ການເງິນ-ສ່ວຍສາອາກອນ ແຕ່ງຕັ້ງຮອງຫົວໜ້າພະແນກ

ວັນທີ 27 ມິຖຸນາ 2018 ທີ່ສະໂມສອນແຂວງເຊກອງໄດ້ຈັດພິທີປະກາດແຕ່ງຕັ້ງຮອງຫົວໜ້າພະແນກການເງິນ ແລະພະແນກສ່ວຍສາອາກອນແຂວງ ໂດຍການເປັນກຽດເຂົ້າຮ່ວມຂອງທ່ານ ປອ ຄຳພຽມ ບົວລະພາ ຮອງເລຂາພັກແຂວງເຊກອງ, ທ່ານ ທອນສົມມັກ ຈັນທະສີດາ ຫົວໜ້າພະແນກການເງິນແຂວງ, ພ້ອມນັ້ນ ຍັງມີທ່ານຫົວໜ້າ-ຮອງພະແນກ, ຫ້ອງການ ແລະພະນັກງານກ່ຽວຂ້ອງເຂົ້າຮ່ວມ.

ໃນພິທີທ່ານ ແກ້ວມະນີ ແກ້ວບຸນຮັກ ຮອງຫົວໜ້າຄະນະຈັດຕັ້ງແຂວງໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງໆເຊກອງສະບັບເລກທີ 36/ຈຂ. ລົງວັນທີ 13 ມິຖຸນາ 2018 ວ່າດ້ວຍການແຕ່ງຕັ້ງທ່ານວົງມະນີແກ້ວນະຄອນເປັນຮອງຫົວໜ້າພະແນກການເງິນແຂວງ, ຂໍ້ຕົກລົງລັດຖະມົນຕີກະຊວງການເງິນສະບັບເລກທີ 0117/ກງ. ລົງວັນທີ 16 ມັງກອນ 2018 ວ່າດ້ວຍການແຕ່ງຕັ້ງທ່ານສົມບູນພັນຈັນຫົວໜ້າຫ້ອງຄຸ້ມຄອງລາຍຮັບແຜນການຂໍ້ມູນແລະຂ່າວສານເປັນຮອງຫົວໜ້າພະແນກສ່ວຍສາອາກອນແຂວງ


ພ້ອມດຽວກັນນັ້ນຍັງໄດ້ຍົກຍ້າຍ, ແຕ່ງຕັ້ງຫົວໜ້າແລະຮອງຫົວໜ້າຂະແໜງຂອງສ່ວຍສາອາກອນປະຈຳແຂວງຄື: ຍົກຍ້ານແລະແຕ່ງຕັ້ງທ່ານໄກອຳພອນພົມມະຈັນຫົວໜ້າຫ້ອງກວດກາວິສາຫະກິດໄປເປັນຫົວໜ້າຂະແໜງຈັດຕັ້ງ, ບໍລິຫານແລະການເງິນ, ທ່ານບຸນຄ້ຳຄຳຜຸຍເປັນຮອງ; ຍົກຍ້າຍແລະແຕ່ງຕັ້ງທ່ານພູວັນເທບພະລັກສາຫົວໜ້າຫ້ອງອາກອນລາຍໄດ້ແລະຄ່າທຳນຽມໄປເປັນຫົວໜ້າຂະແໜງກວດກາພາຍໃນ, ທ່ານດວງສະໝອນວົງຄຳຈັນເປັນຮອງ; ແຕ່ງຕັ້ງທ່ານສີສະໝຸດແສງນວນຈັນຮອງຫົວໜ້າຄຸ້ມຄອງເກັບລາຍຮັບແລະແຜນການຂໍ້ມູນຂ່າວສານຂຶ້ນເປັນຫົວໜ້າຂະແໜງແຜນການ, ບໍລິການລາຍຮັບ, ທ່ານພົມມາແກ້ວິໄລເປັນຮອງ; ຍົກຍ້າຍແລະແຕ່ງຕັ້ງທ່ານລັດດາວັນກອງພະຈັນຫົວໜ້າຫ້ອງຈັດຕັ້ງບໍລິຫານ, ໃບເກັບເງິນສິ່ງພິມແລະກວດການໄປເປັນຫົວໜ້າຂະແໜງກວດກາຫຼັງການແຈ້ງລາຍຮັບ.
ໂອກາດດັ່ງກ່າວທ່ານຮອງເລຂາພັກແຂວງເຊກອງກໍໄດ້ໃຫ້ກຽດໂອ້ລົມມີຄຳເຫັນຕໍ່ພິທີໂດຍໄດ້ຍ້ອງຍໍຊົມເຊີຍຕໍ່ຜົນງານການເຄື່ອນໄຫວວຽກງານຂອງພະແນກການເງິນແລະພະແນກສ່ວຍສາອາກອນໃນໄລຍະຜ່ານມາ, ພ້ອມທັງໃຫ້ທິດຊີ້ນຳແກ່ຜູ້ທີ່ໄດ້ຮັບຕຳແໜ່ງໃໝ່ກໍຄືຢາກປະຕິບັດໜ້າທີ່ໃຫ້ສຳເລັດຜົນນັ້ນ, ຊຶ່ງມັນບໍ່ໄດ້ມີວິທີການໃດນອກຈາກປະຕິບັດໜ້າທີ່ຢ່າງມີແຜນການ, ມີການຕິດຕາມກວດກາແລະສະຫຼຸບຖອດຖອນບົດຮຽນເປັນແຕ່ລະໄລຍະ, ປະຕິບັດເຄັ່ງຄັດຫຼັກການລວມສູນປະຊາທິປະໄຕ, ແບ່ງຄວາມຮັບຜິດຊອບໃຫ້ກັນແລະປະຕິບັດໜ້າທີ່ໆຫົວໜ້າພະແນກມອບໝາຍໃຫ້ຊີ້ນຳໃຫ້ມີຜົນສຳເລັດໃໝ່ທີ່ດີຂຶ້ນກວ່າຜ່ານໆມາ.ຂ່າວ-ພາບ : ສັນຍາ