ອົງການໄອຍະການປະຊາຊົນສອງແຂວງແລກປ່ຽນບົດຮຽນ

    0
    240

    (ເຊກອງ,ວັນທີ 13/08/2018) * ວັນທີ 13 ມິຖຸນາ 2018 ອົງການໄອຍະການປະຊາຊົນແຂວງເຊກອງ ນໍາໂດຍທ່ານ ສໍລະເສີນສັກ ຟອງສານຸວົງ ຮອງເລຂາໜ່ວຍພັກ, ຮອງຫົວໜ້າອົງການໄອຍະການປະຊາຊົນແຂວງເຊກອງ ພ້ອມຄະນະໄດ້ຕ້ອນຮັບການມາຮ່ວມເຮັດວຽກ ແລະແລກປ່ຽນບົດຮຽນຂອງອົງການໄອຍະການປະຊາຊົນແຂວງກວາງນາມ ສສ ຫວຽດນາມ ນຳໂດຍທ່ານ ຫງວຽນ ວັນ ກວາງ ຫົວໜ້າອົງການໄອຍະການປະຊາຊົນແຂວງກວາງນາມ ພ້ອມຄະນະທີ່ອົງການໄອຍະການປະຊາຊົນແຂວງເຊກອງຢ່າງອົບອຸ່ນ ແລະສົມກຽດ.

    ການປຶກສາຫາລືຄັ້ງນີ້ ທັງສອງຝ່າຍເຫັນດີສືບຕໍ່ພັດທະນາສາຍພົວພັນມິດຕະພາບ ແລະການຮ່ວມມືຮອບດ້ານຂອງສອງພັກ, ສອງລັດ ໂດຍສະເພາະແມ່ນການຮ່ວມມືລະຫວ່າງອົງການໄອຍະການໃນການຊຸກຍູ້ ແລະຕ້ານອາດຊະຍາກຳໃນຂອບເຂດຊາຍແດນລະຫວ່າງສອງແຂວງ, ຮ່ວມມືແກ້ໄຂບັນຫາທາງດ້ານການກະທຳຜິດຂອງປະຊາຊົນຫວຽດນາມທີ່ຜິດຕໍ່ກົດໝາຍຂອງລາວ ແລະປະຊາຊົນລາວທີ່ຜິດຕໍ່ກົດໝາຍຂອງຫວຽດນາມ, ເຫັນເປັນເອກະພາບຈັດກອງປະຊຸມຮອບວຽນ 2 ປີຕໍ່ຄັ້ງ ໂດຍຜັດປ່ຽນກັນເປັນເຈົ້າພາບ ເພື່ອແນໃສ່ແລກປ່ຽນບົດຮຽນໃນວຽກງານງານວິຊາການ, ຂໍ້ມູນຂ່າວສານຕ່າງໆກ່ຽວກັບການກໍ່ອາດຊະຍາກຳຂອງກຸ່ມຄົນບໍ່ດີ, ທັງນີ້ ສອງຝ່າຍມີຄວາມຮັບຜິດຊອບໃນການຈັດຕັ້ງປະຕິບັດບົດບັນທຶກກອງປະຊຸມການຮ່ວມມືອົງການໄອຍະການປະຊາຊົນບັນດາແຂວງທີ່ມີຊາຍແດນຮ່ວມຂອງສອງປະເທດ ລາວ-ຫວຽດນາມຄັ້ງທີ V. 


    ນີ້ແມ່ນສ່ວນໜຶ່ງຂອງການເພີ່ມທະວີກໍ່ສ້າງພື້ນຖານສາຍພົວພັນມິດຕະພາບທີ່ມີມາແຕ່ດົນນານຂອງສອງຊາດລາວ-ຫວຽດນາມຮ່ວມມືຊ່ວຍເຫຼືອເຊີ່ງກັນ ແລະກັນໃຫ້ນັບມື້ຮັດແໜ້ນຍິ່ງໆຂຶ້ນ ເວົ້າສະເພາະກໍຄືອົງການໄອຍະການປະຊາຊົນແຂວງເຊກອງກັບອົງການໄອຍະການປະຊາຊົນແຂວງກວາງນາມ, ເສີມສ້າງຄວາມເຂົ້າໃຈກ່ຽວກັບລະບຽບກົດໝາຍ, ວັດທະນະທຳ, ດ້ານຄວາມຍຸຕິທຳຂອງແຕ່ລະຝ່າຍ, ສຶກສາໂຄສະນາອົບຮົມຍົກສູງຄວາມຮັບຮູ້ລະບຽບກົດໝາຍໃຫ້ແກ່ປະຊາຊົນບໍລິເວນຊາຍແດນສອງແຂວງ ກໍຄືສອງປະເທດລາວ-ຫວຽດນາມ, ຫວຽດນາມ-ລາວ.

    ຂ່າວ: ສັນຍາ (ຂ່າວແຂວງເຊກອງ)