ຮອງລັດຖະມົນຕີກະຊວງພາຍໃນ ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງ ທ່າແຕງ

0
581

ໃນຕອນເຊົ້າວັນທີ 21 ມິຖຸນາ 2018 ນີ້ ຢູ່ຫ້ອງປະຊຸມຊັ້ນ II ຫ້ອງວ່າການປົກຄອງເມືອງ ໄດ້ຕ້ອນຮັບ ທ່ານ ຄໍາມູນ ວິພົງໄຊ ຮອງລັດຖະມົນຕີກະຊວງພາຍໃນ ພ້ອມດ້ວຍຄະນະ ທີ່ມາເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບການນໍາເມືອງ ທ່າແຕງ ແຂວງ ເຊກອງ, ໂດຍໃຫ້ກຽດຕ້ອນຮັບຢ່າງອົບອຸ່ນຈາກທ່ານ ບຸນສວນ ບຸດບຸນມາ ຄະນະປະຈໍາພັກເມືອງ ປະທານກວດກາພັກ-ລັດເມືອງ ທ່າແຕງ ພ້ອມດ້ວຍພະແນກການກ່ຽວຂ້ອງຂັ້ນແຂວງ ແລະ ພະນັກງານວິຊາການຈາກຫ້ອງການພາຍໃນເມືອງ ທ່າແຕງໄດ້ໃຫ້ການຕ້ອນຮັບຢ່າງສົມກຽດ.


ໂອການເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບການນໍາເມືອງ ທ່າແຕງ ຄັ້ງນີ້ ທ່ານຮອງລັດຖະມົນຕີກະຊວງພາຍໃນ ໄດ້ຮັບຟັງການລາຍງານກ່ຽວກັບສະພາບລວມ ການຈັດຕັ້ງປະຕິບັດວຽກງານຂອງຫ້ອງການພາຍໃນເມືອງ ທ່າແຕງ ຈາກທ່ານ ສຸກສະ ໄໝ ວົງສະນຸພິດ ຫົວໜ້າຫ້ອງການພາຍໃນເມືອງ ທ່າແຕງວ່າ: ຫ້ອງການພາຍໃນເມືອງທ່ານແຕງ ໄດ້ເອົາໃຈໃສ່ຈັດປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ, ເປັນເສນາທິການໃຫ້ຄະນະພັກອໍານາດການປົກຄອງເມືອງໃນລະບົບການບໍລິຫານລັດ, ສາຍຕັ້ງແມ່ນຂື້ນກັບພະແນກພາຍໃນແຂວງ, ປະກອບມີ 5 ໜ່ວຍງານຄື: ໜ່ວຍງານບໍລິຫານ-ການເງິນ, ໜ່ວຍງານຄຸ້ມຄອງລັດຖະກອນ, ໜ່ວຍງານຄຸ້ມຄອງພົນລະເມືອງ-ສາສະໜາ,ໜ່ວຍງານການປົກຄອງ ແລະ ແຜນທີ່, ໜ່ວຍງານແຂ່ງຂັນຍ້ອງຍໍ ແລະ ສໍາເນົາເອກະສານທາງລັດຖະການ, ມີພະນັກງານລັດຖະກອນທັງໝົດ 14 ສະຫາຍ, ຍິງ 2 ສະຫາຍ. ໄລຍະໜື່ງຜ່ານມາ ຄະນະພັກ-ຄະນະນໍາຫ້ອງການພາຍໃນເມືອງທ່າແຕງ, ໄດ້ເອົາໃຈໃສ່ຊີ້ນໍາ-ນໍາພາສຶກສາອົບຮົມການເມືອງ-ແນວຄິດ, ຈັດຕັ້ງຮໍ່າຮຽນແນວທາງນະໂຍບາຍ, ມະຕິ, ຄໍາສັ່ງ ແລະ ນິຕິກໍາຕ່າງໆຂອງພັກຢ່າງກວ້າງຂວາງ ໄດ້ເປີດກອງປະຊຸມໃຫ່ຍນາຍບ້ານໄດ້ທັງໝົດ 17 ບ້ານ, ປະຕິບັດນະໂຍບາຍຍ້ອງຍໍຕໍ່ຜູ້ມີຜົນງານດີເດັ່ນໃນການປະກອບສ່ວນພັດທະນາເມືອງ ທ່າແຕງ ມີຫຼຽນໄຊການສ້າງຂະບວນການຮັກຊາດ ແລະ ພັດທະນາຕິດພັນກັບວຽກງານ 3 ສ້າງມີ 13 ຫຼຽນ, ຫຼຽນໄຊແຮງງານຊັ້ນ 1 ມີ 2 ໜ່ວຍ,ຫຼຽນໄຊແຮງງານຊັ້ນ 2 ມີ 5 ໜ່ວຍ, ຫຼຽນໄຊແຮງງານຊັ້ນ 3 ມີ 4 ໜ່ວຍ, ຫຼຽນກາແຮງງານມີ 2 ໜ່ວຍ, ໃບຍ້ອງຍໍລັດຖະບານມີ 16 ໃບ, ໃບຍ້ອງຍໍເຈົ້າເມືອງມີ 276 ໃບ, ໃບຊົມເຊີຍ ແລະ ໃບກຽດຕິຄຸນຂອງເຈົ້າເມືອງມີ 169 ໃບ,ທົ່ວເມືອງມີ 26 ຫ້ອງການ, ມີພະນັກງານລັດຖະກອນທັງໝົດ 953 ຄົນໃນປີ 2017.


ໃນໂອກາດນີ້ ທ່ານຮອງລັດຖະມົນຕີກະຊວງພາຍໃນ ໄດ້ສະແດງຍ້ອງຍໍຊົມເຊີຍຕໍ່ຜົນສໍາເລັດໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ເຮັດໃຫ້ວຽກງານພາຍໃນ ຢູ່ເມືອງທ່າແຕງ ມີຄວາມໜັກແໜ້ນ ແລະ ເຂັ້ມແຂງ ພ້ອມນັ້ນ ໂອ້ລົມ ແລະ ເນັ້ນໃຫ້ເອົາໃຈໃສ່ກວດເບິ່ງຄືນບັນດາກິດຈະກໍາຕ່າງໆທີ່ເກີດຂື້ນຢູ່ໃນບ້ານ 3 ສ້າງຂອງເມືອງ, ບັນຫາສາສະໜາ, ຄາດໝາຍແຜນພັດທະນາເສດຖະກິດ-ສັງຄົມຂອງເມືອງ, ມີອັນໃດທີ່ເຫັນວ່າຍັງປະຕິບັດບໍ່ທັນໄດ້ດີແມ່ນໃຫ້ພ້ອມກັນຮີບຮ້ອນແກ້ໄຂ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງ-ທັນກັບເວລາ, ກໍາແໜ້ນພາລະບົດບາດ, ສິດໜ້າທີ່ຂອງຕົນ ຊີ້ແຈງໃຫ້ທຸກພາກສ່ວນຮັບຮູ້ເຂົ້າໃຈຕໍ່ວຽກງານ ບໍລິຫານຜ່ານປະຕູດຽວ, ເຕົ້າໂຮມຄວາມສາມັກຄີພາຍໃນໃຫ້ໜັກແໜ້ນ ຕິດພັນກັບ 4 ເນື້ອໃນ 4 ຄາດໝາຍ ແລະ ວຽກງານ 5 ດ້ານທີ່ປິ່ນອ້ອມຢູ່ພາຍໃນເມືອງ,ສືບຕໍ່ເອົາໃຈໃສ່ ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ, ປັບປຸງແບບແຜນນໍາພາຂອງຕົນໃຫ້ເຂົ້າສູ່ລະບຽບຫຼັກການ, ປະຕິບັດລະບອບຄວບຕໍາແໜ່ງເປັນສວນຫຼາຍ ນັບແຕ່ຂັ້ນເມືອງລົງຮອດຮາກຖານບ້ານ, ເຊີດຊູບົດບາດການຄຸ້ມຄອງຂອງລັດ-ຄຸ້ມຄອງສັງຄົມ, ເສີມຂະຫຍາຍສິດເປັນເຈົ້າຂອງບັນດາອົງການຈັດຕັ້ງ, ປະຕິບັດລະບອບລວມສູນປະຊາທິປະໄຕ ນໍາພາເປັນໝູ່ຄະນະ, ບຸກຄົນຮັບຜິດຊອບ, ຄຸ້ມຄອງພະນັກງານຫັນເຂົ້າສູ່ລະບົບຕາມການແບ່ງຂັ້ນຄຸ້ມຄອງ, ເອົາໃຈໃສ່ຄຸ້ມຄອງຂໍ້ມູນ-ສະຖິຕິພະນັກງານ-ລັດຖະກອນ ດ້ວຍການນໍາໃຊ້ລະບົບເຕັກນິກທີ່ທັນສະໄໝ, ທັງນີ້ກໍ່ເພື່ອແນໃສ່ເຮັດໃຫ້ວຽກງານພາຍໃນຢູ່ເມືອງທ່າແຕງ ກໍ່ຢູ່ໃນຂອບເຂດທົ່ວປະເທດ ມີຄວາມເຂັ້ມແຂງ-ໜັກແໜ້ນ. ຂ່າວ : ພອນ ບຸນອຸທິດ (ຂ່າວເຊກອງ)