ແຂວງເຊກອງ ເຜີຍແຜ່ລັດຖະບັນຍັດການໃຫ້ອະໄພຍະໂທດ

0
556

ວັນທີ 4 ມິຖຸນາ 2018 ຜ່ານມາ ອົງການໄອຍະການປະຊາຊົນແຂວງໄດ້ຈັດກອງປະຊຸມເຜີຍແຜ່ແນະນໍາການຈັດຕັ້ງປະຕິບັດລັດຖະບັນຍັດຂອງປະທານປະເທດແຫ່ງ ສປປ ລາວ ວ່າດ້ວຍການໃຫ້ອະໄພຍະໂທດ ແລະ ເອກະສານອື່ນໆທີ່ກ່ຽວຂ້ອງ ໂດຍມີທ່ານ ສີດາ ສຸວັນນະສາຍ ຮອງເລຂາພັກແຂວງ, ຮອງເຈົ້າແຂວງເຊກອງ, ປະທານຄະນະກຳມະການອະໄພຍະໂທດຂັ້ນແຂວງ, ທ່ານ ປອ ສົມນິດ ສີລິບຸນລ້ຽງ ກໍາມະການພັກແຂວງ, ຫົວໜ້າອົງການໄອຍະການປະຊາຊົນແຂວງ, ມີຄະນະກຳມະການອະໄພຍະໂທດຂັ້ນແຂວງ ແລະ ຂະແໜງການກ່ຽວຂ້ອງເຂົ້າຮ່ວມ.


ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງການເຜີຍແຜ່ ລັດຖະບັນຍັດຂອງປະທານປະເທດ ສາທາລະນະລັດ ປະຊາທິປະໄຕ ປະຊາຊົນລາວ ສະບັບເລກທີ 001/ປປທ, ລົງວັນທີ 20 ມີນາ 2018 ວ່າດ້ວຍການໃຫ້ອະໄພຍະໂທດ ຊຶ່ງປະກອບມີ 11 ພາກ 58 ມາດຕາ, ຄຳແນະນຳກ່ຽວກັບການຈັດຕັ້ງປະຕິບັດລັດຖະບັນຍັດຂອງປະທານປະເທດ, ບົດສະເໜີການຈັດຕັ້ງປະຕິບັດຄຳຕັດສິນຄະດີອາຍາກ່ຽວກັບຄ່າເສຍຫາຍທາງແພ່ງ ແລະ ຄ່າປັບໃໝ.


ພ້ອມນີ້ ກໍໄດ້ມີການຄົ້ນຄວ້າພິຈາລະນາ ເພື່ອສະເໜີຂັ້ນເທິງອະໄພຍະໂທດ, ຫຼຸດຜ່ອນໂທດໃຫ້ແກ່ນັກໂທດຜູ້ທີ່ມີຜົນງານ, ມີການປະພຶດດີ, ປະຕິບັດລະບຽບຂອງຄ້າຍຄຸມຂັງຢ່າງເຂັ້ມງວດ, ມີຄວາມຕື່ນຕົວເພື່ອປັບປຸງຕົນເອງໃຫ້ເປັນພົນລະເມືອງດີ ໂດຍອີງໃສ່ລັດຖະບັນຍັດວ່າດ້ວຍການອະໄພຍະໂທດ ໄດ້ສະເໜີອະໄພຍະໂທດ, ຫຼຸດຜ່ອນໂທດ ເນື່ອງໃນໂອກາດວັນຊາດທີ 2 ທັນວາ ປີ 2018 ທີ່ຈະມາເຖິງນີ້ ລວມທັງໝົດ 19 ຄົນ, ຍິງ 7 ຄົນ, ໃນນີ້ ສະເໜີອະໄພຍະໂທດ ມີ 17 ຄົນ, ຍິງ 7 ຄົນ ແລະ ປ່ອຍຕົວ 2 ຄົນ. 


ໂອກາດດັ່ງກ່າວ ທ່ານຮອງເຈົ້າແຂວງກໍໄດ້ມີທິດຊີ້ນຳ ໂດຍເນັ້ນໃຫ້ຄະນະກຳມະການອະໄພຍະໂທດຂັ້ນແຂວງ ແລະ ພາກສ່ວນກ່ຽວຂ້ອງພ້ອມກັນເອົາໃຈໃສ່ປະຕິບັດລັດຖະບັນຍັດຂອງປະທານປະເທດ ແລະ ຄຳແນະນຳຂອງຫົວ ໜ້າອົງການໄອຍະການປະຊາຊົນສູງສຸດດ້ວຍຄວາມຮັບຜິດຊອບສູງ ແລະ ມີຜົນສຳເລັດ, ແນໃສ່ສຶກສາອົບຮົມນັກໂທດໃຫ້ມີຄວາມຮັບຮູ້, ເຂົ້າໃຈຢ່າງເລິກເຊິ່ງ ແລະ ເຫັນໄດ້ຄວາມໝາຍສຳຄັນແນວທາງການເມືອງຂອງພັກ, ລະບຽບກົດ ໝາຍຂອງລັດ ເພື່ອໃຫ້ເຂົາເຈົ້າກາຍເປັນພົນລະເມືອງດີຂອງພັກ-ລັດ ແລະ ຂອງຊາດຕໍ່ໄປ.

 

ຂ່າວ-ພາບ : ສັນຍາ (ຂ່າວແຂວງເຊກອງ)