ຮອງລັດຖະມົນຕີ ຮສສ ຕ້ອນຮັບຫົວໜ້າຫ້ອງການອົງການແຮງງານສາກົນ

ໃນຕອນບ່າຍຂອງ ວັນທີ 26 ມິຖຸນາ 2018 ຜ່ານມານີ້ທີ່ຫ້ອງຮັບແຂກກະຊວງແຮງງານ ແລະ ສະຫວັດດີການສັງຄົມ, ທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບ ຂອງທ່ານ ແກຣມ ບາກເລ (Mr. Graeme BUCKEY) ຫົວຫນ້າຫ້ອງການອົງການແຮງງານສາກົນ( ILO)ປະຈຳບາງກອກປະເທດໄທ) ທີ່ຮັບຜິດຊອບກ່ຽວກັບລາວ, ເນື່ອງໃນໂອກາດທີ່ທ່ານໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.


ໃນໂອກາດນີ້ ທ່ານ ແກຣມ ບາກເລ (Mr. Graeme BUCKEY) ໄດ້ແຈ້ງໃຫ້ທ່ານຮອງລັດຖະມົນຕີຊາບກ່ຽວກັບຈຸດປະສົງໃນການມາເຮັດວຽກຢູ່ສປປລາວໃນຄັ້ງນີ້ແມ່ນເພື່ອຊຸກຍູ້ຕິດຕາມການຈັດຕັ້ງປະຕິບັດວຽກງານທີຜ່ານມາ, ເຊິ່ງທ່ານໄດ້ຕີລາຄາວ່າການຮ່ວມມືລະຫວ່າງອົງການແຮງງານສາກົນແລະລັດຖະບານລາວກໍ່ຄືກະຊວງແຮງງານແລະສະຫວັດດີການສັງຄົມແມ່ນໄດ້ຮັບໝາກຜົນຫລາຍຂຶ້ນ. ໃນໄລຍະຜ່ານມາ, ອົງການແຮງງານສາກົນໄດ້ໃຫ້ການຊ່ວຍເຫຼືອສ້າງຄວາມເຂັ້ມແຂງດ້ານວິຊາການແກ່ກະຊວງແຮງງານແລະສະຫວັດດີການສັງຄົມໃນຫລາຍໂຄງການ, ພ້ອມນັ້ນທ່ານຍັງໄດ້ຢືນຢັນວ່າອົງການແຮງງານສາກົນຈະສືບຕໍ່ສະໜັບສະໜູນແລະຮ່ວມມືກັບກະຊວງແຮງງານແລະສະຫວັດດີການສັງຄົມໃຫ້ຫລາຍຂຶ້ນ.


ໂອກາດດຽວກັນນີ້ທ່ານນາງໃບຄຳຂັດທິຍະຮອງລັດຖະມົນຕີກະຊວງແຮງງານແລະສະຫວັດດີການສັງຄົມກໍ່ໄດ້ສະແດງຄວາມຂອບໃຈແລະຊົມເຊີຍຕໍ່ການມາຢ້ຽມຢາມຂອງທ່ານໃນຄັ້ງນີ້, ກະຊວງແຮງງານແລະສະຫວັດດີການສັງຄົມພ້ອມແລ້ວທີ່ຈະໃຫ້ການຮ່ວມມືກັບທ່ານກໍຄືອົງການແຮງງານສາກົນເພື່ອເຮັດໃຫ້ການຊ່ວຍເຫຼືອທາງດ້ານທຶນຮອນແລະເຕັກນິກວິຊາການຂອງອົງການແຮງງານສາກົນໃຫ້ມີປະສິດທິຜົນຫລາຍຂຶ້ນເຊິ່ງເປັນການປະກອບສ່ວນອັນສຳຄັນເຂົ້າໃນການພັດທະນາເສດຖະກິດສັງຄົມແຫ່ງຊາດ, ແກ້ໄຂຄວາມທຸກຈົນຂອງພົນລະເມືອງລາວໃຫ້ຫລຸດລົງເທື່ອລະກ້າວ.ພາບ-ຂາວ: ນັກຂ່າວ ຮສສ ລາຍງານ