ເມືອງລະມາມ ສະເຫຼີມສະຫຼອງວັນສິ່ງແວດລ້ອມໂລກ 5 ມິຖຸນາ

0
179

 

ເມືອງລະມາມໄດ້ຈັດພິທີສະເຫຼີມສະຫຼອງວັນສິ່ງແວດລ້ອມໂລກ (5 ມິຖຸນາ 2018) ” ຫຼຸຸດຜ່ອນປຣາສະຕິກ, ຫຼຸຸດຜ່ອນມົນລະພິດ ” ແລະວັນນໍ້າໂລກ ພາຍໃຕ້ຫົວຂໍ້ ” ຈົ່ງພ້ອມກັນປົກປັກຮັກສາທໍາມະຊາດເພື່ອແຫຼ່ງນໍ້າ ” ຂຶ້ນໃນວັນທີ 8 ມິຖຸນາ 2018 ທີ່ເດີ່ນຕະຫຼາດເທສະບານແຂວງ. ເປັນກຽດເຂົ້າຮ່ວມພິທີມີທ່ານ ຄໍາພຽມ ບົວລະພາ ຮອງເລຂາພັກແຂວງເຊກອງ, ທ່ານເຈົ້າເມືອງໆລະມາມ, ຄະນະປະຈໍາພັກແຂວງ, ກຳມະການພັກແຂວງ, ມີທ່ານຮອງເຈົ້າເມືອງ, ຫົວໜ້າ-ຮອງພະແນກ, ຫ້ອງການ, ບໍລິສັດລັດວິສາຫະກິດ, ພະນັກງານ-ລັດຖະກອນອ້ອມຂ້າງແຂວງ-ເມືອງ ແລະບ້ານເຂົ້າຮ່ວມຢ່າງຫຼວງຫຼາຍ.


ໃນພິທີທ່ານ ບຸນທອນ ຊະນະນິຄົມ ຫົວໜ້າຫ້ອງການຊັບພະຍາກອນທຳມະຊາດ ແລະສິ່ງແວດລ້ອມເມືອງລະມາມກ່າວວ່າ: ການສະເຫຼີມສະຫຼອງວັນສິ່ງແວດລ້ອມໂລກ ແລະວັນນ້ຳໂລກປີນີ້, ເມືອງລະມາມໄດ້ປະສານສົມທົບກັບພາກສ່ວນທີ່ກ່ຽວຂ້ອງທັງແຂວງ, ເມືອງ ແລະບ້ານ ໂດຍສະເພາະແມ່ນພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງດຳເນີນກິດຈະການຕ່າງໆ ເພື່ອສ້າງຂະບວນການຢ່າງຟົດຟື້ນເປັນຕົ້ນແມ່ນໄດ້ປູກຈິດສຳນຶກໃນການປົກປັກຮັກສາສິ່ງແວດລ້ອມ ໂດຍການນຳໃຊ້ສື່ຕ່າງໆຮ່ວມກັບແຂວງເຊກອງສ້າງຂະບວນການອະນາໄມຕາມແຄມທາງພາຍໃນເທສະບານແຂວງເພື່ອໃຫ່ມີຄວາມສະອາດຈົບງາມ.


ຂະນະທີ່ທ່ານ ແພງສີ ສີລາວີ ເຈົ້າເມືອງໆລະມາມ ໄດ້ກ່າວປາໄສໃນພິທີຄັ້ງນີ້ວ່າ: ການສະເຫຼີມສະຫຼອງວັນສິ່ງແວດລ້ອມໂລກ 5 ມິຖຸນາໄດ້ເລີ່ມປະຕິບັດມາແຕ່ປີ 1972 ພາຍຫຼັງກອງປະຊຸມສະຫະປະຊາຊາດວ່າດ້ວຍສິ່ງແວດ ລ້ອມມະນຸດ ໂດຍການສະເຫຼີມສະຫຼອງຄັ້ງນີ້ ແມ່ນໄດ້ດໍາເນີນຮ່ວມກັບການສະເຫຼີມສະຫຼອງວັນນໍ້າໂລກ ພາຍໃຕ້ຫົວຂໍ້ ” ຈົ່ງພ້ອມກັນປົກປັກຮັກສາທໍາມະຊາດເພື່ອແຫຼ່ງນໍ້າ ” ທັງນີ້ ກໍເພື່ອແນໃສ່ປຸກລະດົມສ້າງຈິດສໍານຶກໃຫ້ສັນຍານເຕືອນແກ່ປະຊາຊົນໃນທົ່ວໂລກ,ຈົ່ງຮ່ວມແຮງຮ່ວມໃຈກັນດໍາເນີນການຢ່າງຈິງຈັງໃນການແກ້ໄຂບັນຫາສິ່ງແວດລ້ອມ, ພ້ອມທັງຮວ່ມແຮງຮ່ວມໃຈກັນໃນການປົກປັກຮັກສາສີ່ງແວດລ້ອມໃຫ້ມີຄວາມຍືນຍົງ ໂດຍພາຍໃຕ້ຄໍາຂວັນທີ່ກ່າວມາຂ້າງເທິງນັ້ນໃຫ້ປະກົດຜົນເປັນຈິງ.


ໃນຕອນທ້າຍທ່ານ ນາງ ຄໍາເສັງ ທຸມມະວົງສາ ຮອງເຈົ້າເມືອງໆລະມາມ ຍັງໄດ້ອ່ານສານຂອງທ່ານນາຍົກ ເນື່ອງໃນວັນສິ່ງແວດລ້ອມໂລກ 5 ມິຖຸນາ 2018 ໃຫ້ບັນດາທ່ານທີ່ເຂົ້າຮ່ວມຮັບຟັງ ຊຶ່ງມີບາງເນື້ອໃນສຳຄັນວ່າ: ເນື່ອງໃນໂອກາດສະເຫຼີມສະຫຼອງວັນສິ່ງແວດລ້ອມໂລກ, ວັນສິ່ງແວດລ້ອມແຫ່ງຊາດ, ວັນນ້ຳໂລກ ແລະວັນປູກຕົ້ນໄມ້ປີນີ້ ສຳລັບ ສປປ ລາວ ຂໍໃຫ້ຖືເອົາໂອກາດທີ່ມີຄວາມໝາຍສຳຄັນດັ່ງກ່າວ ດຳເນີນການໂຄສະນາ, ປູກຈິດສຳນຶກ ແລະສ້າງຂະບວນການໃຫ້ສອດຄ່ອງຕາມຄຳຂວັນປີນີ້ ແລະພ້ອມກັນຫັນປ່ຽນຈິນຕະນາການໄປພ້ອມໆກັບຂະບວນເຮັດຕົວຈິງການເພີ່ມທະວີ, ຄຸ້ມຄອງຊັບພະຍາກອນທຳມະຊາດ ແລະປົກປັກຮັກສາສິ່ງແວດລ້ອມຕາມທິດສີຂຽວ ແລະຍືນຍົງຕາມລະບຽບການ ແລະກົດໝາຍຢ່າງເຂັ້ມງວດໃຫ້ບັນລຸຕາມວິໄສທັດ, ຕາມຍຸດທະສາດ ແລະແຜນການ 5 ປີຂອງຂະແໜງ ການປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມໃຫ້ມີຄວາມຍືນຍົງ.

ຂ່າວ-ພາບ: ສັນຍາ (ຂ່າວແຂວງເຊກອງ)