ເມືອງລະມາມ ມອບ-ຮັບຖານຂໍ້ມູນທີ່ດິນຖາວອນໃຫ້ແກ່ 6 ບ້ານເທດສະບານ

ວັນທີ 27 ມີຖຸນາ 2018 ຢູ່ທີ່ຫ້ອງການ-ການເງິນ ເມືອງລະມາມ ໄດ້ຈັດພິທີມອບ-ຮັບຖານຂໍ້ມູນທີ່ດິນຖາວອນໃຫ້ແກ່ 6 ບ້ານເທດສະບານ ໂດຍການເຂົ້າຮ່ວມຂອງທ່ານ ນ ສຸກມະນີ ໄຊຍະວົງຄຳດີ ກຳມະການພັກເມືອງ ຫົວໜ້າຫ້ອງການ-ການເງິນເມືອງລະມາມ ມີບັນດາພະນັກງານວິຊາການຫ້ອງການດັ່ງກ່າວ ພ້ອມດ້ວຍຄະນະພັກບ້ານ-ນາຍບ້ານ 6 ບ້ານເທດສະບານເຂົ້າຮ່ວມ.


ທ່ານ ນ. ສຸກມະນີ ໄຊຍະວົງຄຳດີ ກຳມະການພັກເມືອງ ຫົວໜ້າຫ້ອງການ-ການເງິນເມືອງລະມາມກ່າວວ່າ: ໂດຍປະຕິບັດຕາມບົດບັນທຶກມອບ-ຮັບຖານຂໍ້ມູນທີ່ດິນຖາວອນສະບັບເລກທີ 148/ສອຂ.ຊກ, ລົງວັນທີ 18 ພຶດສະພາ 2018 ວ່າດ້ວຍການມອບຖານຂໍ້ມູນທີ່ດິນຖາວອນໃນ 6 ບ້ານເທດສະບານເມືອງ ຂອງພະແນກສ່ວຍສາອາກອນປະຈໍາແຂວງ ແລະ ໄດ້ມອບໃຫ້ຫ້ອງການ-ການເງິນເມືອງ ເປັນຜູ້ຄຸ້ມຄອງໃນການຕິດຕາມກວດກາ; ສະນັ້ນ ຫ້ອງການ-ການເງິນເມືອງລະມາມ ຈິ່ງໄດ້ເຫັນດີມອບໂອນຖານຂໍ້ມຸນທີ່ດິນດັ່ງກ່າວຕໍ່ໃຫ້ແກ່ຄະນະພັກ ອໍານາດການປົກຄອງ 6 ບ້ານເທດສະບານເປັນຜູ້ລົງຈັດຕັ້ງປະຕິບັດການຊອກລາຍຮັບເຂົ້າງົບປະມານຕາມຖານຂໍ້ມູນດັ່ງກ່າວ.


ຖານຂໍ້ມູນທີ່ດິນຖາວອນ ໃນ 6 ບ້ານດັ່ງກ່າວມີຄື: ບ້ານເພຍໃໝ່ ມີຈໍານວນ 516 ຕອນ, ບ້ານໃໝ່ຫົວເມືອງ 828 ຕອນ, ບ້ານທ່າຫຼວງ 149 ຕອນ, ບ້ານວັດຫຼວງ 463 ຕອນ, ບ້ານໂນນມີໄຊ 535 ຕອນ ແລະ ບ້ານໂພນຄຳ 666 ຕອນ, ການມອບ-ຮັບຖານຂໍ້ມູນທີ່ດິນຖາວອນ ໃຫ້ບ້ານຄັງນີ້ ກໍ່ເພື່ອເຮັດໃຫ້ການຈັດເກັບລາຍຮັບເຂົ້າງົບປະມານຈາກພາສີທີ່ດິນໃຫ້ບັນລຸເປົ້າໝາຍຕາມຕົວເລກແຜນການທີ່ວາງໄວ້.

ຂ່າວ:ດາວສະຫວັນ  (ຂ່າວແຂວງເຊກອງ)