບການສະໜັບສະໜູນ ເຫັນດີເຫັນພ້ອມ ຈາກລັດຖະບານ, ອົງການພຸດທະສາສະໜາສໍາພັນລາວ ແລະ ພາກສ່ວນກ່ຽວຂ້ອງຂັ້ນສູນກາງ ກໍ່ຄືທ້ອງຖິ່ນ, ພິເສດແມ່ນໄດ້ຮັບການສະໜັບສະໜູນຈາກປະຊາຊົນບັນດາເຜົ່າ.

ພູ 106 ຫຼື ພູໄຊຫົວຂອງບາຣະມີ ນີ້, ໃນເມື່ອກ່ອນນອກຈາກຈະເປັນພູທີ່ອຸດົມສົມບຸນ ແລະ ສວຍສົດງົດງາມທາງດ້ານທໍາມະຊາດແລ້ວ, ພູແຫ່ງນີ້ຍັງເປັນບ່ອນສັກສິດທີ່ຊ່ວຍປົກປ້ອງຄຸ້ມຄອງ ເອົາການນໍາ ກໍຄືນັກປະຕິວັດ ໃນໄລຍະການຕໍ່ສູ້ກູ້ຊາດ ໂດຍອາໄສພູແຫ່ງນີ້ເປັນບ່ອນເຄື່ອນໄຫວລີ້ຊ້ອນ ເພື່ອປົດປ່ອຍເມືອງຫ້ວຍຊາຍ ແຂວງບໍ່ແກ້ວ ອອກຈາກການຄອບຄອງຂອງພວກລ່າເມືອງຂຶ້ນຝຣັ່ງ. ມາໃນໄລຍະແຫ່ງການປົກປັກຮັກສາ ແລະ ພັດທະນາປະເທດຊາດ ພູແຫ່ງນີ້ ຍັງເປັນສະຖານທີ່ທີ່ມີຄວາມສັກສິດ ແລະ ເປັນບ່ອນທີ່ປະທັບໃຈຊາວບໍ່ແກ້ວ ແລະ ແຂກຕ່າງດ້າວຂາວແຕ່ງແດນ, ເຊິ່ງສະຖານທີ່ແຫ່ງນີ້ ຈະກາຍເປັນໃຈກາງຕົວເມືອງຫ້ວຍຊາຍໃນອານະຄົດ ແລະ ຈະກາຍເປັນຈຸດໃຈກາງຂອງການພັດທະນາທາງດ້ານເສດຖະກິດ-ສັງຄົມ, ວັດທະນະທໍາ, ສາສະໜາ, ທ່ອງທ່ຽວ ແລະ ເປັນບ່ອນສັກກະລະບູຊາຂອງປະຊາຊົນບັນດາເຜົ່າແຂວງບໍ່ແກ້ວ.

ພິທີດັ່ງກ່າວ ໃຫ້ກຽດລັ່ນຄ້ອງ 9 ບາດ ເພື່ອເປັນສິຣິມຸງຄູນໂດຍ ພະນະທ່ານ ບຸນທອງ ຈິດມະນີ ຮອງນາຍົກລັດຖະມົນຕີ.

ຂ່າວ – ພາບ : ບຸນເພັດ ໄຊຍະວົງ