ຂ່າວດີ! ສຳລັບນ້ອງນັກຮຽນ-ນັກກິລາທີ່ສົນໃຈຢາກຮໍ່າຮຽນຢູ່ ໂຮງຮຽນພອນສະຫວັນກິລາ-ກາຍະກຳ

0
329

ຂ່າວດີ! ສຳລັບນ້ອງນັກຮຽນ-ນັກກິລາທີ່ສົນໃຈຢາກຮໍ່າຮຽນຢູ່ ໂຮງຮຽນພອນສະຫວັນກິລາ-ກາຍະກຳ ທາງໂຮງຮຽນໄດ້ປະກາດຮັບສະຫມັກສອບເສັງຊິງທຶນການສຶກສາ ສົກຮຽນ 2018-2019 ຊັ້ນມໍຕົ້ນຂຶ້ນມໍປາຍ ຮັບສະຫມັກດ່ວນທົ່ວປະເທດ ຈົນເຖິງວັນທີ 22 ພຶດສະພານີ້!!

ທ່ານ ກໍລະກົດ ສີເມືອງຊອງ ຮອງຜູ້ອຳນວຍການໂຮງຮຽນພອນສະຫວັນກິລາ-ກາຍະກໍາ ກ່າວໃຫ້ຮູ້ວ່າ: ອີງຕາມການຊີ້ນຳຂອງ ກະຊວງສຶກສາທິການ ແລະ ກິລາ ໃນການພັດທະນານັກກິລາລຸ້ນສືບທອດ, ທາງໂຮງຮຽນຈຶ່ງໄດ້ປະກາດຮັບສະຫມັກນັກຮຽນ-ນັກກິລາທົ່ວປະເທດ ເພື່ອສອບເສັງຊິງທຶນການສຶກສາ ສົກຮຽນ 2018-2019 ຊັ້ນມໍຕົ້ນຂຶ້ນມໍປາຍ ຫລື ມໍ 4 ຂຶ້ນມໍ 5 ຈໍານວນ 60 ທຶນ. ປະກອບມີການຮຽນການສອນ 11 ປະເພດກິລາປາຍແຫລມຂອງລາວເຮົາຄື: ກິລາເທຄວັນໂດ້, ຢູໂດ້, ຄາຣາເຕ້, ວູຊູ, ມວຍປໍ້າ, ມວຍສາກົນ, ແລ່ນ-ລານ, ຍົກນໍ້າຫນັກ, ຍິງທະນູ, ພິເສດມີ 2 ກິລາໃຫມ່ຄື: ເປຕັງ ແລະ ປິ່ງປ່ອງ.

ເປີດຮັບສະຫມັກຟຣີ ແຕ່ນີ້ຈົນເຖິງວັນທີ 22 ພຶດສະພານີ້, ສົນໃຈສອບຖາມຂໍ້ມູນໄດ້ທີ່ພະແນກສຶກສາທິການ ແລະ ກິລາ ຂອງແຕ່ລະແຂວງ, ສຳລັບການສອບເສັງຄັດເລືອກຮອບທຳອິດ ຈະມີຂຶ້ນໃນວັນທີ 19-20 ມິຖຸນາ 2018 ໂດຍຈະຄັດເອົາຢ່າງຕໍ່າ 120 ຄົນ, ຈາກນັ້ນ ຈະມາຮ່ວມຝຶກແອບກັບຄະນະຄູຝຶກແຕ່ລະປະເພດກິລາ ຢູ່ໂຮງຮຽນພອນສະຫວັນກິລາ-ກາຍະກຳ ນະຄອນຫລວງວຽງຈັນ ເປັນເວລາ 15 ວັນ ແລະ ຫລັງຈາກນັ້ນ ຈະສອບເສັງຄັດເລືອກຮອບສຸດທ້າຍເອົາ 60 ຄົນຕາມໂຄຕ້າ ເຂົ້າຮຽນຢູ່ໂຮງຮຽນຈົນຈົບມໍ 7 ແລະ ກາຍເປັນກຳລັງຫລັກຂອງທິມຊາດໃນອານາຄົດ.

ພິເສດຜູ້ທີ່ຮຽນຈົບຈາກໂຮງຮຽນຈະໄດ້ ສຶກສາຕໍ່ປະລິນຍາຕີ ຢູ່ຄະນະວິທະຍາສາດການກິລາ ມະຫາວິທະຍາໄລແຫ່ງຊາດ ໂດຍບໍ່ຕ້ອງສອບເສັງ ຊຶ່ງມະຫາວິທະຍາໄລແຫ່ງຊາດ ຈະນຳໄປສ້າງຕໍ່ເປັນບຸກຄະລາກອນດ້ານກິລາຂອງຊາດ ເຊັ່ນດຽວກັບ ວິທະຍາໄລ ພະລະສຶກສາ.

ເງື່ອນໄຂຜູ້ສະຫມັກເຄີຍເປັນນັກກິລາມາກ່ອນ, ມີພື້ນຖານກິລາດີ, ມີຜົນງານຍິ່ງເປັນການດີ. ສ່ວນເລື່ອງຮູບການຮຽນ ເປັນໂຮງຮຽນກິນນອນ, ຮຽນພາກເຊົ້າ, ພາກບ່າຍ ແລະ ແລງ ຝຶກແອບກິລາ, ການກິນຢູພັກເຊົາ ແລະ ສິ່ງອຳນວຍຄວາມສະດວກປະຈຳວັນ ທາງໂຮງຮຽນເປັນຜູ້ຮັບຜິດຊອບຫມົດ ລວມທັງຊຸດຝຶກແອບ, ຊຸດແຂ່ງຂັນ ແລະ ອຸປະກອນການຝຶກແອບ, ລູກຫລານຂອງທ່ານຈະໄດ້ຮັບການເບິ່ງແຍງເປັນຢ່າງດີ ແຕ່ຕ້ອງຢູ່ໃນລະບຽບຂອງໂຮງຮຽນຢ່າງເຄັ່ງຄັດ. ຖ້າມີຜົນງານດີ, ຮຽນດີ ເປັນນັກກິລາເກັ່ງ ທາງໂຮງຮຽນມີລາງວັນໃຫ້.

ສົ່ງຕໍ່! ແຊຣຕໍ່ໃຫ້ລູກຫລານເຮົາເດີ! ເພື່ອສ້າງນັກກິລາຮ່ວມກັນ!!

ວັນທີ 19-20 ມິຖຸນາ 2018 ທີ່ ໂຮງຮຽນພອນສະຫວັນກິລາ-ກາຍຍຳກຳ ສະຖານທີຕັ້ງຢູ່ ສູນຝຶກກິລາແຫ່ງຊາດ (ບ້ານສີເກີດ) 021-612418

Photo: ສະຫະພັນເທຄວັນໂດແຫ່ງຊາດລາວ Lao Taekwondo Federation & Lao Karatedo Federation-LKF & Lao judo Federation & LaoBoxingFederation & Laos Wrestling

Cr: ຂ່າວກິລາ National TV