ຈັບແກ໋ງຄົນຈີນ ຄາເຮືອນພັກ ພ້ອມບັດເຄດິດປອມ ທີ່ນຳໃຊ້ບັດຮູດເງິນ ຜ່ານເຄື່ອງເອດີຊີຂອງທະນາຄານຮ່ວມພັດທະນາ

    ໃນຕົ້ນເດືອນພຶດສະພານີ້, ກົມຕຳຫຼວດເສດຖະກິດ ຮ່ວມກັບ ກອງຕຳຫຼວດເສດຖະກິດ ປກສ ແຂວງວຽງຈັນ ນຳກຳລັງເຈົ້າໜ້າທີ່ວິຊາສະເພາະ ເຂົ້າຈັບກຸ່ມແກ້ງຊາວຕ່າງຊາດ 5 ຄົນ ທີ່ນຳໃຊ້ຂໍ້ມູນລະຫັດບັດເຄດິດຂອງຄົນອື່ນທີ່ຢູ່ຕ່າງປະເທດ ມາເຄື່ອນໄຫວຮູດເອົາເງິນຜ່ານເຄື່ອງເອດີຊີຂອງທະນາຄານຮ່ວມພັດທະນາ ຢູ່ທີ່ແຂວງວຽງຈັນ ພ້ອມຂອງກາງໃນການເຄື່ອນໄຫວກະທຳຜິດ ລວມມີບັດເຄດິດປອມຈຳນວນ 3 ບັດ, ໂນດບຸກ 2 ເຄື່ອງ, ເຄື່ອງພິມຂໍ້ມູນບັດ 2 ເຄື່ອງ, ເຄື່ອງເອດີຊີ ຫຼື ເຄື່ອງຮູດບັດຂອງທະນາຄານຮ່ວມພັດທະນາ ຈຳນວນ 1 ຊຸດ ແລະ ໃບບິນເຊວສະລິບຂອງທະນາຄານຮ່ວມພັດທະນາ ທີ່ອອກຊື່ເຈົ້າຂອງບັນຊີ ແມ່ນ LEOKHA MRESORT ລວມຈຳນວນເງິນ 4.611 ໂດລາສະຫະລັດ.

    ເຈົ້າໜ້າທີ່ຕຳຫຼວດເສດຖະກິດ ປກສ ແຂວງວຽງຈັນ ໃຫ້ຮູ້ວ່າ: ເບື້ອງຕົ້ນໄລຍະເດືອນທັນວາ 2017, ພວກຜູ້ຖືກຫາ 3 ຄົນ ມີທ້າວ ຈາຕຸຍ ສັນຊາດໄທ, ທ້າວ ລູລາວເອີ ແລະ ທ້າວ ລຽງໂບຈຸ້ນ ທັງ 3 ສັນຊາດຈີນ ໄດ້ເຂົ້າມາປະເທດລາວ ແລ້ວພວກກ່ຽວໄດ້ໄປພັກເຊົາຢູ່ທີ່ບ້ານພັກແຫ່ງໜຶ່ງຢູ່ເມືອງວຽງຄໍາ ແຂວງວຽງຈັນ ໂດຍພວກກ່ຽວໄດ້ໃຊ້ກົນອຸບາຍຕົວະ ນາງ ໜູແດງ ( ເຈົ້າຂອງບ້ານພັກ ) ວ່າຢູ່ບ້ານພັກມີເຄື່ອງເອດີຊີ ຫຼື ເຄື່ອງຮູດບັດເຄຣດິດຂອງທະນາຄານບໍ ເພາະວ່າ ທ້າວ ລູລາວເອີ ແລະ ທ້າວ ລຽງໂບຈຸ້ນ ກໍາລັງລົງທຶນເຮັດທຸລະກິດຢູ່ປະເທດລາວ ເຊິ່ງພວກກ່ຽວມີບັນຊີເງິນຝາກທະນາຄານຢູ່ຕ່າງປະເທດ ຖ້າຫາກວ່າ ນາງ ໜູ່ແດງ ອານຸມັດ ໃຫ້ໃຊ້ບັດເຄດິດຂອງພວກກ່ຽວຜ່ານເຄື່ອງຮູບບັດ ຈະໃຫ້ເງິນຄ່າບໍລິການ 6% ຂອງມູນຄ່າເງິນຮູດ. ຈາກນັ້ນ, ນາງ ໜູແດງ ໄດ້ໃຫ້ພວກກ່ຽວໃຊ້ບັດເຄດິດຮູດເງິນຜ່ານເຄື່ອງເອດີຊີຂອງທະນາຄານຮ່ວມພັດທະນາ ຕັ້ງຢູ່ພາຍໃນເຮືອນພັກ. ເຊິ່ງໃນຮູບການຮູດບັດຕົວຈິງແມ່ນໄດ້ເງິນຈາກບັດເຄດິດມາເຂົ້າບັນຊີຂອງເຮືອນພັກ ຈໍານວນ 128.000 ໂດລາສະຫະລັດ, ພາຍຫຼັງເງິນເຂົ້າບັນຊີແລ້ວ, ນາງ ໜູ ແດງ ໄດ້ພາພວກກ່ຽວໄປຖອນເອົາເງິນຢູ່ທະນາຄານຮ່ວມພັດທະນາ ຫຼັງຈາກໄດ້ເງິນກໍພາກັນຫຼົບໜີ.

    ມາວັນທີ 2 ພຶດສະພາ 2018, ທ້າວ ຈາຕຸຍ, ທ້າວ ລູລາວເອີ ແລະ ທ້າວ ລຽງໂບຈຸ້ນ ໄດ້ໂທຫາ ນາງ ໜູແດງ ອີກ ເພື່ອຂໍເອົາບັດເຄດິດມາຮູດຜ່ານເຄື່ອງອີກ. ຫຼັງຈາກນັ້ນ, ນາງ ໜູແດງ ຈຶ່ງໄດ້ແຈ້ງເຈົ້າໜ້າທີ່ກັກຕົວພວກກ່ຽວ ຜ່ານການກວດຄົ້ນຫ້ອງເຊົ່າພົບເຫັນພັກພວກຕື່ມອີກ 2 ຄົນ ຊື່ ທ້າວ ເຈີນເຈີຊີນ ອາຍຸ 33 ປີ ແລະ ທ້າວ ລູເວມິງ ອາຍຸ 33 ປີ ທັງ 3 ສັນເຊື້ອຊາດຈີນ ຢູ່ໃນເຮືອນພັກແຫ່ງໜຶ່ງເຂດບ້ານເມືອງເກົ່າ ເມືອງວຽງຄໍາ ແຂວງວຽງຈັນ ພ້ອມບັດເຄດິດປອມທີ່ໃຊ້ເຂົ້າໃນກະທໍາຜິດໄປດໍາເນີນຄະດີ.

    ທ່ານ ສູນທອນ ຈັນທະວົງ ຮອງປະທານບໍລິຫານທະນະຄານຮ່ວມພັດທະນາ ໄດ້ໃຫ້ສໍາພາດຕໍ່ໜັງສືພິມຄວາມສະຫງົບ ວ່າ: ຜ່ານມາກໍເຄີຍມີກຸ່ມບໍ່ດີຈໍານວນໜຶ່ງ ໂດຍສະເພາະແມ່ນຄົນຕ່າງປະເທດ ໄດ້ແຮກເຂົ້າບັດເຄດີດຂອງຄົນອື່ນຢູ່ຕ່າງປະເທດ ແລ້ວມາເຮັດບັດປອມເຄື່ອນໄຫວຮູດເງິນຢູ່ ສປປ ລາວ ແລະ ຢູ່ຕ່າງປະເທດ. ດັ່ງນັ້ນ, ຈຶ່ງໄດ້ຮຽກຮອງໃຫ້ພໍ່ແມ່ປະຊາຊົນ, ພໍ່ຄ້າຊາວຂາຍທີ່ນໍາໃຊ້ເຄື່ອງຮູດເງິນ ( EDC ) ຂອງທະນາຄານ ຈົ່ງມີສະຕິຕໍ່ກຸ່ມຄົນບໍ່ຫວັງດີທີ່ຈະມາສວຍໃຊ້ເປັນບ່ອນຮູດເງິນທາງບັດເຄດີດ ແລະ ເມື່ອພົບເຫັນປະກົດການດັ່ງກ່າວ ແມ່ນໃຫ້ແຈ້ງຕໍ່ເຈົ້າໜ້າທີ່ທີ່ກ່ຽວຂ້ອງ ເພື່ອຈະແກ້ໄຂໃຫ້ທັນການ ແລະ ຖ້າຫາກໃຫ້ຄວາມຮ່ວມມືກັບຜູ້ກະທໍາຜິດ ກໍຈະຖືກດໍາເນີນຄະດີຕາມກົດໝາຍ.