ກອງປະຊຸມຄົບຄະນະບໍລິຫານງານພັກເມືອງ ຄອບແຂວງໄຊຍະບູລີ ຄັ້ງທີ 10 ສະໄໝທີ IV

    0
    363

     

    ເມືອງຄອບແຂວງໄຊຍະບູລີ ໄດ້ຈັດກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 10 ສະໄໝທີ IV ຢູ່ຫ້ອງວ່າການເມືອງ ໃນວັນທີ 4-5 ມິຖຸນາ 2018 ນີ້.


    ໂດຍ ການເປັນປະທານຂອງ ທ່ານ ຄຳສຸກ ທໍ່ ຮອງເລຂາຄະນະບໍລິຫານງານພັກແຂວງ ປະທານແນວລາວສ້າງຊາດແຂວງໄຊຍະບູລີ, ມີຄະນະປະຈຳພັກເມືອງ, ກຳມະການພັກເມືອງ, ມີເລຂາພັກຮາກຖານກຸ່ມ ເລຂາໜ່ວຍພັກບັນດາສຳນັກງານ, ອົງການ, ກົມກອງເຂົ້າຮ່ວມ.
    ໃນພິທີ ທ່ານ ພົມ ມິ່ງບຸບຜາ ກຳມະການພັກແຂວງ ເລຂາຄະນະບໍລິຫານງານພັກເມືອງເຈົ້າເມືອງ-ເມືອງຄອບໄດ້ຂຶ້ນກ່າວເປີດກອງປະຊຸມຢ່າງເປັນທາງການ ແລະ ຜູ້ແທນກອງປະຊຸມຍັງໄດ້ຮັບຟັງບົດສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະຄັ້ງທີ 9 ຂອງຄະນະບໍລິຫານງານພັກເມືອງ ( ສະໄໝທີ IV ) ມະຕິກອງປະຊຸມໃຫຍ່ຄັ້ງທີ່ IV ຂອງເມືອງ ແລະ ທິດທາງຈຸດສຸມໃນຕໍ່ໜ້າ.


    ຕະຫຼອດໄລຍະທີ່ຜ່ານມາອົງຄະນະພັກເມືອງໄດ້ຈັດຕັ້ງປະຕິບັດ ການຊີ້ນຳ-ນຳພາໄດ້ຮັບຜົນສຳເລັດໃນຫຼາຍດ້ານເປັນຕັ້ນແມ່ນວຽກງານການເມືອງ-ແນວຄິດ ແມ່ນໄດ້ເອົາໃຈໃສ່ເຊື່ອມຊືມມະຕິຄຳສັ່ງຕ່າງໆຂອງພັກວາງອອກໄດ້ເປັນຢ່າງດີ ຊຶ່ງສາມາດຕີລາຄາບັນດາສະມາຊິກພັກ, ພະນັກງານງານລັດຖະກອນ, ຖັນແຖວກຳລັງປະກອບອາວຸດຕະຫຼອດຮອດພໍ່ແມ່ປະຊາຊົນບັນດາເຜົ່າພາຍໃນເມືອງ ແມ່ນມີຄວາມຮັບຮູ້ ແລະ ເຂົ້າໃຈຕໍ່ແນວທາງນະໂນບາຍຂອງພັກ, ມີຄວາມເປັນເອກະພາບຕໍ່ການນຳພາ, ມີສະຕິຕື່ມຕົວເຄົາລົບ ແລະ ປະຕິບັດລະບຽບກົດໝາຍ ຕັ້ງໜ້າປະກອບສ່ວນເຂົ້າໃນການພັດທະນາເສດຖະກິດສັງຄົມ, ວຽກງານປ້ອງກັນຊາດປ້ອງກັນຄວາມສະຫງົບ ແມ່ນໄດ້ປັບປຸງກຳລັງ ປກສ-ປກຊ ຢູ່ໃນແຕ່ລະບ້ານໃຫ້ມີຄວາມເຂັ້ມແຂງ ແລະ ໜັກແໜ້ນ, ສາມາດສ້າງບ້ານປ້ອງກັນຄວາມສະຫງົບດີ ໄດ້ທັງໝົດ 3 ບ້ານ ເທົ່າກັບ 85 ກວ່າສ່ວນຮ້ອຍ, ສ້າງບ້ານປ້ອງກັນຄວາມເຂັ້ມແຂງທັງໝົດ 14 ບ້ານ ເທົ່າກັບ 93 ສ່ວນຮ້ອຍ, ໂດຍຈັດຕັ້ງປະຕິບັດໂຄງການຈັດສັນລະບຽບສັງຄົມໃຫ້ມີຄວາມສະຫງົບ ແລະ ປກສ-ກອງຫຼອນບ້ານໃຫ້ມີຄວາມເຂັ້ມແຂງ ແລະ ໜັກແໜ້ນ ເຮັດໃຫ້ເມືອງມີຄວາມສະຫງົບສຸກໂດຍພື້ນຖານ. ພ້ອມດຽວກັນນີ້ ອົງຄະນະພັກເມືອງຍັງໄດ້ສຸ່ມໃສ່ການພັດທະນາເສດຖະກິດໂດຍລວມ ແລ້ວເສດຖະກິດພາຍໃນເມືອງແມ່ນໄດ້ຂະຫຍາຍຕົວຢ່າງຕໍ່ເນື່ອງ ສະເລ່ຍ 10,36 ສ່ວນຮ້ອຍ, ລວມຍອດລາຍຮັບປະຕະບັດໄດ້ 301,78 ຕື້ກີບ ເທົ່າກັບ 82 ສ່ວນຮ້ອຍຂອງແຜນການ 5 ປີ, ສະເລ່ຍລາຍຮັບໃສ່ຫົວຄົນໜຶ່ງປະຕິບັດໄດ້ 1,828 ໂດລາສະຫະລັດ ເທົ່າກັບ 87 ສ່ວນຮ້ອຍ, ໂຄງການປະກອບເສດຖະກິດຂອງເມືອງແມ່ນໄດ້ຫັ່ນປ່ຽນໄປຕາມທິດທີ່ກຳນົດໄວ້ຄື ກະສິກຳຫຼຸດລົງຈາກ 70 ສ່ວນຮ້ອຍ ມາເປັນ 53 ສ່ວນຮ້ອບ, ອຸດສາຫະກຳເພີ່ມຂຶ້ນຈາກ 5 ສ່ວນຮ້ອຍ ມາເປັນ 14,46 ສ່ວນຮ້ອຍ, ການບໍລິການຈາກ 25 ສ່ວນຮ້ອຍ ມາເປັນ 34 ສ່ວນຮ້ອຍ, ການລົງທຶນໄດ້ຮັບອະນຸມັດການລົງທຶນລັດທັງໝົດ 10 ໂຄງການໃນມູນຄ່າ 2,77 ຕື້ກີບ, ຊຸກຍູ້ສົ່ງເສີມ ແລະ ຄຸ້ມຄອງການລົງທຶນຂອງເອກະຊົນທັງໝົດ 10 ໂຄງການ ໃນມູນຄ່າ 34 ຕື້ກວ່າກີບ, ຄຸ້ມຄອງປະຕິບັດທຶນຊ່ວຍເຫຼືອລ້າທັງໝົດ 11 ໂຄງການ ໃນມູນຄ່າ 18,80 ຕື້ກີບ, ວຽກງານກະສິກຳ ແລະ ປ່າໄມ້ແມ່ນໄດ້ຮັບການຂະຫຍາຍຕົວ ເນື້ອທີ່ດິນທັງໝົດ 21,93 ເຮັກຕາ ທຽບໃສ່ແຜນການປະຕິບັດໄດ້ 104 ສ່ວນຮ້ອຍ ໄລຍະຜ່ານມາຜະລິດເຂົ້າໄດ້ 11,316 ໂຕນ ສະເລ່ຍເທົ່າກັບ 78,85 ສ່ວນຮ້ອຍ, ສະເລ່ຍເຂົ້າກິນໄດ້ 547,56 ກິໂລຕໍ່ຄົນຕໍ່ປີ ເທົ່າກັບ 81,97 ສ່ວນຮ້ອຍ ນອກນັ້ນຍັງໄດ້ສົ່ງເສີມການລ້ຽງສັດໃຫຍ່ໄດ້ທັງໝົດ 9,806 ໂຕ ເທົ່າກັບ 147,48 ສ່ວນຮ້ອຍ, ສັດນ້ອຍໄດ້ 119,271 ໂຕ ເທົ່າກັບ 99,56 ສ່ວນຮ້ອຍ ພ້ອມທັງໄດ້ລົງກວດກາປ່າໄມ້ ແລະ ຟື້ນຟູປ່າ ເຮັດໃຫ້ອັດຕາປົກຫຸ້ມໄດ້ 66,36 ສ່ວນຮ້ອຍ ຂອງເນື້ອທີ່ປ່າໄມ້ປົກຫຸ້ມທັງໝົດ ໃນຂົງເຂດວຽກງານວັດະນະທຳສັງຄົມໄດ້ຮັບການປັບປຸງດີຂຶ້ນເປັນກ້າວໆ.


    ໃນຕອນທ້າຍຂອງພິທີ ທ່ານ ຄຳສຸກ ທໍ່ ຮອງເລຂາຄະນະບໍລິຫານງານພັກແຂວງ ປະທານແນວລາວສ້າງຊາດແຂວງ ໄດ້ໃຫ້ກຽດໂອ້ລົມໃນພິທີດັ່ງກ່າວ ຊຶ່ງກ່ອນອື່ນໝົດທ່ານໄດ້ສະແດງຄວາມຍ້ອງຍໍຊົມເຊີຍຕໍ່ບັນດາອົງຄະນະພັກເມືອງ ທີ່ຍາດຜົນງານມາໄດ້ຫຼາຍໃນຫຼາຍດ້ານ ໂດຍສະເພາະແມ່ນການຮັບຜິດຊອບໜ້າທີ່ການເມືອງຂອງຕົນ ທີ່ສາມາດແກ້ໄຂປະກົດການຍໍ້ທໍ້ຕ່າງໆຂອງສັງຄົມໄດ້ຢ່າງຕັ້ງໃຈ ເຮັດໃຫ້ສັງຄົມມີສະຖຽນລະພາບທາງດ້ານການເມືອງ ມີຄວາມສະຫງົບສຸກໂດບພື້ນຖານ ເສດຖະກິດ-ວັດທະນະທຳສັງຄົມໄດ້ຮັບການພັດທະນາຂຶ້ນເທື່ອລະກ້າວ.

    ພ້ອມດຽວກັນນີ້ທ່ານຍັງໄດ້ຮຽກຮ້ອງມາຍັງອົງຄະນະພັກເມືອງ, ເລຂາໜ່ວຍພັກ, ອົງການກົມກອງ ຂົ່ງເພີ່ມທະວີເອົາໃຈໃສ່ຕໍ່ປະຕິບັດໜ້າທີ່ວຽກງານ ເອົາໃຈໃສ່ສຶກສາອົບຮົ່ມການເມືອງແນວຄິດໃຫ້ບັນດາສະມາຊິກພັກ, ພະນັກງານຫຼັກແຫຼ່ງພາຍໃນເມືອງໃຫ້ມີຄວາມສາມັກຄີ ເຊື່ອໝັ້ນຕໍ່ການນຳພາຂອງພັກ ໂດຍຄິດພັນກັບວຽກງານສະເພາະຂອງຕົນຮັບຜິດຊອບ ເພື່ອສືບຕໍ່ເຂົ້າໃນການປົກປັກຮັກສາ ແລະ ພັດທະນາປະເທດຊາດໃຫ້ດີຂຶ້ນໄປເທື່ອລະກ້າວ.

    ທີ່ມາ: Lao National Radio