ອົງການກວດກາລັດສອງແຂວງ ແຂວງເຊກອງ ແລະ ແຂວງກວາງນາມ ສສ ຫວຽດນາມແລກປ່ຽນບົດຮຽນ

0
222

ວັນທີ 25 ມິຖຸນາ 2018 ທີ່ແຂວງເຊກອງໄດ້ມີພິທີພົບປະຖອດຖອນແລກປ່ຽນບົດຮຽນກ່ຽວກັບວຽກງານກວດກາລັດລະຫວ່າງອົງການກວດກາລັດແຂວງເຊກອງ ສປປ ລາວກັບອົງການກວດກາລັດແຂວງກວາງນາມ ສສ ຫວຽດນາມ. ຊຶ່ງແຂວງເຊກອງນຳໂດຍທ່ານ ຫີນເພັດ ແກ້ວຫົງສາ ຮອງປະທານກວດກາພັກ ແລະທ່ານ ອ່ອນມະນີວັນ ຈັນດາວົງ ຮອງປະທານກວດກາລັດ, ສ່ວນແຂວງກວາງນາມແມ່ນທ່ານ ມາຍ ວັນຕາມ ຮອງປະທານກວດກາລັດຕະຫຼອດຮອດຄະນະວິຊາການທັງສອງຝ່າຍເຂົ້າຮ່ວມ.

ທ່ານ ອ່ອມະນີວັນ ຈັນດາວົງ ໄດ້ລາຍງານສະພາບລວມ ແລະການເຄື່ອນໄຫວວຽກງານໃຫ້ອົງການກວດກາລັດແຂວງກວາງນາມໄດ້ຊາບຊຶ່ງມີຫຼາຍບັນຫາທີ່ພົ້ນເດັ່ນໂດຍສະເພາະແມ່ນໄດ້ຕິດຕາມປະສານສົມທົບແລະຊຸກຍູ້ການແກ້ໄຂບາງປະກົດການຫຍໍ້ທໍ້ເຂດຊາຍແດນຄື: ແກ້ໄຂບັນຫາການລັກລອບຂຸດຄົ້ນແລະເຄື່ອນຍ້າຍຊັບພະຍາກອນທຳມະຊາດ, ບັນຫາການຕັ້ງພູມລຳເນົາຕາມລຳພັງໃຈຂອງປະຊາຊົນແລະການສ້າງຄອບຄົວບໍ່ຖືກຕາມກົດໝາຍຢູ່ລຽບຊາຍແດນລາວຫວຽດນາມໂດຍສະເພາະແມ່ນຊາຍແດນແຂວງເຊກອງກັບແຂວງກວາງນາມ. ຫຼັງຈາກນັ້ນທ່ານມາຍວັນຕາມໄດ້ລາຍງານການປະຕິບັດວຽກງານກວດກາລັດແຂວງກວາງນາມໃຫ້ໄດ້ຊາບ.


ໃນກອງປະຊຸມທັງສອງອົງການກວດກາຍັງໄດ້ມີການປຶກສາຫາລື, ປະກອບຄຳຄິດຄຳເຫັນຖອດຖອນແລະແລກປ່ຽນບົດຮຽນທີ່ເຕັມໄປດ້ວຍເນື້ອໃນອັນສຳຄັນເຊັ່ນ: ສືບຕໍ່ຮ່ວມມືໃນການຂະຫຍາຍຄວາມສຳພັນແລະຄວາມສາມັກຄີແບບພິເສດໂດຍສອງຝ່າຍຫາລືກ່ຽວກັບການແກ້ໄຂບັນຫາການຍົກຍ້າຍຕັ້ງພູມລຳເນົາຕາມລຳພັງໃຈ, ການແຕ່ງດອງບໍ່ຖືກລະບຽບກົດໝາຍ, ການລັກລອບຂຸດຄົ້ນຊັບພະຍາກອນທຳມະຊາດແລະອື່ນໆໃຫ້ຖືກຕ້ອງສອດຄ່ອງກັບແນວທາງການເມືອງທີ່ສອງພັກສອງລັດວາງອອກຢ່າງເຂັ້ມງວດ.


ການມາຢ້ຽມຢາມແລະຮ່ວມເຮັດວຽກຂອງຄະນະຜູ້ແທນອົງການກວດກາລັດແຂວງກວາງນາມຄັ້ງນີ້ແມ່ນມີຄວາມໝາຍສຳຄັນຢ່າງຍິ່ງໃນການເພີ່ມທະວີສາຍພົວພັນມິດຕະພາບແລະການຮ່ວມມືແບບພິເສດຖານບ້ານໃກ້ເຮືອນຄຽງລະຫວ່າງແຂວງເຊກອງກັບແຂວງກວາງນາມໂດຍສະເພາະແມ່ນສອງອົງການກວດກາລັດຂັ້ນແຂວງໃຫ້ມີຄວາມແໜ້ນແຟ້ນຍິ່ງໆຂຶ້ນ.ຂາວ-ພາບ : ສັນຍາ (ຂ່າວແຂວງເຊກອງ)