ຄຳມ່ວນ ໂຮມຊຸມນຸມ ສະເຫຼີມສະຫຼອງວັນສິ່ງແວດລ້ອມໂລກ

0
365

ວັນທີ 8 ມິຖຸນາ 2018 ຜ່ານມານີ້ທີ່ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງຄຳມ່ວນ ຮ່ວມກັບ ເມືອງທ່າແຂກ ຈັດໂຮມຊຸມນຸມເພື່ອສະເຫຼີມສະຫຼອງວັນສິ່ງແວດລ້ອມໂລກ ຄົບຮອບ 46 ປີ ເປັນກຽດເຂົ້າຮ່ວມມີທ່ານ ຈັນ ບຸບຜາລີວັນ ກຳມະການພັກແຂວງ, ເລຂາພັກເມືອງ ເຈົ້າເມືອງໆທ່າແຂກ, ທ່ານ ສີໄຄ ຄຳສະຫວັດ ຫົວໜ້າພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ມີບັນດາທ່ານກຳມະການພັກແຂວງ, ຄະນະພະແນກການ, ອົງການ ຈັດຕັ້ງມະຫາຊົນ ຕະຫຼອດເຖິງພະນັກງານ-ວິຊາການ ຂະແໜງການຕ່າງໆອ້ອມຂ້າງແຂວງເຂົ້າຮ່ວມ.

ທ່ານ ຈັບ ບຸບຜາລີວັນ ໄດ້ເປັນກຽດຜ່ານບົດປາໃສ ເນື່ອງໃນໂອກາດວັນສິ່ງແວດລ້ອມໂລກ ພາຍໃຕ້ຄຳຂວັນ “ ຫຼຸດຜ່ອນປຼາສະຕິກ ຫຼຸດຜ່ອນມົນລະຜິດ” ເຊິ່ງທ່ານໄດ້ຍົກໃຫ້ເຫັນເຖິງຄວາມໝາຍ, ຄວາມສຳຄັນ ແລະ ບັນຫາມົນລະຜິດ ຈາກການນຳໃຊ້ຢາງປຼາສະຕິກ ທີ່ສົ່ງຜົນກະທົບຕໍ່ຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມທັງຍົກໃຫ້ເຫັນເຖິງຄວາມເອົາໃຈໃສ່ຂອງການນຳພັກ-ລັດ ໃນການຄຸ້ມຄອງ ແລະ ປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ມີຄວາມຍືນຍົງຄົງຕົວຕະຫຼອດໄປ. ພ້ອມນັ້ນທ່ານ ບຸນເກີດ ດາລາສຸກ ຮອງເລຂາພັກເມືອງ ປະທານກວດການພັກ-ລັດເມືອງທ່າແຂກ ຍັງໄດ້ຜ່ານສານຂອງພະນະທ່ານ ລອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໂດຍມີເນື້ອໃນສຸມໃສ່ການຫຼຸດຜ່ອນການນຳໃຊ້ປຼາສະຕິກ, ສົ່ງເສີມກົນໄກ ແລະ ຂະບວນການທີ່ເປັນມິດຕໍ່ສິ່ງແວດລ້ອມ, ຮັບປະກັນເຮັດໃຫ້ການພັດທະນາເສດຖະກິດ-ສັງຄົມ ໄປຄຽງຄູ່ກັບການປົກປັກຮັກສາສິ່ງແວດລ້ອມ ແລະ ນຳໃຊ້ຊັບພະຍາ ກອນທຳມະຊາດໃຫ້ມີຄວາມຍືນຍົງ, ສ້າງປະເທດລາວໃຫ້ຂຽວ, ສະອາດ ແລະ ງາມຕາ.

ໃນການສະເຫຼີມສະຫຼອງວັນສິ່ງແວດ ລ້ອມໂລກໃນດັ່ງກ່າວ ບັນດາການນຳທີ່ເຂົ້າຮ່ວມພ້ອມແຂກທຸກທ່ານໄດ້ຮ່ວມຂະບວນຍ່າງ ເຊິ່ງໄດ້ເລີ່ມແຕ່ຫ້ອງວ່າການປົກຄອງ ເມືອງທ່າແຂກ ຫາສີ່ແຍກໄຟແດງທ່າດ່ານ ເລາະໄປຕາມເສັ້ນທາງແຄມຂອງ ຮອດປາກຫ້ວຍສະຄາມ ແລ້ວກັບມາສູ່ເດີ່ນ ຫ້ອງການປົກຄອງເມືອງ ລວມໄລຍະທາງປະມານ 3 ກິໂລແມັດ. ທັງນີ້ກໍ່ເພື່ອປູກຈິດສຳນຶກທົ່ວປວງຊົນ ໃນການຄຸ້ມຄອງ ຊັບພະຍາກອນທຳມະຊາດ ແລະ ປົກປັກຮັກສາສິ່ງແວດລ້ອມຕາມທິດສີຂຽວ ແລະ ຍືນຍົງ ລວມທັງການປົກປັກຮັກສາ ແຫຼ່ງນ້ຳທຳມະຊາດ ຈາກປັດໃຈການເພີ່ມຂຶ້ນຂອງປະຊາຊົນຢ່າງໄວວາ, ສິ່ງແວດລ້ອມ, ທຳມະຊາດຖືກທຳລາຍ, ເກີດການ ເຊື່ອມໂຊມຂອງລະບົບນິເວດທີ່ເປັນພື້ນຖານທຳມະຊາດ ຈາກສະພາບການປ່ຽນແປງຂອງດິນຟ້າອາກາດ ອັນໄດ້ສົ່ງຜົນກະທົບ ຕໍ່ປະຊາຊົນບັນດາເຜົ່າ, ການນຳໃຊ້ຖົງຢາງ ແລະ ຜະລິດຕະພັນຈາກປຼາສະຕິກແມ່ນນັບມື້ເພີ່ມຂຶ້ນ ໃນນັ້ນປະມານ 50% ແມ່ນໃຊ້ພຽງຄັ້ງດຽວກໍ່ຖິ້ມ ເຊິ່ງສ່ວນໃຫຍ່ແມ່ນຖິ້ມລົງຕາມຫ້ວຍຮ່ອງຄອງບຶງ. ສິ່ງເສດເຫຼືອຈາກປຼາສະຕິກ ຈຶ່ງກາຍເປັນສິ່ງ ເສດເຫຼືອຕົ້ນຕໍ ທີ່ມະນຸດເຮົາສ້າງຂຶ້ນໃນປະຈຸບັນ.

 

ພາບ ແລະ ຂ່າວ: ຂ່າວແຂວງຄໍາມ່ວນ