ເມືອງປາກຊ່ອງຈັດພິທີປູກຕົ້ນໄມ້ສະເຫຼີມສະຫຼອງວັນປູກຕົ້ນໄມ້ແຫ່ງຊາດວັນທີ 1 ມິຖຸນາ

    0
    356

    ເມືອງປາກຊ່ອງ ແຂວງຈຳປາສັກໄດ້ຈັດພິທີປູກຕົ້ນໄມ້ ເພື່ອຟື້ນຟູປ່າ,ປັບປຸງສະພາບແວດລ້ອມ ແລະ ທັງເປັນການສະເຫຼີມສະຫຼອງເນື່ອງໃນໂອກາດວັນປູກຕົ້ນໄມ້ແຫ່ງຊາດວັນທີ 1 ມິຖຸນາ 2018 ຢູ່ທີ່ບໍລິເວນອ່າງຮັບນໍ້າໜ້າເຂື່ອນໄຟຟ້າເຊປຽນ – ເຊນໍ້ານ້ອຍ ບ້ານຫ້ວຍຈອດ.ໂດຍໃຫ້ກຽດເຂົ້າຮ່ວມຂອງ ທ່ານ ນິພອນ ວຽງປະເສີດ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ,ບັນດາທ່ານການນໍາແຂວງ,ເມືອງ,ພະນັກງານທະຫານຕໍາຫຼວດ,ຂະແໜງປ່າໄມ້,ຄະນະຮັບຜິດຊອບເຂື່ອນໄຟ້າ ເຊປຽນ – ເຊນໍ້ານ້ອນ,ນາຍບ້ານ ແລະ ປະຊາຊົນເຂົ້າຮ່ວມຢ່າງຫຼວງຫຼາຍ.

    ໃນພິທີ ຜູ້ເຂົ້າຮ່ວມໄດ້ຮັບຟັງລາຍງານສະພາບການກະກຽມປູກຕົ້ນໄມ້,ຈຸດປະສົງລະດັບຄາດໝາຍຂອງການປູກ ແລະປະຫວັດຄວາມເປັນມາໂດຍຫຍໍ້ຂອງວັນປູກຕົ້ນໄມ້ແຫ່ງຊາດ…ຈາກນີ້,ກໍໄດ້ຮ່ວມກັນປູກຕົ້ນໄມ້ຢ່າງເປັນຂະບວນຟົດຟື້ນ ເຊິ່ງປູກໃນເນື້ອທີ່ 3 ເຮັກຕາ,ມີເບ້ຍໄມ້ທີ່ນໍາປູກຄັ້ງນີ້ມີທັງໝົດ 3.300 ເບ້ຍ ໃນນັ້ນ ມີປະເພດໄມ້ຂະຍູງ,ໄມ້ຍາງ,ໄມ້ຈໍາປາປ່າ ແລະໄມ້ກອກແກ້ວ. ການກຳນົດປູກຕົ້ນໄມ້ຢູ່ໜ້າເຂື່ອນອ່າງຮັບນໍ້າເຊປຽນ – ເຊນໍ້ານ້ອຍ ບ້ານຫ້ວຍຈອດ ກໍເພື່ອເປັນການທົດແທນປ່າໄມ້ທີ່ຖືກທຳລາຍຈາກການກໍ່ສ້າງເຂື່ອນໄຟຟ້າໃຫ້ຄືນສູ່ະພາບເດີມ,ນໍາຄວາມຊຸ່ມຊື່ນອຸດົມສົມບູນຄືນສູ່ທໍາມະຊາດ ແລະເຮັດໃຫ້ອັດຕາການປົກຫຸ້ມຂອງປ່າໄມ້ກວມເອົາ 70 % ໃນປີ 2020 ຕາມທີ່ລັດຖະບານໄດ້ວາງອອກປະກົດຜົນເປັນຈິງ.

    ໂອກາດວັນປູກຕົ້ນໄມ້ແຫ່ງຊາດ ທ່ານ ນິພອນ ວຽງປະສີດ ຕາງໜ້າການນໍາແຂວງຈຳປາສັກ ຍັງໄດ້ກ່າວຮຽກຮ້ອງໃຫ້ທົ່ວສັງຄົມເຫັນຄວາມສຳຄັນຂອງປ່າໄມ້,ຊ່ວຍກັນປູກ ແລະເອົາໃຈໃສ່ເປັນເຈົ້າການປົກປັກຮັກສາ ຈິ່ງຈະເຮັດໃຫ້ຕົ້ນໄມ້ຈະເລີນເຕີບໂຕ ເຮັດໃຫ້ການລອດເຫຼືອຂອງຕົ້ນໄມ້ມີອັດຕາສ່ວນຫຼາຍກ່ວາປີທີ່ຜ່ານາ. ພິທີປູກຕົ້ນໄມ້ຢູ່ເມືອງປາກຊ່ອງປີນີ້ ຈັດຂື້ນໂດຍການຮ່ວມມືລະຫວ່ງອຳນາດການປົຄອງເມືອງປາກຊ່ອງ,ຂະແໜງປ່າໄມ້ ພະແນກກະສີກຳປ່າໄມ້ແຂວງ ແລະໄດ້ຮັບການສະໜັບສະໜູນໂດຍໂຄການຄຸ້ມຄອງອ່າງຮັບນໍ້າເຊປຽນ – ເຊນໍ້ານ້ອຍ.

     


    ໂດຍ: ເກດສະໜາ ແກ້ວສຸວັນນະແສງ