ປຶກສາຫາລືການຈັດຕັ້ງປະຕິບັດແຜນງານສືບຕໍ່ພັດທະນາຊີວິດການເປັນຢູ່ ຂອງປະຊາຊົນເຂດຍົກຍ້າຍຈັດສັນເມືອງນາກາຍ

0
308

 

ກອງ​ປະຊຸມ​ດັ່ງກ່າວ​ໄດ້​ຈັດ​ຂຶ້ນໃນ​ວັນ​ທີ 28 ມີ​ຖຸນາ 2018 ຢູ່ທີ່​ຫ້ອງ​ປະຊຸມ​ສະ​ໂມ​ສອນ​ເມືອງ​ນາ​ກາຍ​​ໂດຍ​ການ​ເປັນ​ປະທານ​ຮ່ວມ​ຂອງ​ ທ່ານ ​ໂອ​ໄດ ​ສຸດາ​ພອນ ​ເຈົ້າ​ແຂວງໆ ຄຳ​ມ່ວນ,​ ທ່ານ  ​ເຟຼ​ເດິ​ຣິກ ຮອຟ​ແມນ໌ ຜູ້ອຳນວຍ ການ​ໃຫຍ່​ບໍລິສັດ​ໄຟຟ້າ​ນ້ຳ​ເທີນ 2 ,​ ​ມີ​ທ່ານ​ເຈົ້າ​ເມືອງໆ ນາ​ກາຍ,​ ຜູ້ຕາງໜ້າທະນາຄານ​ໂລກ​ປະຈຳ​ລາວ, ​ຜູ້ຕາງໜ້າທະນາຄານ​ພັດທະນາ​ອາຊີ,​ ປະທານ​ສະພາ​ບໍລິຫານ​ບໍລິສັດ​ໄຟຟ້າ​ນໍ້​າເທີນ,​ ບັນດາ​ຫົວໜ້າ, ຮອງ​ຫົວໜ້າພະ​ແນ​ກການອ້ອມ​ຂ້າງ​ແຂວງ, ​ເມືອງ​,​ ຕະຫອດ​ຮອດ​ພາກສ່ວນ​ກ່ຽວຂ້ອງ​ເຂົ້າຮ່ວມ​.

​ໃນ​ວາລະກອງ​ປະຊຸມທີ່ບັນດາ​ຜູ້​ເຂົ້າຮ່ວມ​ແມ່ນ​ໄດ້​ພ້ອມ​ກັນ​ຄົ້ນຄວ້າ​ປຶກສາ​ຫາລື​ໃນ​ການ​ນຳ​ໃຊ້​ກອງ​ທຶນ​ໃຫ້​ມີ​ຜົນສຳ​ເລັດ, ມີ​ຜົນ​ສັກສິດ​ໄປ​ຕາມ​ບົດ​ບັນທຶກສັນຍາຂອງ​ບໍລິສັດ​ໄຟຟ້າ​ນ້ຳ​ເທີ​ນ 2 ກັບ ລັດຖະບານ​ລາວ​ພ້ອມ​ດຽວກັນ​ນັ້ນກອງ​ປະຊຸມ​ຍັງ​ໄດ້​ຜ່ານ​ເນື້ອ​ໃນ​ຂໍ້​ຕົກລົງ​ຂອງ​ທ່ານ​ເຈົ້າ​ແຂວງໆ ຄຳ​ມ່ວນ, ປະທານ​ຄະນະ​ກຳມະການ​ຍົກຍ້າຍ​ຈັດ​ສັນ​ໂຄງການ​ນໍ້​າເທີນ 2 ວ່າ​ດ້ວຍ​ການ​ແຕ່ງຕັ້ງຄະນະ​ກຳມະການ​ຊີ້ນຳ​ການ​ນຳ​ໃຊ້​ກອງ​ທຶນ​ພັດທະ ນາ​ນໍ້າ​ເທີນ 2 ຝ່າຍ​ແຂວງ​ຄຳ​ມ່ວນມີ​ຈຳນວນ 5 ທ່ານ, ຂໍ້​ຕົກລົງ​ຂອງ​ທ່ານ​ເຈົ້າ​ເມືອງໆ ນາ​ກາຍ​ ວ່າ​ດ້ວຍ​ການ​ແຕ່ງຕັ້ງ ພະນັກງານ​ເມືອງ​ເຂົ້າຮັບ ຜິດຊອບ​ບໍລິຫານ​ກອງ​ທຶນນໍ້າ​ເທີນ 2 ຂັ້ນ​ເມືອງ ມີ​ຈຳນວນ 7 ທ່ານ ​ແລະ ​ຄະນະ​ຮັບຜິດຊອບ​ຊີ້ນຳ​ຂອງບໍລິສັດ ພ້ອມ​ທີ​ມ ງານ​ສະ​ໜັບ​ສະໜູນ ​ເພື່ອ​ຮັບຜິດຊອບ​ການ​ຄຸ້ມ​ຄອງ​ກອງ​ທຶນ​ສ້າງ​ຄວາມ​ເຂັ້ມ​ແຂງ​ໃຫ້​ທີ​ມງານ​ຂັ້ນບ້ານ,​ ການ​ຄຸ້ມ​ຄອງ​ງົບປະມານ​ກອງ​ທຶນ ​ແລະ ​ຕິດຕາມ​ກວດກາ​ໂຄງການ. ກອງ​ທຶນພັດທະນາ​ນໍ້າ​ເທີນ 2 ​ແມ່ນ​ມີ​ຈຸດປະສົງ​ແນໃສ່ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າພາຍໃນເຂດຍົກຍ້າຍຈັດສັນ ກໍ່ຄືການພັດທະນາຊຸມຊົນຢູ່ພູພຽງນາກາຍໄດ້ມີ​ຊີວິດ​ການ​ເປັນ​ຢູ່​ທີ່​ດີ​ຂຶ້ນກວ່າ​ເກົ່າ .

​ ​ບັນດາ​ຂາ​ຮຸ້ນ​ມີ​ຄວາມ​ຈິງ​ໃຈ​ສະໜອງທຶນ​ຊ່ວຍ​ເຫລືອ​ລ້າ​ປີ​ລະ 750,000 ​ໂດ​ລາ​ສະຫະລັດ/ປີ​ ແລະ ຈະສືບຕໍ່ຊ່ວຍ​ເຫລືອໃນຈຳນວນເທົ່ານີ້ໄປຈົນເຖິງວັນສີ້ນສຸດໄລຍະສໍາປະທານໃນປີ 2035 ເພື່ອ​ສຸມ​ໃສ່​ແຜນ​ງານ​ການ​ປູກຝັງ, ລ້ຽງສັດ, ຊົນລະ​ປະທານ, ​ການ​ປະມົງ​ແລະ ​ແຜນ​ງານສົ່ງ​ເສີມການ​ນຳ​ໃຊ້​ຊັບພະຍາກອນ​ປ່າ​ໄມ້​ແບບ​ຢືນ​ຍົງ, ​ແຜນ​ງານສົ່ງ​ເສີມ​ການ​ພັດທະນາ​ຄຸນ​ນະພາ​ບຊີວິດ​ການ​ເປັນ​ຢູ່​ຂອງ​ປະຊາຊົນ ​ແລະ ​ແຜນ​ງານ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ຊຸມ​ຊົນ​ລວມ​ເຖິງ​ດ້ານ​ສະຫວັດດີ​ການ​ແລະ​ ທຶນການ​ສຶກສາ​ໄລຍະ​ຍາວ.

ພາບ ແລະ ຂ່າວ: ຂ່າວແຂວງຄໍາມ່ວນ