ເມືອງແກ່ນທ້າວ ແຂວງໄຊຍະບູລີ ມີຜູ້ສະໝັກໃຈບໍລິຈາກເລືອດ 14 ຄົນ ເນື່ອງໃນວັນຜູ້ບໍລິຈາກເລືອດໂລກ ຄົບຮອບ 14 ປີ

0
448

ເມືອງແກ່ນທ້າວ ແຂວງໄຊຍະບູລີ ມີຜູ້ສະໝັກໃຈບໍລິຈາກເລືອດ 14 ຄົນ ເນື່ອງໃນວັນຜູ້ບໍລິຈາກເລືອດໂລກ ຄົບຮອບ 14ປີ

ວັນຜູ້ບໍລິຈາກເລືອດໂລກໄດ້ສ້າງຕັ້ງຂຶ້ນ ໃນປີ 2004 ໂດຍການເຫັນດີເຫັນພ້ອມຂອງ 4 ອົງການຈັດຕັ້ງລະດັບສາກົນທີ່ກ່ຽວຂ້ອງຄື: ອົງການອະນາໄມໂລກ, ສະຫະພັນກາແດງ ແລະ ຊີກວົງເດືອນແດງສາກົນ, ສະຫະພັນຜູ້ບໍລິຈາກເລືອດສາກົນ ແລະ ສະມາຄົມສາກົນເພື່ອການສົ່ງເລືອດ. ການເລືອກເອົາວັນທີ 14 ມິຖຸນາ ເປັນວັນຜູ້ບໍລິຈາກເລືອດໂລກ ແມ່ນເພື່ອລະນຶກເຖິງວັນຄ້າຍວັນເກີດທ່ານ ຄານແລນ ສະແຕນເນີ ເກີດເມື່ອວັນທີ 14 ມິຖຸນາ 1868 ນັກວິທະຍາສາດຊາວໂອຕຣິດຊຽນ ເຊິ່ງເປັນຜູ້ຄົ້ນພົບໝວດເລືອດລະບົບ ABO ແລະ ເກີດມີການສົ່ງເລືອດແກ່ຄົນ ນັບແຕ່ປີ 1900 ເປັນຕົ້ນມາ.

ໃນວັນທີ 14 ມິຖຸນາ 2018 ນີ້, ຫ້ອງການກາແດງເມືອງແກ່ນທ້າວ ໄດ້ເຊີນຊວນພະນັກງານ, ທະຫານ, ຕໍາຫຼວດ ແລະ ປະຊາຊົນຢູ່ພາຍໃນເມືອງໄປບໍລິຈາກເລືອດບໍ່ຫວັງສິ່ງຕອບແທນຢູ່ທີ່ໂຮງໝໍເມືອງ. ເຊິ່ງມີຜູ້ມາບໍລິຈາກເລືອດ 14 ຄົນ, ຍິງ 4 ຄົນ. ຜ່ານການກວດສຸພາບໄດ້ຜູ້ບໍລິຈາກເລືອດຕົວຈິງ 12 ຄົນ ໄດ້ເລືອດ 12 ຖົງ ເທົ່າກັບ 4.200 ຊີຊີ. ເລືອດດັ່ງກ່າວແມ່ນເກັບຮັກສາໄວ້ຢູ່ໂຮງໝໍເມືອງເພື່ອຊ່ວຍຄົນເຈັບທີ່ຕ້ອງການເລືອດໃນຂັ້ນຕໍ່ໄປ.