ກະຊວງການເງິນ ສະເໜີຮ່າງກົດໝາຍ ວ່າດ້ວຍອາກອນມູນຄ່າເພີ່ມສະບັບປັບປຸງ ໃຫ້ຜູ້ແທນກອງປະຊຸມໄດ້ພ້ອມກັນຄົ້ນຄວ້າປະກອບຄຳເຫັນໃສ່

0
576

ການດຳເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ 8 ໃນວັນທີ 20 ມິຖຸນາ 2018 ໂດຍການເປັນປະທານຂອງທ່ານນາງປານີຢາທໍ່ຕູ້ປະທານສະພາແຫ່ງຊາດ, ຜູ້ແທນກອງປະຊຸມໄດ້ພ້ອມກັນຄົ້ນຄວ້າປະກອບຄຳເຫັນໃສ່ຮ່າງກົດໝາຍວ່າດ້ວຍອາກອນມູນຄ່າເພີ່ມສະບັບປັບປຸງ, ສະເໜີໂດຍທ່ານສົມດີດວງດີຮອງນາຍົກລັດຖະມົນຕີລັດຖະມົນຕີກະຊວງການເງິນ, ຮ່າງກົດໝາຍສະບັບນີ້ໄດ້ຮັບຮອງເອົາໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ 4 ປີ 2006 ເລີ່ມຈັດຕັ້ງປະຕິບັດຕົວຈິງໃນປີ 2010, ປະກອບມີ 7 ພາກ, 13 ໝວດ, 55 ມາດຕາ, ປັບປຸງໃນປີ 2014 ປະກອບມີ 10 ພາກ, 10 ໝວດ, 67 ມາດຕາແລະໄດ້ຈັດຕັ້ງປະຕິບັດມາຮອດປັດຈຸບັນ. ສຳລັບການປັບປຸງຄັ້ງນີ້ປະກອບມີ 8 ພາກ, 11 ໝວດ, 64 ມາດຕາ, ຜ່ານການຈັດຕັ້ງປະຕິບັດຜ່ານມາທຽບໃສ່ຄວາມເປັນຈິງຂອງການພັດທະນາເສດຖະກິດສັງຄົມໃນປັດຈຸບັນ, ຫຼັກການຂອງອາກອນມູນຄ່າເພີ່ມແລະການເປີດກວ້າງການພົວພັນເສດຖະກິດກັບຕ່າງປະເທດເຫັນວ່າກົດໝາຍສະບັບນີ້ຍັງມີບາງເນື້ອໃນມີຄວາມຫຍຸ້ງຍາກໃນການຈັດຕັ້ງປະຕິບັດແລະບໍ່ສອດຄ່ອງກັບຫຼັກການຂອງອາກອນມູນຄ່າເພີ່ມ.

ທ່ານສົມດີດວງດີຮອງນາຍົດລັດຖະມົນຕີລັດຖະມົນຕີກະຊວງການເງິນໃຫ້ຮູ້ວ່າ: ເຫດຜົນແລະຄວາມຈຳເປັນຂອງການຄົ້ນຄວ້າປັບປຸງກົດໝາຍວ່າດ້ວຍອາກອນມູນຄ່າເພີ່ມ, ແນ່ໃສ່ເຮັດໃຫ້ການຈັດຕັ້ງປະຕິບັດແຜນພັດທະນາເສດຖະກິດສັງຄົມແລະແຜນງົບປະມານແຫ່ງລັດໃນແຕ່ລະໄລຍະມີປະສິດທິຜົນແລະເຂັ້ມງວດໃນການປະຕິບັດລັດຖະທຳມະນູນ, ກົດໝາຍແລະນິຕິກຳຕ່າງໆທີ່ກ່ຽວຂ້ອງ.

ທ່ານນາງທັດສະດາພອນແສງສຸລິຍາສະມາຊິກສະພາແຫ່ງຊາດເຂດເລືອກຕັ້ງທີ 15 ແຂວງຈຳປາສັກປະກອບຄຳເຫັນໃສ່ຫຼາຍມາດຕາຂອງກົດໝາຍວ່າດ້ວຍອາກອນມູນຄ່າເພີ່ມ, ສ່ວນໃຫຍ່ເນັ້ນໜັກໃສ່ປັບປຸງບາງເນື້ອໃນ, ບາງປະໂຫຍກທີ່ຍັງບໍ່ທັນມີຄວາມໝາຍຄົບຖ້ວນ, ເຂົ້າໃຈຍາກແລະບໍ່ທັນຮັດກຸມ.

ທ່ານບຸນປອນສີສຸລາດສະມາຊິກສະພາແຫ່ງຊາດເຂດເລືອກຕັ້ງທິ 14 ແຂວງສາລະວັນປະກອບຄຳເຫັນໃສ່ບາງມາດຕາທີ່ເວົ້າເຖິງຄວາມໝາຍຂອງຜູ້ເກັບແລະຜູ້ມອບອາກອນ, ການເກັບອາກອນການນຳເຂົ້າອຸປະກອນການຜະລິດ , ການກໍ່ສ້າງແລະເຄື່ອງຈັກຕ່າງໆທີ່ລາວເຮົາຜະລິດບໍ່ໄດ້ການກຳນົດອັດຕາອາກອນມູນຄ່າເພີ່ມແລະບັນຫາອື່ນໆ.

ການດຳເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ 8 ສຳລັບຕອນບ່າຍວັນທີ 20 ມິຖຸນາ 2018 ຜູ້ຕາງໜ້າສູນກາງແນວລາວສ້າງຊາດໄດ້ສະເໜີຮ່າງກົດໝາຍວ່າດ້ວຍແນວລາວສ້າງຊາດ, ສະບັບປັບປຸງຈາກນັ້ນປະທານກອງປະຊຸມໃຫ້ທິດຊີ້ນຳໃນການປະກອບຄຳເຫັນແລະສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆປະກອບຄຳເຫັນເຂົ້າໃສ່ຮ່າງກົດໝາຍວ່າດ້ວຍລາວສ້າງຊາດສະບັບປັບປຸງ.

Source : Lao National Radio