ປກສ ແຂວງບໍ່ແກ້ວ ຈັບໂຈນລັກລົດ 3 ຄົນ

0
438

ໃນຕອນເຊົ້າຂອງວັນທີ 27ພຶດສະພາ 2018 ນີ້ ໄດ້ມີປະຊາຊົນຜູ້ຖືກເສຍຫາຍ ຈໍານວນໜຶ່ງເຂົ້າມາແຈ້ງຄວາມຕໍໍ່ເຈົ້າໜ້າທີ່ຕໍາຫຼວດ ພະແນກສືບສວນ-ສອບສວນ ຄະດີອາຍາ ປກສ ແຂວງບໍ່ແກ້ວວ່າ: ໄດ້ມີຄົນຮ້າຍບໍ່ຮູ້ຊື່ບໍ່ຮູ້ຈໍານວນເຂົ້າມາລັກລົດຈັກຢູ່ເຮືອນ, ພາຍຫຼັງໄດ້ຮັບແຈ້ງຄວາມແລ້ວ ທາງເຈົ້າໜ້າທີ່ຂອງພວກເຮົາຈຶ່ງລົງກວດກາສັນນະສູດສະຖານທີ່ເກີດເຫດ ແລະເຫັນວ່າມີມູນຄວາມຈິງ ຈຶ່ງໄດ້ເກັບກໍາຂໍ້ມູນຂຶ້ນບັນຊີລາຍຊື່ເປົ້າໝາຍກໍ່ການກະທໍາຜິດໃນຄັ້ງນີ້.

ຈົນມາຮອດເວລາ 16:00 ຂອງວັນທີດ່ຽວກັນ ຈຶ່ງຈັບຕົວເປົ້າໝາຍໄດ້ຄື: ທ້າວ ອຸດອນ ຈະເລີນຜົນ ຫຼື ໂດ່ ປະຈຸບັນຢູ່ບ້ານປ່າອ້ອຍ, ທ້າວ ຄໍາມະນີ ມະນີວອນ ຫຼື ໃຫຍ່ ອາຍຸ 32 ປີ ອາຊີບ ກໍາມະກອນ ປະຈຸບັນຢູ່ບ້ານໃຫຍ່ ຫ້ວຍຊາຍໃຕ້ ແລະ ທ້າວ ສົງການ ອາຍຸ 29 ປີ ອາຊີີບກໍາມະກອນ ປະຈຸບັນຢູ່ບ້ານຕີນທາດ ເມືອງຫ້ວຍຊາຍ ແຂວງບໍ່ແກ້ວ. ຜົນເສຍຫາຍມີລົດຈັກຈໍານວນ 04 ຄັນຄື: ລົດຈັກເວບ 110 ໄອ ສີຂາວຟ້າປ້າຍທະບຽນ ຈກ 1188 ລົດຈັກເວບ ຮອງຊິນ ສີແດງ ,ລົດຈັກເວບເອັກສີດໍາປ້າຍທະບຽນ ຈກ 0884, ລົດຈັກຊູມເມີເອັກ ສີສົມ.

ຮູບການໃນການລັກຊັບໃນຄັ້ງນີ້: ພວກກ່ຽວທັງ 3 ຄົນ ແມ່ນໄດ້ພາກັນຍ່າງໄປຕາມທາງ ເພື່ອສັງເກດເບິ່ງລົດຈັກ ທີ່ຈອດຢູ່ຕາມເຮືອນຂອງປະຊາຊົນ ຜ່ານການສັງເກດເຫັນວ່າ ເຈົ້າຂອງເຮືອນບໍ່ມີຄົນຢູ່ ພວກກ່ຽວຈຶ່ງໄດ້ສວຍໂອກາດຕອນທີ່ບໍ່ມີຄົນຢູ່ແລ້ວພາກັນເຂົ້າໄປເອົາຫັກຄໍລົດທີ່ລັອກໄວ້. ຈາກນັ້ນ, ກໍ່ພາກັນດຶງລົດອອກມາ ແລ້ວເອົາມືດຕັດຕໍ່ສາຍໄຟ ເມື່ອສໍາເລັດແລ້ວ ຈຶ່ງໄດ້ສະຕາດລົດອອກໄປ ຫຼັງຈາກລັກໄດ້ແລ້ວພວກກ່ຽວ ແມ່ນຂັບຂີ່ໄປເມືອງຕົ້ນເຜິ້ງ ແຂວງບໍ່ແກ້ວ ເພື່ອຕິດຕໍ່ຂາຍ ແຕ່ບໍ່ສໍາເລັດ.ອຸປະກອນທີ່ພວກກ່ຽວໃຊ້ໃນການກໍ່ເຫດມີ: ຄີມ, ມີດ, ເຫຼັກງັດ ແລະ ອື່ນໆອີກ…ຄະດີດັ່ງກ່າວ ແມ່ນຍັງໄດ້ພວມ ສືບສວນ-ສອບສວນ ຂະຫຍາຍຜົນເພື່ອມ້າງກຸ່ມແກ້ງທີ່ຍັງເຫຼືອ ມາດໍາເນີນຄະດີຕາມລະບຽບກົດໝາຍຕໍ່ໄປ.

ຕໍ່ກັບເຫດການດັ່ງກ່າວ ໃນນາມເຈົ້າໜ້າທີ່ ປ້ອງກັນຄວາມສະຫງົບ ແຂວງບໍ່ແກ້ວ ຈຶ່ງຂໍຮຽກຮ້ອງມາຍັງພໍ່ແມ່ ປະຊາຊົນບັນດາເຜົ່າ, ບັນດາພະແນກການ, ສໍານັກງານ, ວິສາຫະກິດ, ຫ້າງຮ້ານ, ທະນາຄານ, ນັກທຸລະກິດທັງພາຍໃນ ແລະ ຕ່າງປະເທດ ທີມາລົງທຶນຢູ່ແຂວງບໍ່ແກ້ວ, ຈົ່ງຍົກສູງສະຕິລະວັງຕົວ, ເປັນເຈົ້າການປົກປັກຮັກສາວັດຖຸເຄື່ອງຂອງມີຄ່າຕ່າງໆໃຫ້ດີ, ເພື່ອບໍ່ໃຫ້ກຸ່ມຄົນທີ່ບໍ່ດີສວຍໂອກາດຊອກຫາຊ່ອງວ່າງເຄື່ອນໄຫວກະທໍາຜິດໄດ້.

ພາບແລະຂ່າວ: ຮທ ວິທູນ ແກ້ວກັນຍາ, Media Laos