ເມືອງເງິນ ແຂວງໄຊຍະບູລີ ຈັດພິທີສະເຫຼີມສະຫຼອງ ວັນເດັກນ້ອຍສາກົນ , ວັນປູກຕົ້ນໄມ້ແຫ່ງຊາດ

0
462

ເມືອງເງິນ ແຂວງໄຊຍະບູລີ ຈັດພິທີສະເຫຼີມສະຫຼອງ ວັນເດັກນ້ອຍສາກົນ , ວັນປູກຕົ້ນໄມ້ແຫ່ງຊາດ. ວັນສາກົນລຶບລ້າງການໃຊ້ແຮງງານເດັກນ້ອຍ ແລະ ວັນສິ່ງແວດລ້ອມໂລກ ພິທີດັ່ງກ່າວແມ່ນໄດ້ຈັດຂື້ນໃນວັນທີ່ 1 ມີຖຸນາ 2018 ຜ່ານມານີ້ ຢູ່ທີ່ເດີນໂຮງຮຽນ ມັດທະຍົມສົມບູນບ້ານທອງ ເຂົ້າຮ່ວມເປັນກຽດ ມີທ່ານ ບຸນມີ ຈັນທິບ ກຳມະການພັກແຂວງ ເລຂາພັກເມືອງ ເຈົ້າເມືອງໆເງິນ, ມີທ່ານ ເອກກະໄຊ ສຸພັນຂັນ ຮອງຜູ້ອຳນວຍການໃຫຍ່ ບໍລິສັດໄຟຟ້າຫົງສາ ຈຳກັດ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ກົມກອງ, ໂຮງຮຽນ, ໂຮງໝໍ, ນັກທຸລະກິດ, ທິມງານບໍລິສັດໄຟຟ້າຫົງສາ, ເລຂາໜ່ວຍພັກນາຍບ້ານ ແລະ ນ້ອງນັກຮຽນເຂົ້າຮ່ວມ.

ທ່ານ ບຸນມີ ຈັນທິບ ກຳມະການພັກແຂວງ ເລຂາພັກເມືອງ ເຈົ້າເມືອງໆເງິນ ໃນນາມປະທານພິທີ ກໍ່ໃຫ້ກຽດຂື້້ນກ່າວເປີດພິທີສະເຫຼີມສະຫຼອງວັນເດັກນ້ອຍສາກົນ , ວັນປູກຕົ້ນໄມ້ແຫ່ງຊາດ, ວັນສາກົນລຶບລ້າງການໃຊ້ແຮງງານເດັກນ້ອຍ ແລະ ວັນສິ່ງແວດລ້ອມໂລກ ເຊີ່ງທ່ານ ໄດ້ຍົກໃຫ້ເຫັນຄວາມໝາຍຄວາມສຳຄັນແລະ ຄຸນປະໂຫຍດຫລາຍຢ່າງທີຕິດພັນກັບສິ່ງທີ່ມີຊີວິດ ເພື່ອແນ່ໃສ່ຄືນຄວາມອຸດົມສົມບູນຂອງປ່າໄມ້ ແລະ ຊີວານາໆພັນ ເຊີ່ງແຕ່ລະປີ ພັກ ແລະ ລັດຖະບານລາວເຮົາ ໄດ້ຖືເອົາວັນທີ່ 1 ມີຖຸນາ ວັນປູກຕົ້ນໄມ້ແຫ່ງຊາດ ໂດຍສະເພາະພົນລະເມືອງລາວທຸກຄົນຕ້ອງໄດ້ພັນທະ ແລະ ປະກອບສ່ວນເຂົ້າໃນການປູກໄມ້ປູກປ່າ ແລະ ຕິດພັນກັບວັນເດັກນ້ອຍສາກົນ ເພື່ອສ້າງໃຫ້ນ້ອງນ້ອຍນັກຮຽນຮູ້ຈັກອານຸລັກຮັກສາປ່າໄມ້ໃຫ້ຫຼາຍຂື້ນ.

ເມືອງເງິນ ຈະສູ້ຊົນປູກໄມ້ໃຫ້ໄດ້ 46,99 ຮຕ, ຝື້ນຟູປ່າທຳມະຊາດໃຫ້ໄດ້ 3.120 ຮຕ.ໄມ້ທີ່ຈະນໍາມາປູກໃນປີນີ້ ມີ ໄມ້ຫ່ຽນ, ໄມ້ສັກ, ໄມ້ສ້ຽວ, ໄມ້ແຕ້ຂາ , ໄມ້ຂົມຝາດ ແລະ ໄມ້ປະດັບ ທັງໝົດ 24,586 ເບ້ຍ. ຈາກນັ້ນ ທ່ານທອງສຸກ ຈັນປະເສີດ ກຳມະການພັກເມືອງ ຫົວໜ້າຫ້ອງການກະ ສິກຳ ແລະ ປ່າໄມ້ ເມືອງ ກໍ່ໄດ້ຂື້ນຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການແບ່ງປັນເບ້ຍໄມ້, ແລະ ເນື້ອທີ ໃຫ້ບ້ານຈຳນວນ 22 ບ້ານໃນທົ່ວເມືອງ ນຳໄປປູກໃນຂອບເຂດຮັບຜິດຊອບ, ແລະ ຟື້ນຟູປ່າທຳມະຊາດໃຫ້ໄດ້ຕາມລະດັບຄາດໝາຍທີ່ວາງໄວ້

ໃນພິທີ ກໍ່ໄດ້ຊົມການສະແດງສິລະປະຂອງນ້ອງນັກຮຽນຊັ້ນອານຸບານ, ປະຖົມ ມັດທະຍົມ ພ້ອມທັງມອບຂອງຂວັນ ໃຫ້ນ້ອງນ້ອຍນັກຮຽນ ຈາກນັ້ນທາງຄະນະປະທານ ແຂກ ກໍ່ໄດ້ຮ່ວມກັນປູກຕົ້ນໄມ້ຢູ່ຫ້ວຍໜໍ່ຂົມ ເທີງຖ້ຳພໍ່ເຖົ້າຄຳພັນ ແລະ ລຽບເສັ້ນທາງ 2w ຈຳນວນ 2.500 ເບ້ຍ ໃນເນື້ອທີ 2,5 ຮຕ.

ໂດຍ: ອິນແປງ ແຫວນຄຳ