ພາກລັດ ແລະ ພາກທຸລະກິດທ່ອງທ່ຽວຫາລືກ່ຽວກັບການວາງແຜນໂຄສະນາການທ່ອງທ່ຽວ

0
247

ວັນທີ 28 ພຶດສະພາ 2018 ພາກລັດ ແລະ ພາກທຸລະກິດທ່ອງທ່ຽວໄດ້ປຶກສາຫາລືວາງແຜນໂຄສະນາການທ່ອງທ່ຽວໂດຍເສັ້ນທາງການຂົນສົ່ງທາງບົກ ແລະ ທາງອາກາດ ທີ່ໂຮງແຮມຈໍາປາສັກແກຣນ ໂດຍການເຂົ້າຮ່ວມຂອງທ່ານ ບົວລີ ເພັດສົງຄາມ ກໍາມະການພັກແຂວງ ຫົວໜ້າຫ້ອງວ່າການປົກຄອງແຂວງຈໍາປາສັກ, ຄະນະນຳ ແລະ ຂະແໜງການຈາກພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ,ພະແນກອຸດສາຫະກໍາ ແລະ ການຄ້າ, ພະແນກໂຍທາທິການ ແລະ ຂົນສົ່ງ, ສະມາຄົມໂຮງແຮມ-ເຮືອນພັກ ແລະ ຮ້ານອາຫານ, ສະມາຄົມຄຸ້ມຄອງທຸລະກິດການທ່ອງທ່ຽວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.


ທ່ານ ນາງ ມາລາ ຈັນທະລາມ ຮອງຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ ) ແຂວງຈໍາປາສັກໄດ້ມີຄໍາເຫັນກ່າວໃນກອງປະຊຸມວ່າ: ກອງປະຊຸມຄັ້ງນີ້ແມ່ນເພື່ອສ້າງເສັ້ນທາງເຂົ້າສູ່ຕະຫຼາດນັກທ່ອງທ່ຽວພາຍໃນ ແລະ ຕ່າງປະເທດ, ຢູ່ພາກພື້ນ ແລະ ສາກົນ, ພ້ອມທັງເປັນການສ້າງສິ່ງອໍານວຍຄວາມສະດວກສະບາຍ ໃນການເຂົ້າເຖິງບັນດາຂໍ້ມູນຂ່າວສານການທ່ອງ ທ່ຽວຢູ່ພາກໃຕ້ຂອງລາວທີ່ຈໍາເປັນອື່ນໆໃຫ້ແກ່ນັກທ່ອງທ່ຽວ ແລະ ສາມາດຮັບຮູ້ປະເທດລາວ ແລະ ມາທ່ອງທ່ຽວ ສປປ ລາວ ກໍ່ຄືມາທ່ຽວແຂວງຈໍາປາສັກຂອງພວກເຮົາໃຫ້ຫຼາຍຂຶ້ນກວ່າເກົ່າ. ທ່ານ ຮອງຫົວໜ້າພະແນກ ຖວທ ຍັງກ່າວຕື່ມອີກວ່າ: ວຽກງານການທ່ອງທ່ຽວຍັງມີຫຼາຍດ້ານທີ່ຕ້ອງໄດ້ເອົາໃຈໃສ່ຂຶ້ນຕື່ມທາງດ້ານການພັດທະນາ. ໂດຍສະເພາະແມ່ນການພັດທະນາດ້ານບຸກຄະລາກອນໃນະແໜງການທ່ອງທ່ຽວ ເພື່ອສາມາດທຽບເທົ່າ ແລະ ໃຫ້ທຽບທັນກັບສະພາບການປ່ຽນແປງໃໝ່ໃນປັດຈຸບັນເປັນຕົ້ນແມ່ນ: ພັດທະນາດ້ານບຸກຄະລາກອນ, ພັດທະນາດ້ານເຕັກໂນໂລຊີທີ່ທັນສະໄໝ ແລະ ພັດທະນາຂອດການບໍລິການທີ່ມີມາດຖານສາກົນ. 


ໃນກອງປະຊຸມຍັງໄດ້ສະເໜີບົດສົນທະນາໃນຫົວຂໍ້ຕ່າງໆເຊັ່ນ: ຂໍ້ມູນພື້ນຖານຂອງຕາຕະລາງການເດີນທາງ ແລະ ລາຄາການບໍລິການຂົນສົ່ງທາງບົກ ແລະ ທາງອາກາດ, ທ່າແຮງ ແລະ ເງື່ອນໄຂເພື່ອການໂຄສະນາການທ່ອງທ່ຽວຢູ່ພາກໃຕ້ເຂົ້າໃນວາລະສານຕ່າງໆດ້ວຍການໃຊ້ເຄືອຂ່າຍຕາຕະລາງການຂົນສົ່ງທາງບົກ ແລະ ທາງອາກາດ, ທ່າແຮງ ແລະ ເງື່ອນໄຂເພື່ອສ້າງ ແລະ ຂາຍລາຍການນໍາທ່ຽວດ້ວຍການຂົນສົ່ງທາງບົກ ແລະ ທາງອາກາດ ພ້ອມກັນນັ້ນກອງປະຊຸມຍັງໄດ້ປະກອບຄໍາຄິດຄໍາເຫັນ ແລກປ່ຽນແນວຄວາມຄິດຊອກຫາຊ່ອງທາງທີ່ດີ ແລະ ຖືກຕ້ອງຮ່ວມກັນເພື່ອເຮັດໃຫ້ວຽກງານດັ່ງກ່າວນີ້ໃຫ້ໄດ້ຮັບຜົນສໍາເລັດ.

ພາບ ແລະ ຂ່າວ: ນສພ ຈໍາປາໃໝ່