ຖືກປັບໃໝ 10 ລ້ານກີບ! ມັກງ່າຍເອົາຂີ້ເຫຍື້ອຂົນມາຖິ້ມແຄມທາງ ໜອງບົວທອງ-ໜອງບຶກ

0
924

ຖືກປັບໃໝ 10 ລ້ານກີບ! ມັກງ່າຍເອົາຂີ້ເຫຍື້ອຂົນມາຖິ້ມແຄມທາງ ໜອງບົວທອງ-ໜອງບຶກ

ໃນເວລາ 15 ໂມງ ຂອງວັນທີ 25 ພຶດສະພາ 2018 ມີພົນລະເມືອງດີ ໄດ້ພົບເຫັນ ທ້າວ ອາປິ້ງ, ອາຍຸ 46 ປີ, ສັນຊາດຈີນ, ອາຊີບກຳມະກອນ ພັກເຊົາຢູ່ຕະຫລາດຊັງຈຽງ ໄດ້ນຳໃຊ້ ລົດກະບະ ຮຸນໄດ ສີຂາວ( ບໍ່ມີໝາຍເລກທະບຽນ) ອອກຊື່ ນາງ ຈັນຫອມ ວັນນະວົງ ອາຍຸ 48 ປີ ອາຊີບແມ່ເຮືອນ ຢູ່ບ້ານ ວັດໄຕນ້ອຍທົ່ງ ເມືອງ ສີໂຄດຕະບອງ; ໄດ້ຂົນຂີ້ຫຍື້ອໄປລັກຖີ້ມ ຢູ່ເສັ້ນທາງໜອງບົວທອງ-ໜອງບຶກ,

ດັ່ງນັ້ນ ປກສ ກຸ່ມບ້ານ ຈຶ່ງໄດ້ ກັກລົດຜູ້ກ່ຽວ ແລະດຳເນີນການກ່າວຕັກເຕືອນ ພ້ອມປັບໃໝ ຕາມ ມາດຕາ 3 ຂໍ້ 3.1 ວ່າດ້ວຍແຜນວຽກ ແລະ ມາດຕະການເສັ້ນທາງສະອາດ ຂອງມະຕິຕົກລົງອົງການປົກຄອງສະບັບເລກທີ 03/ອປຄ.ນວ, ລົງວັນທີ25 ກັນຍາ 2015, ເປັນຈຳນວນເງິນ 10,000,000 ກີບ, ( ຊຶ່ງໃນນີ້ ໄດ້ແບ່ງໃຫ້ຜູ້ພົບເຫັນ 30% ເຫລືອ 70% ອຳນາດການປົກຄອງບ້ານນຳໃຊ້ເຂົ້າໃນວຽກລວມຂອງບ້ານ) ພ້ອມທັງເຮັດບົດບັນທຶກ ຖ້າພົບເຫັນອີກເທື່ອໜ້າ ຈະໄດ້ ປັບໃໝເພີ່ມອີກ 10 ເທົ່າ.

ດັ່ງນັ້ນ ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ຂໍຄວາມຮ່ວມມື້ມາຍັງພໍ່ແມ່ປະຊາຊົນ ຈົ່ງຊ່ວຍກັນເປັນຫູເປັນຕາ ຖ້າພົບເຫັນໃຫ້ແຈ້ງອຳນາດການປົກຄອງບ້ານ ຫຼື ຫ້ອງການ ຄບຕ ໂທ: 020 56621164.