ທົ່ວແຂວງເຊກອງ ພົບໄຂ້ຍຸງລາຍ 57 ກໍລະນີ

0
527

ເພື່ອປະຕິບັດຕາມຄໍາສັ່ງຂອງນາຍົກລັດຖະມົນຕີ,ສະບັບເລກທີ 08/ນຍ,ລົງວັນທີ 19 ພຶດສະພາ 2017 ວ່າດ້ວຍການປ້ອງກັນ ແລະສະກັດກັ້ນການລະບາດຂອງພະຍາດໄຂ້ຍູງລາຍ ດັ່ງນັ້ນໃນວັນທີ 8 ມິຖຸນາ 2018 ນີ້ ພະແນກສາທາລະນະສຸກ ແຂວງເຊກອງໄດ້ຈັດກອງປະຊຸມສະຫຼຸບລາຍງານການຈັດຕັ້ງປະຕິບັດການຄວບຄຸມພະຍາດໄຂ້ຍູງລາຍ ໄລຍະ 6 ເດືອນຕົ້ນປີ 2018 ໂດຍການເຂົ້້າຮ່ວມຂອງທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ, ຊີ້ນໍາວຽກງານວັດທະນະທຳ-ສັງຄົມ, ທ່ານ ວິສັນ ອິນທະວົງ ຫົວໜ້າພະແນກສາທາລະນະສຸກແຂວງ,ມີເຈົ້າເມືອງ, ຮອງເຈົ້າເມືອງ 4 ຕົວເມືອງ ພ້ອມດ້ວຍຂະແໜງການທີ່ກ່ຽວຂ້ອງເຂົ້າຮ່ວມ.

ທ່ານ ດຣ ກົງສິນ ວົງເສດຖາ ຫົວໜ້າຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກແຂວງ ໄດ້ລາຍງານການເຝົ້າລະວັງ,ລາຍງານ ການຄວບຄຸມໝວດອາການພະຍາດໄຂ້ຍູງລາຍໄລຍະ 6 ເດືອນຕົ້ນປີ 2018 ໃຫ້ຮູ້ວ່າ: ນັບແຕ່ອາທິດທີ 1-23/5/2018 ທົ່ວແຂວງ ພົບໄຂ້ຍູງລາຍ 57 ກໍລະນີ, ໃນຈໍານວນ 28 ບ້ານ, ມີ 3 ຕົວຢ່າງໃຫ້ຜົນບວກ ແຕ່ບໍ່ມີກໍລະນີເສຍຊີວິດ,ເຊິ່ງພົບຫຼາຍກວ່າໝູ່ແມ່ນເມືອງລະມາມ ມີ 17 ບ້ານ ມີ 41 ກໍລະນີ, ດາກຈຶງ ມີ 4 ບ້ານ ມີ 16 ກໍລະນີ ,ກະລຶມ ມີ 5 ບ້ານ ມີ 8 ກໍລະນີ, ທ່າແຕງ ມີ 2 ບ້ານ ມີ 2 ກໍລະນີ, ສ່ວນໃຫຍ່ພົບໃນກຸ່ມອາຍຸ 30-39 ປີ ເທົ່າກັບ 26,3%, ຊາຍ 47,4% ແລະຍິງ 52,6%; ສໍາລັບປີ 2017 ມີຄົນເຈັບທັງຫໝົດ 207 ກໍລະນີ, ເກັບຕົວຢ່າງ 15 ຕົວຢ່າງ, ມີ 5 ຕົວຢ່າງໃຫ້ຜົນບວກ ແຕ່ບໍ່ມີກໍລະນີເສຍຊີວິດ.

ທ່ານ ດຣ ກົງສິນ ວົງເສດຖາ ໃຫ້ຮູ້ອີກວ່າ: ຍຸດທະສາດການຄວບຄຸມໄຂ້ຍູງລາຍ ແມ່ນມີການເຝົ້າລະວັງ ແລະການລາຍງານ, ການວິເຄາະວິທະຍາ, ລົງສອບສວນ ແລະຕອບໂຕ້, ປິ່ນປົວ ແລະຄວບຄຸມກໍລະນິ, ກໍາຈັດ ແລະທຳລາຍແຫຼ່ງເພາະພັນໜອນນໍ້າ, ໂຄສະນາສຸຂະສຶກສາຕາມບ້ານທີ່ມີຄວາມສ່ຽງ; ນອກນີ້ ຍັງໄດ້ມີການເຝົ້າລະວັງຕະຫຼອດ 24 ຊົ່ວໂມງ, ອົບຮົມການຄຸ້ມຄອງກໍລະນີໄຂ້ຍູງລາຍໃຫ້ແກ່ບັນດາແພດໝໍ ແລະນາງພະຍາບານໃນ 4 ເມືອງ ແລະສຸກສາລາທີ່ຂຶ້ນກັບ, ປຸກລະດົມສ້າງຂະບວນການຂ້າໜອນນໍ້າ(ແຈກຢາຍຢາຂ້າໜອນນໍ້າ,ແຜ່ນພັບ ຮ່ວມກັບຊາວບ້ານ), ອົບຮົມການລົງສໍາຫຼວດໜອນນໍ້າ, ການເຝົ້າລະວັງ-ລາຍງານປະຈໍາວັນໃຫ້ພະນັກງານແພດໝໍຂັ້ນແຂວງ,ເມືອງ,ສຸກສາລາ ແລະ ອສບ, ມີການທໍາລາຍໜອນນໍ້າ ແລະຍູງຕົວແກ່ໃນເຂດຄວາມສ່ຽງໂດຍບໍ່ໄດ້ລັງເລ, ແຕ່ລະເມືອງມີສານເຄມີ ແລະເຄື່ອງພົ່ນຢາພຽງພໍ, ປຸກລະດົມຊຸມຊົນໃຫ້ເອົາໃຈໃສ່ປະຕິບັດຫຼັກການ 5 ປ ຢ່າງເປັນເຈົ້າການ, ສະຖານທີ່ສາທາລະນະສຸກທຸກຂັ້ນແມ່ນມີຄວາມພ້ອມຮອງຮັບຄົນເຈັບ, ມີຂໍ້ແນະນຳຫ້ອງກວດພະຍາດເອກະຊົນ ບໍ່ໃຫ້ປິ່ນປົວຊະຊາຍ ແລະແນະນໍາໃຫ້ສົ່ງຄົນເຈັບໄປສະຖານທີ່ບໍລິການທີ່ມີເງື່ອນໄຂດີກວ່າ.

ສໍາລັບ 6 ເດືອນທ້າຍປີ 2018 ເພື່ອຫຼຸດຜ່ອນອັດຕາການເຈັບເປັນຍ້ອນພະຍາດໄຂ້ຍູງລາຍໃນລະດັບທີ່ສາມາດຄວບຄຸມໄດ້ ສະກັດກັ້ນບໍ່ໃຫ້ແຜ່ລາມໃນວົງກວາ້ງນັ້ນ ພວກເຮົາຈະໄດ້ສືບຕໍ່ບັນດາໜ້າວຽກທີ່ຕ້ອງຈັດຕັ້ງປະຕິບັດມີ 7 ວຽກໃຫຍ່ຄື: ເຝົ້າລະວັງ-ລາຍງານ, ວຽກງານວິເຄາະວິທະຍາ, ການລົງສອບສວນ ແລະຕອບໂຕ້, ວຽກງານປຸກລະດົມຊຸມຊົນ ແລະໂຄສະນາສຸຂະສຶກສາ,ກໍາຈັດ ແລະທຳລາຍແຫຼ່ງເພາະພັນໜອນນໍ້າ, ປິ່ນປົວ ແລະຄວບຄຸມກໍລະນີ, ວຽກງາປະສານງານ EOC( ຫ້ອງການປະຕິບັດການວຽກງານສຸກເສີນທາງດ້ານສຸຂະພາບ)

ພາບ-ຂ່າວ: ພຸດທະສອນ (ຂ່າວແຂວງເຊກອງ)