ຍາດເວລາພາຍຫຼັງເລີກໂມງລັດຖະການ ແລະ ວັນພັກ ເພື່ອສ້າງເສດຖະກິດຄອບຄົວ

0
1846

ທ່ານ ວິໄລ​ວັນ ພົມ​ເຂ ໃຫ້​ສຳພາດ​ວ່າ: ຂ້າພະເຈົ້າ​ໄດ້​ພົ້ນ​ອາຍຸ​ກະສຽນ​ເຮັດ​ວຽກ​ນຳ​ພັກ-ລັດ ແລະ ໄດ້​ເຂົ້າ​ຮັບ​ເບ້ຍ​ບຳນານ​ກ່ອນ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ການ​ທີ່​ມີ​ຄວາມ​ມັກ​ຮັກ​ດ້ານ​ວຽກ​ງານ​ກະສິກຳ​ ແລະ ປ່າໄມ້ ກໍ່​ຍ້ອນ​ຕົ້ນ​ກຳເນີດ​ເປັນ​ຊາວ​ກະສິກຳ ພໍ່-ແມ່​ເຄີຍ​ພາ​ເຮັດ​ໄຮ່​ເຮັດ​ນາ​ມາ​ແຕ່​ຍັງ​ນ້ອຍ ກ່ອນ​ການ​ປະຕິວັດ ກໍ່​ຄື ໄລຍະ​ເຂົ້າ​ຮ່ວມ​ການ​ປະຕິວັດ 40 ກວ່າ​ປີຜ່ານມາ ຕົນ​ເອງ​ກໍ່​ບໍ່​ໄດ້​ປະ​ອາຊີບ​ພໍ່-ແມ່​ພາ​ເຮັດ​ພາ​ທຳ​ ເພື່ອ​ສ້າງ​ເສດຖະກິດ​ຄອບຄົວ​ໃຫ້​ດີ​ຂຶ້ນ ພາຍຫຼັງ​ປະຕິບັດມາ​ໄດ້​ໄລຍະ​ໜຶ່ງ ​ພັກ ແລະ ລັດຖະບານ ກໍ່​ໄດ້​ວາງ​ນະໂຍບາຍ​ອອກ​ຢ່າງ​ຈະແຈ້ງ ໂດຍ​ສະເພາະ ນັບ​ແຕ່​ກອງ​ປະຊຸມ​ໃຫຍ່ ຄັ້ງ​ທີ IV ຂອງ​ພັກ (ປີ 1986 ເປັນຕົ້ນ​ມາ) ເຊິ່ງ​ໄດ້​ຖື​ເອົາ​ເສດຖະກິດ​ຄອບຄົວ​ເປັນ​ໜຶ່ງ​ ໃນ​ຈຳນວນ​ລາຍ​ຮັບ​ຂອງ​ພະນັກງານ ໂດຍ​ອີງ​ຕາມ​ຄວາມ​ສາມາດ​ຕົວ​ຈິງ​ຂອງ​ແຕ່​ລະ​ຄອບຄົວ ເປັນຕົ້ນ ​ເຮັດ​ສວນ ປູກຝັງ-ລ້ຽງສັດ ແລະ​ອື່ນໆ

ໃນ​ເງື່ອນໄຂ​ທີ່​ປະເທດ​ເຮົາ​ມີ​ດິນ​ດອນ​ຕອນ​ຫຍ້າ​ສະດວກ​ສະບາຍ ສະນັ້ນ ໃນ 26 ປີຜ່ານມາ ຂ້າພະເຈົ້າ​ພ້ອມ​ດ້ວຍ​ຄອບຄົວ ​ຈຶ່ງ​ໄດ້​ໄປ​ຊອກ​ສະຖານທີ່​ທຳ​ການ​ຜະລິດ ຈົນ​ມາ​ໄດ້​ດິນ​ທີ່​ພີ່ນ້ອງ​ແບ່ງ​ໃຫ້​ຢູ່​ບ້ານ​ຈຳປາ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ຈຳນວນ 1 ເຮັກຕາ ມາ​ຮອດ​ໄລຍະ​ໜຶ່ງ​ກໍ່​ໄດ້​ຊື້​ເພີ່ມ 2 ເຮັກຕາ ລວມ​ເປັນ 3 ເຮັກຕາ​ເຊິ່ງ​ໄດ້​ບຸກເບີກ​ເປັນ​ໜອງ​ປາ ແລະ ບ່ອນ​ປູກຝັງ-ລ້ຽງສັດ​ຈຳນວນ​ໜຶ່ງ ໂດຍ​ໄດ້​ຍາດ​ເວລາ​ພາຍຫຼັງ​ເລີກ​ໂມງ​ລັດ​ຖະ​ການ ແລະ ວັນ​ພັກ (ເສົາ-ອາທິດ) ເພື່ອ​ທຳ​ການ​ຜະລິດ (ລ້ຽງ​ເປັດ ໄກ່ ປາ ປູກ​ຕົ້ນໄມ້​ໃຫ້​ໝາກ) ຈົນ​ຮອດ​ທຸກ​ວັນ​ນີ້ ຜ່ານ​ການ​ໄລ່​ລຽງ​ເສດຖະກິດ​ມາ​ຮອດ​ປັດຈຸບັນ​ ສາມາດ​ເວົ້າ​ໄດ້​ວ່າ​ຍັງ​ບໍ່​ທັນ​ໄດ້​ຮັບ​ຜົນ​ພໍ​ເທົ່າໃດ ແຕ່​ກໍ່​ຖື​ວ່າ​ເປັນ​ການ​ປະກອບສ່ວນ​ສຳຄັນ​ສົມຄວນ ປະມານ 1/3 ຂອງ​ລາຍ​ຮັບ​ສະເລ່ຍ​ຂອງ​ຄອບຄົວ.

ພາຍຫຼັງ​ເຂົ້າ​ຮັບ​ບຳນານ​ແລ້ວ ຂ້າພະເຈົ້າ​ພ້ອມ​ດ້ວຍ​ຄອບຄົວ​ ຍັງ​ໄດ້​ໄປ​ສ້າງຕັ້ງ​ຟາມ​ຄົບ​ວົງ​ຈອນ​ຢູ່​ແຂວງ​ບໍ​ລິ​ຄຳ​ໄຊ (ບ້ານ​ເກີດ​ຂອງ​ພັນ​ລະ​ຍາ) ມີ​ເນື້ອທີ່ 30 ເຮັກຕາ ໃນ​ນີ້​ໄດ້​ລ້ຽງ​ງົວ 10 ກວ່າ​ໂຕ ໝູ 200 ໂຕ ນອກ​ນີ້​ຍັງ​ມີ​ແບ້ ໄກ່ ເປັດ ປາ ໄມ້​ໃຫ້​ໝາກ ແລະ ປູກ​ຢາງພາລາ​ຈຳນວນ​ໜຶ່ງ ໃນ​ນີ້ ປະເພດ​ໄມ້​ໃຫ້​ໝາກ​ເຊັ່ນ: ໝາກກ້ວຍ ໝາກມ່ວງ ໝາກມີ້ ໝາກ​ນັດ ແລະ ປະເພດ​ປາ​ແມ່ນ​ໄດ້​ຊົມໃຊ້​ແລ້ວ ແລະ ໄດ້​ຂາຍ​ອອກ​ຈຳນວນ​ໜຶ່ງ ສະເລ່ຍ​ລາຍ​ຮັບ 30-40 ລ້ານ​ກີບ​ຕໍ່​ປີ ສະຫຼຸບ​ແລ້ວ​ຊີວິດ​ການ​ເປັນ​ຢູ່​ຂອງ​ຕົນ​ພາຍຫຼັງ​ບຳນານ​ແມ່ນ​ບໍ່​ມີ​ຫຍັງ​ຝືດເຄືອງ ອັນ​ນີ້​ແມ່ນ​ນະໂຍບາຍ​ຂອງ​ພັກ-ລັດ ຂ້າພະເຈົ້າ​ຂໍ​ຢືນຢັນ​ວ່າ​ແມ່ນ​ນະໂຍບາຍ​ທີ່​ຖືກຕ້ອງ​ທີ່​ສຸດ ສຳລັບ​ທິດ​ທາງ​ຕໍ່ໜ້າ​ຢູ່​ບ້ານ​ຈຳປາ ຂ້າພະເຈົ້າ​ຄິດ​ວ່າ​ຈະ​ປັບປຸງ​ສິ່ງ​ທີ່​ມີ​ໃນ​ປັດຈຸບັນ​ໃຫ້​ດີ​ກວ່າ​ເກົ່າ ເພື່ອ​ແນໃສ່​ຍົກ​ສູງ​ຄຸ​ນະພາບ​ປະ​ສິດທິ​ຜົນ​ຂອງ​ການ​ຜະລິດ​ໃຫ້​ດີ​ຂຶ້ນ ສ່ວນ​ຢູ່​ແຂວງ​ບໍ​ລິ​ຄຳ​ໄຊ​ແມ່ນ​ມີ​ແນວ​ຄິດ​ຢາກ​ພັດທະນາ​ເປັນ​ບ່ອນ​ທ່ອງ​ທ່ຽວ.

ທີ່ມາ: ນສພ ວຽງຈັນໃຫ່ມ