ສຶກສາຄວາມເປັນໄປໄດ້ ໃນການພັດທະນາຣີສອດລາວ ຄົບວົງຈອນ ຢູ່ເມືອງໂພນໂຮງ ແຂວງວຽງຈັນ

    0
    441

    ລັດຖະບານ ແຫ່ງ ສປປ ລາວ ໄດ້ອະນຸຍາດ ໃຫ້ບໍລິສັດ ທີ່ປຶກສາໄຂ່ມຸກຕາເວັນອອກ ຈຳກັດ  ຈາກ ສ.ເກົາຫລີ ດຳເນີນການສຶກສາຄວາມເປັນໄປໄດ້  ໃນການພັດທະນາຣີສອດລາວ ຄົບວົງຈອນ  ຢູ່ບ້ານ ໜອງຂອນ, ຫລັກ 62, ເມືອງໂພນໂຮງ ແຂວງວຽງຈັນ,  ເພື່ອພັດທະນາໃຫ້ກາຍເປັນແຫລ່ງທ່ອງທ່ຽວ ມີຄວາມຫລາກຫລາຍ ແລະ ດຶງດູດນັກທ່ອງທ່ຽວຕ່າງປະເທດເຂົ້າມາ ສປປ ລາວ  ໃຫ້ນັບມື້ນັບຫລາຍຂຶ້ນ.

    ພິທີເຊັນບົດບັນທຶກຄວາມເຂົ້າໃຈ  ເພື່ອສຶກສາຄວາມເປັນໄປໄດ້ ໃນການພັດທະນາໂຄງການດັ່ງ ກ່າວ,  ໄດ້ຈັດຂຶ້ນທີ່ນະຄອນຫລວງວຽງຈັນ  ໃນວັນທີ 5 ມິຖຸນາ 2018 ລະຫວ່າງ ທ່ານ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ  (ເຊັນຕາງໜ້າໃຫ້ລັດຖະບານ) ແລະ ທ່ານ ຈອງ ແທຈິນ ຜູ້ອໍານວຍການ ບໍລິສັດ  ທີ່ປຶກສາໄຂ່ມຸກຕາເວັນອອກ ຈຳກັດ,  ໂດຍມີ ທ່ານ ບຸນມາ ເພັດສາວົງ ຫົວໜ້າກົມຄຸ້ມຄອງການທ່ອງທ່ຽວ,  ທ່ານ ສຸກັນ ວິໄລຣັດ ຫົວໜ້າ ພະແນກແຜນການແຂວງວຽງຈັນ,  ທ່ານ ຄິມ ວອນພຽວ ປະທານບໍລິສັດ ທີ່ປຶກສາໄຂ່ມຸກຕາເວັນອອກ ຈຳກັດ  ແລະ ທ່ານ ນາງ ລັດດາວອນ ພູນສະຫວັດ  ຮອງຜູ້ອຳນວຍການ ບໍລິສັດ ທີ່ປຶກສາໄຂ່ມຸກຕາເວັນອອກ  ຈຳກັດ ເຊັນເປັນສັກຂີພິຍານ.

    ທ່ານ ນາງ ລັດດາວອນ ພູນສະຫວັດ ກ່າ​ວວ່າ:  ການສຶກສາຄວາມເປັນໄປໄດ້ ໃນການພັດ ທະນາໂຄງການດັ່ງກ່າວ,  ຈະໃຊ້ເວລາທັງໝົດ 18 ເດືອນ, ສ່ວນໄລຍະເວລາ ໃນການກໍ່ສ້າງຄາດວ່າຈະໃຊ້ເວລາປະມານ 10-15 ປີ  ຈຶ່ງຈະສໍາເລັດສົມບູນ. ໂດຍບໍລິສັດດັ່ງກ່າວ,  ຈະໃຊ້ງົບປະມານທັງໝົດ 3 ຕື້ໂດລາສະຫະລັດ  ເຂົ້າໃນການພັດທະນາ. ຖ້າ​ຫາກ​ກ້າວ​ເຂົ້າ​ການ​ພັດທະນາ​ໂຄງການ​ແລ້ວ  ລັດຖະບານລາວ ຈະຖືຮຸ້ນ 20% ແລະ ບໍລິສັດ ທີ່ປຶກສາໄຂ່ມຸກຕາເວັນອອກ  ຈຳກັດ ຖືຮຸ້ນ 80%.

    ໂຄງການດັ່ງກ່າວ, ມີເນື້ອທີ່ທັງໝົດ 1.200 ເຮັກຕາ,  ຈະປະກອບມີ: ຣີສອດ, ສວນນ້ຳ, ສວນສະໜຸກ,  ໂຮງຮຽນນານາຊາດ, ໂຮງໝໍລະດັບສາກົນ,  ເຮືອນພັກທີ່ຫລູຫລາ ​ແລະ ສວຍງາມ, ໂຮງແຮມລະດັບ 5 ດາວ,  ສະໜາມກ໊ອບ, ເຂດກິລາໜ້ານ້ຳ, ສູນປະຊຸມ, ສູນການຄ້າ, ໂຮງລະຄອນ, ໝູ່ບ້ານພື້ນເມືອງ ແລະ ຫໍພິພິທະພັນ, ຫ້ອງສະແດງສິລະປະ, ເຂດພື້ນທີ່ສີຂຽວ ແລະ ອື່ນໆ.

    ຣີສອດລາວ ຄົບວົງຈອນແຫ່ງນີ້,  ເມື່ອສ້າງສຳເລັດຈະສາມາດສ້າງວຽກເຮັດງານທຳ ທີ່ໝັ້ນຄົງ ໃຫ້ກັບປະຊາຊົນລາວ ເປັນຈຳນວນຫລວງຫລາຍ, ໂດຍສະເພາະ ຊຸມຊົນໃກ້ຄຽງ ເພື່ອຫລີກລ້ຽງການຮົ່ວໄຫລ ແຮງງານໄປຕ່າງປະເທດ, ພ້ອມທັງຈະສ້າງໂສມໜ້າໃໝ່  ໃນຂະແໜງການທ່ອງທ່ຽວໃຫ້ແກ່ ສປປ ລາວ ນຳອີກ.

    ຂ່າວ-ພາບ: ສິງຄຳ (ຂປລ)